1 Timoteo 5 - Q'eqchi Bible

Chaq'useb' sa' xyaalal

¹ Maaq'useb' chi kaw eb' li cheekel winq, chach'olob' b'an xna'leb'eb' jo' yuwa'b'ej. Chawaatinaheb' li saaj winq jo'eb' laawiitz'in;

² eb' li cheekel ixq chawaatinaheb' jo' na'b'ej, ut eb' li tuq'ixq jo' anab'ej, rik'in xsaqal ru ch'oolej.

Eb' li xmalka'an

³ Chawoxloq'iheb' li xmalka'an, a'eb' li tz'aqal wankeb' xjuneseb'.

⁴ Wi junaq xmalka'an wank ralal xk'ajol malaj ri xmam, eb' a'in che'xtzolaq xb'enwa xraab'al li xkomoneb' ut xq'ajkamunkil li xna' xyuwa', xb'aan naq a'in q'axal nawulak chiru li Yos.

⁵ Li tz'aqal xmalka'an ut junaatal, wank xsahil oyb'enihom rik'in li Yos ut junelik natijok natz'aamank chi q'eq ut chi kutan.

⁶ Ab'an li xmalka'an li jo'maajo' naq wank, a'an kamenaq us ta yo'yo.

⁷ Chayehaq ajwi' chixjunil a'in reheb', re naq maak'a'aq xq'usb'aleb'.

⁸ Li ink'a' naxk'oxlaheb' li xkomon, ut xb'een xb'een eb' li wankeb' sa' li xjunkab'al, a'an xtz'eqtaana li xpaab'aal ut yib'ru li xna'leb' chiru li ink'a' napaab'ank.

⁹ Li xmalka'an k'eeb'ilaq sa' ajl, a'an li numenaqaq oxk'aal chihab', jun sut ajwi' sumsuuq,

¹⁰ ut nawnooq ru rik'in li chaab'il k'anjel ak xb'aanuhom: naraj naxye, xtijeb' chi chaab'il eb' li ralal xk'ajol, xk'ehok ochochnaal, xch'ajom roqeb' laj santil paab'anel, xtenq'aheb' li wankeb' sa' rahilal ut xb'aanuhom yalaq k'a' chi chaab'il k'anjelil.

¹¹ Maak'eheb' sa' ajl li xmalka'an toj saajeb' xb'aan naq, wi te'aaleeq, te'xkanab' li Kriist ut te'raj sumlaak;

¹² chi jo'kan te'xk'e rib' sa' tojb'amaak xb'aan xq'etb'al li aatin xsumehomeb' chaq xb'enwa.

¹³ Jo'wi' anchal, neke'k'ayk chi sub'uk kutan ut neke'xtzol rib' chi xik chirehatq kab'lal; ut moko ka'aj ta wi' sub'uk kutan neke'xb'aanu, neke'molok aj b'an wi' aatin, neke'xch'ik rib' yalaq b'ar ut neke'xye li moko yehe'k ta naraj.

¹⁴ Jo'kan utan nawaj naq eb' li xmalka'an toj saajeb' che'sumlaaq, che'wanq ralal xk'ajol, che'xjolomi li xjunkab'aleb' re naq maak'a' toohob'e'q wi' xb'aaneb' li xik' neke'ilok qe.

¹⁵ Xb'aan naq ak wankeb' li xmalka'an xe'sachk ut xkoheb' chirix laj tza.

¹⁶ Wi junaq ixq aj paab'anel wanqeb' xmalka'an sa' rochoch, chixtenq'aheb' ut ink'a' chixk'e riiq li Iklees, re naq A'in chixtenq'aheb' li tz'aqal xmalka'aneb'.

Eb' li cheekel winq sa' Iklees

¹⁷ Eb' li cheekel winq li neke'xjolomi chi us li Iklees, xk'ulub'eb' naq te'xk'ul xq'ajkamunkileb' ka' sut, xb'een xb'een eb' li neke'xk'e xch'ool chi xpuktesinkil ut xch'olob'ankil li Aatin,

¹⁸ xb'aan naq naxye li Santil Hu: “Maatz'ap ru'uj li b'ooyx naq yo chi k'anjelak”, ut naxye ajwi': “Xk'ulub' naq laj k'anjel tixk'ul xtojb'al”.

¹⁹ Maak'ulub'a xjitb'al junaq cheekel winq wi maak'a' wib' oxib'aqeb' testiiw.

²⁰ Eb' li yookeb' chi maakob'k, chaq'useb' chiruheb' chixjunil re naq chi'okaq xxiweb' li xkomon.

²¹ Nintz'aama chawu sa' xk'ab'a' li Yos, sa' xk'ab'a' li Kristo Jesus ut eb' li ánjel sik'b'ileb' ru, naq taapaab' chixjunil a'in sa' tiikilal, chi ink'a' tiitooq ru anihaq aab'aan.

²² Maaseeb'a aawib' chi xk'eeb'al laawuq' sa' xb'een anihaq. Mattz'aqonk rik'in xmaak anihaq ut wanqat chi saq ru laach'ool.

²³ Mat-uk'uk chik yal junes ha', uk'an b'an kach'inaq b'iin xb'aan xrahil aasa' ut xb'aan li yajel kok'aq xsa' nachalk chab'een.

²⁴ Wankeb' winq ak k'utk'u li xmaakeb', us ta toj maji' naraqmank aatin chirixeb'; ab'an wankeb' ajwi' li toj moqon chik toxk'utunq k'aru li xmaakeb'.

²⁵ Jo'kan ajwi' eb' li chaab'il b'aanuhom k'utk'uukeb' chiruheb' chixjunil; ut eb' li moko k'utk'uukeb' ta, moko te'kanaaq ta junelik chi muqmu.