2 Corintios 1 - Q'eqchi Bible

Xk'eeb'al sahil ch'oolej

¹ Laa'in laj Pablo, x'apóstol li Jesukriist jo' x'alaak sa' xch'ool li Yos, nintz'iib'ak, wochb'een laj Timoteo li wiitz'in, rik'in li x'Iklees li Yos li wank Korinto jo'wi' rik'ineb' chixjunil laj santil paab'anel li wankeb' sa' xsutam Akaya.

² Li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist, chiwanq taxaq eerik'in.

³ Usilaatinanb'ilaq taxaq li Yos ut xYuwa' li Qaawa' Jesukriist, xb'aan naq a'an li Yuwa'b'ej aj uxtaan ut li Yos q'axal aj k'ojob'anel ch'oolej.

⁴ A'an nak'ojob'ank qach'ool sa' chixjunil li qarahilal re naq tooruuq xk'ojob'ankil xch'ooleb' li wankeb' sa' chixjunil li rahilal, rik'in li xk'ojob'ankil qach'ool li naqak'ul rik'in li Yos.

⁵ Jo' naq numtajenaq li rahilal naqak'ul qochb'een li Kriist, numtajenaq ajwi' li xk'ojob'ankil qach'ool naqak'ul sa' xk'ab'a' li Kriist.

⁶ Wi nokoorahob'tesiik, a'an re xk'ojob'ankil eech'ool ut re eekolb'al naq naqak'ul. Wi nak'ojob'aak qach'ool, a'an re xk'ojob'ankil eech'ool naq naqak'ul: a'an taatenq'anq eere chi xkuyb'al xnumsinkil li rahilal naqakuy laa'o.

⁷ K'ojk'o chi kaw li qoyb'enihom cherix laa'ex ut naqanaw naq, wi yookex chi tz'aqonk sa' li qarahilal anaqwan, taak'ojob'aaq ajwi' leech'ool jo' naqak'ul laa'o.

⁸ Ex was wiitz'in, naqaj naq teenaw li nimla rahilal xqak'ul chaq Asia. Numtajenaq nim chiru li xooruhank xkuyb'al; x'aalo'k sa' qab'een ut xqak'oxla naq ink'a' chik tooxkanab' chi yo'yo.

⁹ Relik chi yaal naq ak xteneb'aak li kamk sa' qab'een, ab'anan us ajwi' naq xqak'ul chi jo'kan re naq ink'a' xqakawu qach'ool qajunes qib', rik'in b'an li Yos li nawaklesink chi yo'yo eb' li kamenaq.

¹⁰ A'an xkolok chaq qe chiru li nimla rahilal a'an ut toj yooq chi qakolb'al. A'an kaw wi' li qach'ool naq toj yooq chi qakolb'al,

¹¹ wi laa'ex tex'okenq chi tijok chiqix laa'o. Wi naab'aleb' neke'tijok chiqix, naab'aleb' ajwi' te'yoxinq sa' qak'ab'a' chirix li usilal xqamaatani.

K'a'ut naq laj Pablo ink'a' xwulak chi rilb'aleb' laj Korinto

¹² A'an a'in li k'ojk'o wi' li qach'ool: xnawb'al naq xoowank sa' santilal ut tiikilal sa' li ruuchich'och' a'in sa' xk'ab'a' li Yos, ut q'axal wi' chik naq xoowank sa' eeyanq laa'ex: moko rik'in ta xna'leb' li ruuchich'och', rik'in b'an rusilal li Yos.

¹³ Xb'aan naq li k'aru xqatz'iib'a eerik'in, ka'ajwi' li yookex chi rilb'al ut chi xtawb'al xyaalal. Ut nawoyb'eni

¹⁴ naq laa'ex li ak xetaw ru xyaalal chiqix, teetaw ru chi us naq laa'o leeloq'al, jo' naq laa'exaq li qaloq'al sa' xkutankil li Qaawa' Jesus.

¹⁵ Sa' xk'ab'a' a'an xwaj raj xik xb'enwa eerik'in re naq xineek'ul raj xka'sutil;

¹⁶ xink'oxla xinnume'k eerik'in re xik Macedonia, ut chirix chik a'an xinsutq'iik raj eerik'in, re naq tineerochb'eeni raj kach'inaq re xik Judea.

¹⁷ Naq xwaj xb'aanunkil a'an, ma ink'a' tab'i' xink'oxla chi us li b'arwan xink'uub'? Malaj nekek'oxla naq yal ruuchich'och'il na'leb' chixjunil li xink'uub' xb'aanunkil, xb'aan naq xb'enwa xinye eere “yaal” ut chirix a'an “ink'a'”?

¹⁸ Naxnaw chi us li Yos naq li aatin naqaye eere maawa' xb'enwa “yaal” ut chirix a'an “ink'a'”.

¹⁹ Laj Silvano, laj Timoteo ut laa'in xqapuktesi resil li Kristo Jesus, li Ralal li Yos, eere laa'ex; ut A'an maawa' jun ta yaal ut jun ta ink'a'; junes li yaal b'an kiwank rik'in.

²⁰ Chixjunil li kixyeechi'i li Yos, kitz'aqlok ru rik'in li Kriist; jo'kan naq sa' xk'ab'a' A'an naqaye “Amén” re xloq'oninkil ru li Yos.

²¹ A' ajwi' li Yos nak'ehok xkawub' qach'ool qochb'eenex laa'ex sa' xk'ab'a' li Kriist, ut a'an ajwi' kooxyul

²² ut kixk'e qeetalil rik'in li xkaaxt, kixsi qe sa' li qaanm li Musiq'ej jo' reetalil naq tixb'aanu li xyeechi'om.

²³ Li Yos nach'olob'ank li yaal chiwix: eeraab'al we naq toj maji' xinwulak Korinto. Li Yos naxnaw ut chinxk'ehaq chi kamk wi ink'a' ninye li yaal!

²⁴ Moko naqaj ta taqlank sa' xb'een leepaab'aal, naqaj b'an sumk'anjelak chirix xsahil eech'ool, xb'aan naq kaw xaqxookex chi paab'ank.