1 Samuel 31 - Q'eqchi Bible

Laj Saúl ut eb' li ralal ke'kamsiik

¹ Sa' li tzuul Jelbohé eb' laj Filistea ke'ok chi yalok rik'ineb' laj Israel, ut eb' a'in ke'elelik chiruheb' ut naab'aleb' ke'kamsiik.

² Eb' laj Filistea kaw ke'xsik' laj Saúl ut eb' li ralal, ut ke'xkamsi laj Jonatán, laj Abinadab ut laj Malkisúa, ralaleb' laj Saúl.

³ Chirix chik a'an ke'xkut rib' sa' xb'een laj Saúl. Eb' laj ch'e'ol simaj ke'xkut chi simaj ut k'ajo' naq ki'ok xxiw laj Saúl.

⁴ Toja' naq a'in kixye re laj tenq' re: “Isi laach'iich' ut kamsin. Mare anchal te'k'ulunq li ink'a' xk'ulumeb' sirkunsisyon ut te'ok chinse'enkil ut chinkamsinkil”, chan. Ab'an laj tenq' re ink'a' kiraj xb'aan naq k'ajo' xxiw. Tikto laj Saúl kixchap li xch'iich' ut kixkut rib' sa' xb'een.

⁵ Naq li winq kiril naq kamenaq chik laj Saúl, a'an kixkut ajwi' rib' sa' xb'een li ch'iich' ut kikamk rochb'een laj Saúl.

⁶ Jo'ka'in naq sa' li kutan a'an ke'kamk laj Saúl, roxichaleb' li ralal, laj tenq' re ut chixjunileb' laj puub'.

⁷ Naq eb' laj Israel li wankeb' junpak'al li taq'a ut junpak'al li nima' Jordán ke'ril naq eb' laj puub' aj Israel yookeb' chi elelik ut kamenaq chik laj Saúl rochb'eeneb' li ralal, ke'xkanab' li xtenamiteb' ut ke'elelik. Toja' naq ke'chalk eb' laj Filistea ut ke'na'ajunk aran.

⁸ Sa' li kutan jun chik ke'chalk eb' laj Filistea chi xxokb'al li k'aru reheb' li kamenaq, ut ke'xtaw laj Saúl ut roxichaleb' li ralal jiljookeb' sa' li tzuul Jelbohé.

⁹ Ke'xch'ot li xjolom, ke'risiheb' li xk'anjelob'aal re yalok ut sut ke'xtaqlaheb' aj esil sa' xteepal chixjunil Filistea re xpuktesinkil li chaab'il esil a'in reheb' li tenamit sa' rochoch li xyoseb'.

¹⁰ Ke'xk'e eb' li xk'anjelob'aal laj Saúl sa' rochoch lix Astarté ut ke'xt'uyub' li kamenaq sa' li xsuttz'akil Betsán.

¹¹ Naq eb' laj Yabés re Galahad ke'rab'i resil li k'aru ke'xb'aanu eb' laj Filistea re laj Saúl,

¹² ke'xaqliik chixjunileb' li yo'ooneb' chi yalok, ke'b'eek chiru chixjunil li q'oqyink ut ke'risi chaq li xch'och'el xsululel laj Saúl ut li xtz'ejwaleb' li ralal chiru li xsuttz'akil Betsán. Chirix chik a'an ke'sutq'iik Yabés ut aran ke'xk'at.

¹³ Ke'xxok li xb'aqel, koxe'xmuq aran Yabés rub'el jun li che' nawno chi us, ut chiru wuqub' kutan ke'xkuy xsa'eb'.