1 Timoteo 3 - Q'eqchi Bible

Laj ilol re xtenamit li Yos

¹ Tz'aqal yaal li aatin a'in: wi wank junaq na'alaak sa' xch'ool wank cho'q aj ilol re xtenamit li Yos, chaab'il k'anjel li yo chi xrahinkil ru.

² Laj ilol re xtenamit li Yos tento naq maak'a'aq xq'usb'al, jun sut ajwi' sumsuuq, tuqtuuq xna'leb', chaab'ilaq xch'ool, tijb'ilaq, aj k'eholaq ochochnaal, seeb'aq xch'ool chi k'utuk,

³ maawa'aq aj kalajenaq, chi moko aj raholaq ru tumin malaj aj yoob'anel raaxiik', nimaq b'an xkuyum ut tuulanaq.

⁴ Tento naq tixnaw xjolominkil chi us li xjunkab'al, paab'ajelaq ut oxloq'inb'ilaq xb'aaneb' li ralal xk'ajol,

⁵ xb'aan naq wi junaq ink'a' naxnaw xjolominkil li rochoch, chan put ru naq taaruhanq rilb'al li x'Iklees li Yos?

⁶ Tento naq laj ilol re xtenamit li Yos ink'a' toj akaq rokik chi paab'ank: mare anchal tixnimob'resi rib' ut taat'ane'q sa' li tojb'amaak kit'ane'k wi' laj tza.

⁷ Tento ajwi' naq chaab'il resil taayehe'q chirix xb'aaneb' li ink'a' neke'paab'ank, re naq ink'a' chit'ane'q sa' xutaan ut sa' xra'al laj tza.

Eb' li diákono

⁸ Jo'kanaqeb' ajwi' li diákono, tento naq tiikaqeb' xch'ool, maawa'aqeb' aj ka'pak'al u, aj rahol ru b'iin chi moko aj sik'ol b'ihomal sa' b'alaq',

⁹ k'uulanb'ilaq b'an sa' raanmeb' li qaloq'laj paab'aal li k'utb'esinb'il chiqu, ut saqaq ru xch'ooleb'.

¹⁰ Xb'enwa tento xtz'ilb'aleb' rix, ut chirix chik a'an, wi maak'a' xch'a'ajkilaleb', te'ok chi k'anjelak cho'q diákono.

¹¹ Jo'kanaqeb' ajwi' li ixq, tento naq tiikaqeb' xch'ool, maawa'aqeb' aj yoob'anel aatin, tuqtuuq b'an xna'leb'eb' ut tiikaqeb' xch'ool rik'in chixjunil.

¹² Eb' li diákono tento naq jun sut ajwi' sumsuuqeb', jo'wi' che'xnaw xjolominkil chi chaab'il eb' li ralal xk'ajol ut li rochoch.

¹³ Xb'aan naq eb' li neke'k'anjelak chi us cho'q diákono te'xtaw xnimal xloq'aleb' jo'wi' xkawub' xch'ooleb' re aatinak chirix xpaab'ankil li Kristo Jesus.

Li Iklees ut li qaloq'laj paab'aal k'utb'esinb'il chiqu

¹⁴ Nintz'iib'a aawe chixjunil a'in, rik'in royb'eninkil naq chi seeb' tinxik aawik'in.

¹⁵ Chi jo'kan, wi tinb'ayq chi xik, nawaj naq ak taanaw chanru li k'anjelak sa' rochoch li Yos, a'an li x'Iklees li yo'yookil Yos, roqechal ut xkuut li yaal.

¹⁶ Relik chi yaal naq q'axal nim li qaloq'laj paab'aal li k'utb'esinb'il chiqu: A'an kixk'utb'esi rib' sa' li qach'och'el qasululel, kixaqab'aak xwankil sa' li Musiq'ej, ki'ile'k xb'aaneb' li ánjel, kipuktesiik resil reheb' li tenamit, kipaab'aak sa' li ruuchich'och' ut kik'ame'k taqe'q sa' xnimal xloq'al.