1 Timoteo 6 - Q'eqchi Bible

Eb' laj loq'b'il k'anjel

¹ Chixjunileb' li yookeb' chi k'anjelak cho'q aj loq'b'il k'anjel che'roxloq'i chi us laj eechal reheb' jo' chanru xk'ulub', re naq ink'a' chimajewaaq xk'ab'a' li Yos jo'wi' li qachaab'il tzolb'al.

² Li wankeb' aj eechal re aj paab'aneleb' me'xtz'eqtaanaheb', sa' xk'ab'a' naq ras riitz'ineb' rib', che'k'anjelaq b'an chi numtajenaq chik chiruheb', xb'aan naq eb' li neke'k'uluk rusil li xk'anjeleleb' a'aneb' aj paab'anel ut ramiiweb' li Yos. A'in tento taatzoleb' ut taachaq'rab'iheb' wi':

Li tz'aqal aj tij ut laj b'alaq'

³ Wi wank junaq jalan chik yo chi xk'utb'al ut ink'a' naxpaab' li xchaab'il aatin li Qaawa' Jesukriist jo'wi' li qatzolb'al sa' li qapaab'aal,

⁴ a'an xmutz'o'k xb'aan li xq'etq'etil ut maak'a' naxnaw; junes patz'ink ut xwech'inkil rixeb' li aatin nawulak chiru. A'an li xyajel. Aran nachalk li kaqalink, li raaxiik', li majewank, li ink'a' usil k'a'uxl

⁵ ut k'iila wech'ink: eb' li neke'b'aanunk re a'in, a'aneb' li po'jenaqeb' xk'a'uxl, ut maak'a' li yaal rik'ineb'; neke'xk'oxla naq rik'in li paab'ank te'xtaw xtumineb'.

⁶ Relik chi yaal naq q'axal loq' li paab'ank cho'q reheb' li k'ojk'ookeb' xch'ool chirix li k'aru wank reheb'.

⁷ Xb'aan naq laa'o maak'a' k'aru xqak'am chaq arin sa' ruuchich'och' ut maak'a' ajwi' k'aru tqak'am chiqix.

⁸ Wi wank qatzekemq ut qab'aatal, k'ojk'ooq qach'ool rik'in a'an.

⁹ A'ut eb' li neke'raj b'ihomo'k, neke'xk'e rib' chi aaleek ut te't'ane'q sa' li ra'al, sa' k'iila paay chi kaqalik q'axal yib'eb' ru ut maak'a' na'ok wi': eb' a'an neke'k'amok reheb' li winq sa' li sachleb'aal ut sa' li lajk-oso'k.

¹⁰ Xb'aan naq li xxe' chixjunil li maa'usilal a'an li xrahinkil ru li tumin. Wankeb' xkoheb' xch'ool chirix a'an; jo'kan naq xe'elk sa' li paab'aal, ut xiikil li rahilal xe'tawasiik wi'.

Xchaq'rab'inkil laj Timoteo

¹¹ A'ut laa'at aj raholat re li Yos, maab'aanu a'in; chayal b'an aaq'e chi xsik'b'al li tiikilal ut li roxloq'inkil li Yos; chasik' li paab'ank, li rahok, li kuyuk ut li tuulanil.

¹² K'e aach'ool chi kaw sa' laapaab'aal, chaweechani li junelik yu'am li katb'oqe'k wi' ut li kach'olob' chi chaab'il xyaalal chiruheb' li k'iila testiiw.

¹³ Nintz'aama usilal chiru li Yos li nak'ehok xyu'am chixjunil li k'a'aq re ru ut chiru li Jesukriist li kixch'olob' chi us xyaalal chiru laj Poncio Pilaat:

¹⁴ ye laawaatin naq chak'uula sa' laach'ool li chaq'rab' xak'ul, chi maak'a'aq aamuxul ut maak'a'aq aaq'usb'al, toj reetal tolxk'ut rib' li Qaawa' Jesukriist.

¹⁵ A'an taak'utb'esiiq sa' xq'ehil xb'aan li Yos Awab'ej, q'axal loq' ut jun chirib'il, a' li Rey sa' xb'eeneb' li rey ut Qaawa' sa' xb'eeneb' li Qaawa',

¹⁶ li jun chirib'il li ink'a' nakamk, li wank sa' jun saqenk li maa'ani nawulak aran; maajun junaq winq x'ilok ru chi moko taaril ru. Rehaq taxaq li loq'oniik ut li nimajwal wankilal chi junelik. Jo'kan taxaq.

Li b'ihom aj paab'anel

¹⁷ Chatz'aama chiruheb' li b'ihom sa' li ruuchich'och' a'in naq me'xq'etq'eti rib' chi moko te'xk'ojob' xch'ool rik'in li b'ihomal li taa'oso'q, te'xk'ojob' b'an xch'ool rik'in li Yos li nak'ehok qe chi yo'oon chixjunil li k'a'aq re ru, re tqayal xsahil.

¹⁸ Chatz'aama naq usilal che'xb'aanu, jo' ajwi' naq che'b'ihomo'q rik'in li chaab'il b'aanuhom ut che'wotzoq chi anchaleb' xch'ool.

¹⁹ Chi jo'kan yooqeb' chi xtamresinkil jun xnimal b'ihomal cho'q re li kutan chaalel li te'reechani wi' li tz'aqal yu'am.

Xraqik li hu

²⁰ At Timoteo, chawil chi us li k'aru q'axtesinb'il aawe. Mat-okenk rik'in li seeraq' maak'a' na'ok wi' jo'wi' rik'in wech'ij ib' nachalk sa' b'alaq'il na'leb'.

²¹ Wankeb' xe'xyeechi'i a'an, ab'an moqon chik xe'elk sa' li paab'aal. Li rusilal li Yos chiwanq taxaq eerik'in.