1 Samuel 26 - Q'eqchi Bible

Laj David kixkuy xmaak laj Saúl

¹ Eb' laj Sif ke'wulak aran Kibehá rik'in laj Saúl ut ke'xye re: “Muqmu laj David sa' li tzuul Jakilá, sa' xka'yab'aal li chaqich'och'”.

² Toja' naq laj Saúl kixchap xb'e ut koho sa' li chaqich'och' re Sif chi xsik'b'al laj David, rochb'een lajeek'aal xwaqxaq o'q'ob' (3,000) chi winq sik'b'il ruheb' sa' xyanqeb' laj Israel.

³ Laj Saúl koxhilanq sa' xb'een li tzuul Jakilá li wank chire b'e, sa' xka'yab'aal li chaqich'och'. Ab'anan laj David, li wan chaq sa' li chaqich'och', kixk'e reetal naq laj Saúl ki'ok aran chi xsik'b'al.

⁴ Jo'kan naq kixtaqlaheb' aj k'ehol eetal ut kixnaw chi ch'olch'o ru naq laj Saúl wank aran.

⁵ Chirix chik a'an kixchap xb'e ut koho toj sa' li na'ajej wan wi' li xmuheb'aal laj Saúl ut kiril li na'ajej b'arwi' yokyookeb' laj Saúl ut laj Abner, ralal laj Ner, xjolomileb' laj puub': warenaq laj Saúl sa' xyi ut eb' laj puub' wankeb' chi xsutam a'an.

⁶ Toja' naq laj David kiraatina laj Ajimélek, aj Hit, ut laj Abisay, li xyum lix Sarbia, riitz'in laj Johab; kixye reheb': “Ani eere traj kub'eek chiwix wan wi' laj Saúl sa' li xmuheb'aal?”. Kichaq'ok laj Abisay: “Laa'in tinxik chawix”, chan.

⁷ Sa' ajwi' li q'oqyink a'an koheb' laj David ut laj Abisay wankeb' wi' laj puub'. Laj Saúl yo chi wark sa' xyi li na'ajej, laplo li xjutz' che' sa' ch'och', chi xjolom. Laj Abner ut eb' laj puub' yokyookeb' chi xsutam a'an.

⁸ Toja' naq laj Abisay kixye re laj David: “Anaqwan li Yos xq'axtesi sa' laawuq' li xik' na'ilok aawe. Kanab'in anaqwan chi xt'ojb'al chiru ch'och' rik'in jutz' che'. Tz'aqal xkutb'al linjutz' che' junsutaq ajwi'”, chan.

⁹ Ab'an laj David kixye re laj Abisay: “Maakamsi. Maajun li tixtaqsi li ruq' sa' xb'een li awab'ej sik'b'il ru xb'aan li Qaawa' taakanaaq chi ink'a' ta tixtoj rix li xmaak”.

¹⁰ Ut kixye wi' chik: “Sa' xk'ab'a' li yo'yookil Yos ninye aawe naq a' li Qaawa' taak'ehoq re chi kamk. Naq taawulaq xkutankil li xkamik malaj naq yooq li yalok, laj Saúl taakamq.

¹¹ Li Qaawa' taxaq chikoloq we chi xtaqsinkil wuq' sa' xb'een li awab'ej yulb'il xb'aan. Anaqwan xok li jutz' che' li wank chi xjolom jo'wi' li xxarul li xha', ut yo'o”.

¹² Laj David kixxok li jutz' che' ut li xaar li wankeb' chi xjolom laj Saúl, ut koheb'. Maajun ki'ilok reheb', maa'ani kinawok re ut maajun ki'ajk ru. Sa warenaqeb' chixjunileb' xb'aan li Qaawa'.

¹³ Chirix chik a'an laj David kiq'axonk junpak'al li ru taq'a ut koxk'e rib' sa' xb'een li tzuul, najt rik'in laj Saúl.

¹⁴ Toja' naq kixjap re chi xyeeb'al re laj Abner, ralal laj Ner, jo'wi' reheb' laj puub': “Ma ink'a' nikinaachaq'b'e, a Abner?”. Kisumeek: “Anihat laa'at naq nakajap chaq aawe sa' xb'een li awab'ej?”.

¹⁵ Kixye laj David re laj Abner: “Ma maawa' tab'i' laa'at li q'axal kaw aawib' chi yalok sa' xyanqeb' laj Israel? K'a'ut naq ink'a' xak'aak'ale li awab'ej, laj eechal aawe? Xb'aan naq jun reheb' li tenamit x'ok aran re raj xkamsinkil li awab'ej, laj eechal aawe.

¹⁶ Moko us ta li xab'aanu. Sa' xk'ab'a' li yo'yookil Yos ninye eere naq teneb'anb'il li kamk sa' eeb'een xb'aan naq ink'a' xek'aak'ale laj eechal eere, a' li awab'ej sik'b'il ru xb'aan li Qaawa'. K'e reetal, b'ar wank anaqwan li xjutz' che' li awab'ej ut li xna'aj li xha' li xwank chi xjolom?”.

¹⁷ Naq laj Saúl kirab'i a'an, kixnaw naq a'an xyaab' xkux laj David ut kixpatz' re: “A David, at walal, ma ink'a' tab'i' laa'at li yookat chi waatinankil?”, chan. Kichaq'ok laj David: “At awab'ej, at aj eechal we, yaal li xaye. Laa'inin”, chan.

¹⁸ Ut kixye wi' chik: “K'a'ut naq laj eechal we yo chi xxikb'al wilb'al? K'aru xinmaakon laa'in laamoos, k'aru li ink'a' us xinb'aanu aawe?

¹⁹ At awab'ej, chakuy inmaak, chawab'i li raatin laamoos anaqwan. Wi a' li Qaawa' yo chi taqlank aawe chi xxikb'al wilb'al, chiq'unob'resiiq xch'ool rik'in mayej. Ab'an wi yal winq xe'yehok naq taab'aanu rahilal we, majewanb'ilaqeb' taxaq xb'aan li Qaawa', xb'aan naq xine'risi anaqwan sa' li ch'och' a'in reechanihom li Qaawa', re naq tinloq'oni eb' li jalanil yos.

²⁰ Laa'in ink'a' nawaj kamk chi najt rik'in li Qaawa', sa' jalan tenamit. K'a'ut naq li awab'ej re Israel x'elk chaq chinsik'b'al laa'in li jo'kin jun k'aq, jo' nasik'e'k junaq k'ayay sa' pim?”.

²¹ Toja' naq laj Saúl kixye: “Xinmaakob'k. Sutq'in, a David, at walal. Ink'a' chik tinb'aanu rahilal aawe, xb'aan naq sa' li q'oqyink a'in jwal loq' xawil linyu'am. Xmajelal inna'leb' xinb'aanu wi' a'an; jwal nim linmaak”, chan.

²² Kichaq'ok laj David: “Waye' li xjutz' che' li awab'ej. Chichalq arin junaq laj k'anjel chi xxokb'al.

²³ Li Qaawa' taaq'ajkamunq re li junjunq jo' chanru li xtiikilal ut xchaab'ilal li xch'ool. Anaqwan li Qaawa' xatxq'axtesi sa' wuq', ab'an laa'in ink'a' xwaj aakamsinkil, xb'aan naq laa'at sik'b'il aawu xb'aan li Qaawa'.

²⁴ Jo' naq numtajenaq loq' xwil laayu'am anaqwan, jo'kanaq ajwi' xnimal xloq'al linyu'am chiru li Qaawa', ut tixkol taxaq chiru chixjunil li rahilal”.

²⁵ Toja' naq laj Saúl kixye re: “Osob'tesinb'ilat, a David, at walal! Us tat-elq sa' chixjunil li taab'aanu”, chan. Chirix chik a'an laj Saúl kisutq'iik sa' rochoch ut laj David kixchap wi' chik xb'e.