1 Ts 5 - Q'eqchi Bible

Yo'oon wanqo

¹ Chirix li xq'ehil ut li xkutankil moko aajel ta ru naq tintz'iib'aq eerik'in, ex was wiitz'in.

² Laa'ex nekenaw chi us naq li xkutankil li Qaawa' taachalq jo' nachalk junaq aj elq' chi q'eq.

³ Naq yooqeb' chi xyeeb'al: “Wanko sa' tuqtuukilal ut maak'a' chik qak'a'uxl”, toja' naq taachalq li roso'jikeb' sa' junpaat chi maak'a'aq sa' xch'ooleb', jo' naq nachalk xrahil li alank sa' xb'een li ixq; ut ink'a' naru te'eleliq chiru.

⁴ A'ut laa'ex, ex was wiitz'in, moko sa' aak'ab' ta wankex; jo'kan naq li Kutan a'an ink'a' taachalq sa' eeb'een kama' junaq aj elq'.

⁵ Chejunilex laa'ex ralal xk'ajolex li kutan saqenk, moko reho ta li q'oqyink chi moko reho li aak'ab'.

⁶ Jo'kan b'i' moowark jo'keb' li junch'ol, chooyo'leq b'an ut aj'ajaq qu.

⁷ Xb'aan naq eb' li neke'wark, chi q'eq neke'wark; ut eb' li neke'kalaak, chi q'eq neke'kalaak.

⁸ A'ut laa'o li reho li kutan wanqo chi aj'ajaq qu, qatiqib'aq qib' rik'in li koleb' ch'iich' nak'ehe'k xb'aan li paab'aal ut li rahok; ut li qakolb'al li yooko chi royb'eninkil, a'an chik'anjelaq qe jo' ruuchil li punit ch'iich'.

⁹ Li Yos ink'a' xooxk'e cho'q re li tojb'amaak, chi xtawb'al b'an li kolb'a ib' sa' xk'ab'a' li Jesukriist li Qaawa':

¹⁰ a'an kikamk sa' qak'ab'a' re naq, us ta yo'yooqo us ta kamenaqo chik naq taak'ulunq, chiwanq qayu'am qochb'een A'an.

¹¹ Jo'kan naq chek'e xkawub' eech'ool ut chetenq'a eerib' cherib'il eerib', jo' li ak yookex xb'aanunkil.

Laj Pablo naxk'e xna'leb'eb' laj paab'anel ut naxchaq'rab'iheb'

¹² Ex qas qiitz'in, naqatz'aama cheru naq chek'ehaq sa' xnaq' eeru eb' li neke'xk'e xch'ool chi k'anjelak sa' eeyanq, eb' li neke'jolomink eere sa' xk'ab'a' li Qaawa' ut neke'xch'olob' eena'leb'.

¹³ Ka'loq' oxloq' cherileb'; cherahaqeb' sa' xk'ab'a' li xk'anjeleb'. Chexwanq sa' tuqtuukil usilal cherib'il eerib'.

¹⁴ Naqatz'aama ajwi' cheru, ex qas qiitz'in, cheq'usaqeb' li sachsookeb' xna'leb'; chewaklesihaqeb' li neke'ch'inank xch'ool, chetenq'aheb' li ink'a' kaweb' xch'ool sa' xpaab'aaleb' ut chiwanq eekuyum rik'ineb' chixjunil.

¹⁵ Chek'e reetal, maa'ani chi'eeqajunq maa'usilal rik'in maa'usilal, a' b'an li us cheb'aanu junelik cherib'il eerib' ut rik'ineb' chixjunil.

¹⁶ Junelik sahaq eech'ool.

¹⁷ Junelik chextijoq.

¹⁸ Chexyoxinq chirix jo'ch'inal jo'nimal li nekek'ul, xb'aan naq a'an a'in li naraj li Yos naq teeb'aanu, sa' xk'ab'a' li Kristo Jesus.

¹⁹ Meechup li Musiq'ej.

²⁰ Meetz'eqtaana eb' li neke'aatinak jo' propeet.

²¹ Tz'ilomaq rix chixjunil ut k'uulahomaq sa' eech'ool li us.

²² Chekolaq eerib' chiru chixjunil li k'a'aq re ru chi maa'usilal.

Xraqik li hu

²³ A' taxaq li Yos li nak'ehok li tuqtuukil usilal chisantob'resinq eere chi tz'aqal. Ut leejunxaqalil, leemusiq', leech'ool ut leetz'ejwal chiwanq taxaq chi maak'a' eeq'usb'al toj reetal sa' xk'ulunik li Qaawa' Jesukriist.

²⁴ Chaab'il A'an li nab'oqok eere, ut tixb'aanu chixjunil a'in.

²⁵ Ex qas qiitz'in, chextijoq ajwi' chiqix.

²⁶ Chek'ehaq xsahilaleb' xch'ool chixjunileb' li qas qiitz'in rik'in li santil utz'uk u.

²⁷ Nintz'aama ut nawelaji cheru sa' xk'ab'a' li Qaawa' naq chiyaab'asimanq li hu a'in sa' xyanqeb' chixjunileb' laj paab'anel.

²⁸ Li rusilal li Qaawa' Jesukriist chiwanq taxaq eerik'in.