1 Samuel 6 - Q'eqchi Bible

Eb' laj Filistea ke'xq'axtesi wi' chik li Loq'laj Kaax

¹ Wuqub' po kiwank chaq li xLoq'laj Kaax li Qaawa' sa' xna'ajeb' laj Filistea.

² Toja' naq eb' laj Filistea ke'xb'oqeb' laj tij ut eb' laj q'e ut ke'xpatz' reheb': “K'aru tqab'aanu rik'in li xLoq'laj Kaax li Qaawa'? Yehomaq qe chanru naq tqataqla wi' chik sa' li xna'aj”, chankeb'.

³ Ke'chaq'ok eb' a'an ut ke'xye: “Wi laa'ex teeraj xq'ajsinkil li xLoq'laj Kaax li xYos laj Israel, meeq'axtesi chi yamyo xsa', yeechi'ihomaq b'an mayej re xtojb'al rix leemaak. Chi jo'kan texk'iraaq ut teenaw k'a'ut naq ink'a' naxkanab' eerahob'tesinkil”.

⁴ “K'aru tqataqla re xtojb'al rix li qamaak?”, chankeb' laj Filistea. Ke'chaq'ok eb' laj tij ut eb' laj q'e: “A' yaal jo'k'ihaleb' li xjolomileb' laj Filistea, teetaqla oob' chi saqijoj ut oob' chi ch'o yiib'anb'ileb' rik'in oor, xb'aan naq a' ajwi' li rahilal xek'ul laa'ex, xe'xk'ul li neke'taqlank sa' eeb'een.

⁵ Yiib'omaq xjalam u leesaqijojil ut eb' li ch'o li yookeb' chi sachok sa' leetenamit, ut k'ehomaq xloq'al li xYos laj Israel. Mare anchal taakotzq li rahilal sa' eeb'een, sa' xb'eeneb' leeyos ut sa' xb'een leech'och'.

⁶ K'a' naq teekawub'resi leech'ool jo' ke'xb'aanu eb' laj Ejiipt ut laj Parahón? Ma ink'a' tab'i' ke'xkanab'eb' laj Israel chi xik naq ke'rahob'tesiik xb'aan li Qaawa'?

⁷ Kawresihomaq jun ak'il kareet anaqwan ut sik'omaq wiib' li xna' wakax li wankeb' ral, li maajun sut wanjenaq b'itche' chirix xkuxeb'. Teek'eheb' chi xkelonkil li kareet, ab'anan meekanab'eb' li ral chi xik chirixeb', teesutq'isiheb' b'an sa' li xkoraleb'.

⁸ Teechap li xLoq'laj Kaax li Qaawa' ut teek'e sa' li kareet. Ab'an li k'a' re ru yiib'anb'il rik'in oor li teeyeechi'i re xtojb'al rix leemaak, teek'e sa' junaq kaax chi xk'atq. Chirix chik a'an teekanab' li kareet chi xik xjunes.

⁹ K'ehomaq reetal: wi li kareet taaxik sa' xb'ehil Bet-Semes, xna'ajeb' laj Israel, naraj naxye naq li xYos laj Israel xb'aanunk eere li nimla rahilal a'in. Wi ut ink'a', aran tqanaw naq maawa' A'an xrahob'tesink qe, yal xqak'ul b'an sa' iq'”, chankeb'.

¹⁰ Ut jo'kan ajwi' ke'xb'aanu eb' li winq a'an: ke'xchap wiib' li wakax li wankeb' ral ut ke'xb'ak'eb' chiru li kareet, ab'an eb' li kok' ral ke'xkanab'eb' sa' li koral.

¹¹ Chirix chik a'an sa' li kareet ke'xk'e li xLoq'laj Kaax li Qaawa' jo'wi' li kaax wankeb' wi' li ch'o ut eb' li saqijoj yiib'anb'ileb' rik'in oor.

¹² Ut eb' li xna' wakax koheb' sa' li xb'ehil Bet-Semes naq yookeb' chi muub'ak, ut ink'a' ke'xjal xb'eheb'. Tiik koheb', chi ink'a' neke'xik sa' xnimeb' chi moko sa' xtz'eheb'. Eb' li xjolomileb' laj Filistea koheb' chirixeb' toj sa' xnub'ajlil Bet-Semes.

¹³ Eb' laj Bet-Semes yookeb' chi q'olok triiw sa' li taq'a ut naq ke'xtaqsi li rilob'aaleb', ke'ril li Loq'laj Kaax. K'ajo' naq ke'saho'k sa' xch'ool!

^14-15 Naq kiwulak sa' xk'aleb'aal laj Josué aj Bet-Semes, kixaqliik li kareet. Aran wank jun nimla pek. Toja' naq eb' laj Leví ke'xkub'si li xLoq'laj Kaax li Qaawa' jo'wi' li kaax li wank chi xk'atq, a' li wan wi' li k'a' re ru yiib'anb'il rik'in oor, ut ke'xk'e sa' xb'een li nimla pek. Chirix chik a'an ke'xtoqi li xche'el li kareet, ke'xloch jun li xam ut ke'xyeechi'i eb' li wakax cho'q k'atb'il mayej chiru li Qaawa'. Sa' li kutan a'an eb' laj Bet-Semes ke'xq'axtesi naab'al li k'atb'il mayej ut xyeechi'omeb' chiru li Qaawa'.

¹⁶ Chirix chik a'an, naq ak ke'ril a'an eb' li oob' chi xjolomileb' laj Filistea, ke'sutq'iik Ekrón sa' ajwi' li kutan a'an.

¹⁷ A'aneb' a'in li oob' chi saqijoj yiib'anb'ileb' rik'in oor li ke'yeechi'iik chiru li Qaawa' xb'aaneb' laj Filistea re xtojb'al rix li xmaakeb': jun sa' xk'ab'a'eb' laj Asdod, jun sa' xk'ab'a'eb' laj Gasa, jun sa' xk'ab'a'eb' laj Askalón, jun sa' xk'ab'a'eb' laj Gat ut li jun chik sa' xk'ab'a'eb' laj Ekrón.

¹⁸ Ut li xk'ihaleb' li ch'o yiib'anb'ileb' rik'in oor, a'an juntaq'eet rik'in li xk'ihaleb' li xtenamiteb' li oob' chi ninqeb' xwankil aj Filistea: k'eeb'ileb' sa' ajl li tenamit suttz'akanb'ileb' jo' ajwi' eb' li k'aleb'aal maak'a' xsutb'aleb'. Li nimla pek li kihilank wi' li xLoq'laj Kaax li Qaawa', toj wank ajwi' anaqwan sa' xk'aleb'aal laj Josué aj Bet-Semes.

¹⁹ Sa' xyanqeb' laj Bet-Semes wankeb' ink'a' ke'saho'k xch'ool naq ke'ril li xLoq'laj Kaax li Qaawa'. Jo'kan naq li Yos kixk'e chi kamk lajeeb' xkaak'aal chi winq, ut eb' li tenamit ke'wank sa' rahil ch'oolej xb'aan naq q'axal ke'rahob'tesiik xb'aan li Qaawa'.

²⁰ Toja' naq ke'xye eb' laj Bet-Semes: “Ani tkuyuq wank chiru li Qaawa', li Santil Yos? Ani aj ik'in tqataqla li Loq'laj Kaax naq taa'elq sa' qayanq?”.

²¹ Ut ke'xtaqlaheb' aj esil rik'ineb' laj Kiryat-Yeharín re xyeeb'al reheb': “Eb' laj Filistea ke'xq'axtesi chaq li xLoq'laj Kaax li Qaawa'. Kub'enqex chaq ut k'amomaq eerik'in”.