1 Samuel 25 - Q'eqchi Bible

Xkamik laj Samuel

¹ Naq laj Samuel kikamk, chixjunileb' laj Israel ke'xch'utub' rib' re xyaab'ankil ut ke'xmuq sa' li xch'och', aran Ramá.

Laj David ut lix Abigahil

² Kiwank Mahón jun li winq jwal b'ihom, li wank xch'och' sa' li tenamit Karmeel. Lajeek'aal xwaqxaq o'q'ob' (3,000) chi karneer ut lajeek'aal rox o'q'ob' (1,000) chi chib'aat wank re. Sa' jun kutan yo chi xb'esb'al rixeb' li xkarneer aran Karmeel.

³ Li winq a'an aj Nabal xk'ab'a', ut li rixaqil x'Abigahil xk'ab'a'. Li ixq wank xna'leb' ut xchaq'al ru na'ilok, ab'an li xb'eelom josq' ut ink'a' us xna'leb', xkomoneb' laj Kaleb.

⁴ Naq laj David kirab'i resil sa' li chaqich'och' naq laj Nabal yo chi xb'esb'al rixeb' li xkarneer,

⁵ kixtaqla lajeeb' chi saaj winq rik'in ut kixye reheb': “Ayuqex Karmeel wan wi' laj Nabal, chek'e xsahil li xch'ool sa' ink'ab'a'

⁶ ut teeye re: «Sahaq taxaq aach'ool, sahaq taxaq xch'ooleb' li wankeb' sa' laajunkab'al jo'wi' li k'aru wank aawe.

⁷ Xwab'i resil naq yookat chi xb'esb'al rixeb' laakarneer. Laa'at ajwi' nakanaw naq eb' laj k'aak'alenel re laaketomq xe'wank sa' qayanq Karmeel ut, jo' najtil li xwanjikeb' sa' qayanq, maajun wa xe'qach'i'ch'i'i chi moko xqelq'a k'a'aq re ru reheb'.

⁸ Patz' reheb' laamoos ut eb' a'an te'xch'olob' chawu. Jo'kan naq nintz'aama usilal chawu naq taak'uleb' sa' usilal eb' lintaql a'in xb'aan naq sa' xkutankil li sahil ch'oolej xoochalk. Taak'e reheb' jo'wi' we laa'in, laj k'anjel chawu, jo'ch'inal truuq taak'e»”.

⁹ Naq eb' li xtaql laj David ke'wulak rik'in laj Nabal, ke'xye chixjunil li kiyehe'k reheb' xb'aan laj David, ut ke'oyb'enink.

¹⁰ Ab'an laj Nabal kixsumeheb': “Ani laj David? Ani li ralal laj Jesé? Sa'eb' li kutan a'in numtajenaqeb' laj mun li yookeb' chi elelik chiruheb' laj eechal reheb'!

¹¹ Ma tinchap tab'i' linwa linha' jo'wi' li tib' li xink'uub' cho'q reheb' laj b'esol rix karneer ut tink'e ta reheb' winq li ink'a' ninnaw b'ar chalenaqeb' chaq?”, chan.

¹² Eb' li saaj winq taqlanb'ileb' xb'aan laj David ke'sutq'iik wi' chik, ut naq ke'wulak rik'in laj David, ke'xseeraq'i re li xsumehom laj Nabal.

¹³ Toja' naq laj David kixye reheb' li wankeb' rochb'een: “Chapomaq leech'iich' chejunjunqal”, chan. Chixjunileb' ke'xb'ak' li xch'iich'eb' chi xsa'eb'. Laj David ajwi' kixb'ak' li xch'iich' chi xsa'. Jun o'q'ob' (400) tana chi winq koheb' chirix laj David ut lajeek'aal (200) ke'kanaak aran chi ilok li k'aruheb' re.

¹⁴ Ab'anan jun reheb' laj k'anjel koxye re lix Abigahil, rixaqil laj Nabal: “Ma xawab'i naq laj David xtaqlaheb' chaq aj esil toj sa' li chaqich'och' re xk'eeb'al xsahil xch'ool laj eechal qe, ab'an a'in ink'a' xk'uleb' sa' usilal.

¹⁵ Eb' li winq a'an q'axal chaab'ileb' qik'in naq xoowank chaq rik'ineb' sa' k'aleb'aal: maajun wa xe'ch'i'ch'i'in qe chi moko wank k'aru xe'relq'a qe.

¹⁶ Eb' a'an tz'aqal xe'kolok qe chi q'eq chi kutan jo' najtil li qawanjik rik'ineb' re ilok ketomq.

¹⁷ K'e reetal ut k'oxla rix chi us k'aru taab'aanu, xb'aan naq ch'olch'o naq rahilal taachalq sa' xb'een laj eechal qe jo'wi' sa' xb'een chixjunil li xjunkab'al. Laab'eelom a'an jun li winq jwal jip, maak'a' naru taaye re”.

¹⁸ Tikto lix Abigahil kixchap lajeek'aal (200) chi wa ut wiib' kuk tz'uum, oob' chi karneer ak pomb'ileb', oob' chi aroow chi joranb'il triiw, o'k'aal chiil chi uub' ak xchaqik ut lajeek'aal chi kaxlan wa yiib'anb'ileb' rik'in chaqi iig, kixk'e chixjunil a'in chirixeb' li xb'uur

¹⁹ ut kixye reheb' laj k'anjel chiru: “Ayuqex chi uub'ej ut laa'in tinxik moqon”, chan. Ab'anan maak'a' kixye re laj Nabal li xb'eelom.

²⁰ Naq yo chaq chi kub'eek sa' li tzuul, chi muqmu, chirix li xb'uur, laj David ut eb' li rochb'een yookeb' ajwi' chi kub'eek sa' xjayaleb'. Sa' junpaat lix Abigahil koxk'ul rib' rik'ineb'.

²¹ Laj David yo chi xyeeb'al sa' xch'ool: “Maak'a' rajb'al naq sa' li chaqich'och' xinkol rix chixjunil li k'aru wank re li winq a'in re naq maak'a' taamajelo'q re. Maa'usilal yookin chi xk'ulb'al cho'q reeqaj li usilal!

²² A' taxaq li Yos tinxk'e chi xtojb'al linmaak chi q'axal ra, wi toj yo'yooqeb' li xkomoneb' laj Nabal wulaj naq taasaqewq”, chan.

²³ Ka'ajwi' kiril laj David, lix Abigahil kixseeb'a rib' chi kub'eek chirix li xb'uur, kixkut rib' chi roq,

²⁴ kixk'utzub' rib' chiru ch'och' ut kixye re: “Wa'chin, chikanaaq ta sa' inb'een li xmaak linb'eelom. Ab'anan tinaakanab' chi aatinak aawik'in ut ab'i taxaq li k'aru tinye aawe.

²⁵ Nintz'aama chawu naq ink'a' taak'e sa' aach'ool li xyehom laj Nabal: a'an jun li winq ink'a' us xna'leb'. Aj Nabal ke'xk'e cho'q xk'ab'a', ut relik chi yaal naq a'an mem. Chakuy inmaak, laa'in aj k'anjel chawu, ink'a' xwileb' ru li winq li xataqlaheb' qik'in.

²⁶ Ab'anan anaqwan, wa'chin, sa' xk'ab'a' li yo'yookil Yos ut laayu'am, sa' xk'ab'a' li Qaawa' li xramok chawu xkamsinkileb' li poyanam a'in jo'wi' xraqb'al aatin aajunes aawib', jo'qeb' laj Nabal chixjunileb' li xik' neke'ilok aawe jo'wi' li te'raj xb'aanunkil rahilal aawe.

²⁷ Chak'ul laamaatan li xink'am chaq ut chajek'i reheb' li saaj winq li neke'ochb'eenink aawe.

²⁸ Chakuy taxaq inmaak. Relik chi yaal naq li Qaawa' tixxaqab' chi junajwa xwankil laajunkab'al, xb'aan naq laa'at nakatyalok sa' xk'ab'a' li Qaawa', ut maajun wa taachalq li ink'a' us sa' aab'een chiru chixjunil laayu'am.

²⁹ Us ta wanq ani taasik'oq aawe re aarahob'tesinkil ut aakamsinkil, ab'anan li Qaawa' laaYos taakoloq aawe: tixkol laayu'am rub'el li xkupuhom, ut li xyu'ameb' li xik' neke'ilok aawe tixkut chi najt jo' rik'in junaq jok'.

³⁰ Naq akaq xb'aanu li Yos chixjunil li kixyeechi'i aawe ut naq akaq xatxxaqab' cho'q aj k'amol xb'eheb' laj Israel,

³¹ ink'a' taaraho'q chi moko taayot'e'q aach'ool rik'in naq xakamsiheb' li maak'a'eb' xmaak malaj xatraqok ta aatin aajunes aawib'. Ut naq akaq xrusila aawu li Qaawa', chinjultiko'q taxaq aawe, laa'in aj k'anjel chawu”.

³² Toja' naq laj David kixye re lix Abigahil: “Usilaatinanb'il taxaq li Qaawa', xYos laj Israel, li xtaqlank chaq aawe chink'ulb'al anaqwan.

³³ Osob'tesinb'ilat taxaq laa'at li rik'in laak'a'uxl xaram chiwu xkamsinkileb' poyanam jo'wi' xraqb'al aatin injunes wib'.

³⁴ Relik chi yaal, sa' xk'ab'a' li yo'yookil Yos, xYos laj Israel, li xramok chiwu xb'aanunkil rahilal aawe, ninye aawe naq, wi ink'a' ta xatseeb'ank chaq chi chalk, wulaj eq'la maajun raj chik teelom xkanaak chi yo'yo sa' li xjunkab'al laj Nabal”, chan.

³⁵ Chirix chik a'an laj David kixk'ul sa' ruq' lix Abigahil li k'aru kixk'am chaq, ut kixye re: “Anaqwan ayu sa' laawochoch chi maak'a'aq aak'a'uxl. K'e reetal, xwab'i li k'aru xaye ut tinb'aanu li xatz'aama chiwu”.

³⁶ Naq lix Abigahil kiwulak sa' rochoch, kixtaw li xb'eelom chi ninq'ehik: k'ajo' li sahil ch'oolej aran, jo' li na'uxmank sa' xninq'e junaq awab'ej. Sa sa' xch'ool laj Nabal ut taakalaaq; jo'kan naq maak'a' kiyehe'k re toj sa' li kutan jun chik.

³⁷ Wulajaq chik a'an, eq'la, naq ak xnume'k xkalajik laj Nabal, li rixaqil kixseeraq'i re li k'aru kik'ulmank. Kisachk xch'ool li winq chi rab'inkil a'an ut kikanaak chanchan pek.

³⁸ Lajeeb'aq kutan tana chik a'an, li Qaawa' kixtiq' laj Nabal, ut a'in kikamk.

³⁹ Naq laj David kirab'i resil li xkamik laj Nabal, kixye: “Usilaatinanb'il taxaq li Qaawa' li xtenq'ank we naq xinhob'e'k xb'aan laj Nabal. Li Yos xkolok we chiru xb'aanunkil li ink'a' us ut xk'e reeqaj li xmaa'usilal laj Nabal”. Moqon chik laj David kixtaqlaheb' aj esil chi xyeeb'al re lix Abigahil ma traj wank cho'q rixaqil.

⁴⁰ Ut naq eb' li xtaql ke'wulak Karmeel sa' rochoch lix Abigahil, ke'aatinak rik'in ut ke'xye re: “Laj David xooxtaqla chaq aawik'in re aatz'aamankil cho'q aawixaqil”, chankeb'.

⁴¹ Naq kirab'i a'an, lix Abigahil kixk'utzub' rib' chiru ch'och' ut kixye: “We'kin laa'in xmoos laj David. Yo'oon wankin chi xch'ajb'al roqeb' eb' laj k'anjel chiru, wi jo'kan naraj naq tinb'aanu”.

⁴² Tikto kixaqliik, kitaqe'k chirix li xb'uur ut, rochb'een oob' chi xmoos ixq, koho chirixeb' li xtaql laj David, ut kikanaak cho'q rixaqil.

⁴³ Ak sumsu laj David rik'in lix Ajinohán aj Jisrehel, ut xkab'ichaleb' ke'wank cho'q rixaqil.

⁴⁴ Laj Saúl ak xk'ehom lix Mikal li xrab'in, rixaqil laj David, cho'q rixaqil laj Paltí aj Galín, ralal laj Layis.