1 Samuel 19 - Q'eqchi Bible

Laj Saúl kixyal wi' chik xkamsinkil laj David

¹ Laj Saúl kixye re laj Jonatán ut reheb' chixjunileb' laj k'anjel chiru naq te'xkamsi laj David. Ab'an laj Jonatán, ralal laj Saúl, q'axal naxra laj David

² ut kixye re: “Laj Saúl linyuwa' yo chasik'b'al re aakamsinkil. Jo'kan naq wulaj eq'la yo'oon wanqat: chasik' junaq na'ajej b'arwi' maajun tatril, ut toxaamuq aawib' aran.

³ Laa'in tinxik wochb'een linyuwa' sa' li k'aleb'aal, nach' wanqat wi'. Tin'aatinaq chawix chiru linyuwa' ut tolinye aawe k'aru xookanaak wi'”, chan.

⁴ Ut laj Jonatán ki'aatinak chirix laj David chiru laj Saúl li xyuwa'; kixye re: “At awab'ej, matmaakob'k rik'in xb'aanunkil li ink'a' us re laj David laj k'anjel chawu, xb'aan naq a'an ink'a' xmaakob'k chawu, xb'aanu b'an naab'al li us re aatenq'ankil.

⁵ Ink'a' xra li xyu'am ut xkamsi laj Filistea. Chi jo'kan li Qaawa' xk'e chixjunileb' laj Israel chi q'axok u. Laa'at aawilom ut xsaho'k sa' laach'ool. K'a'ut naq taawaj maakob'k chiru li maak'a' xmaak? K'a'ut naq taawaj xkamsinkil laj David chi maak'a' xyaalal?”.

⁶ Naq laj Saúl kirab'i li raatin laj Jonatán, kixye sa' jurament: “Sa' xk'ab'a' li yo'yookil Yos ink'a' taakamq laj David”, chan.

⁷ Toja' naq laj Jonatán kixb'oq laj David ut kixseeraq'i re chixjunil li aatin a'in. Chirix a'an kixk'am laj David rik'in laj Saúl, ut a'an kixtikib' wi' chik k'anjelak chiru li awab'ej jo' junxil.

⁸ Moqon chik a'an kitiklaak wi' chik li yalok rik'ineb' laj Filistea, ut laj David koho ut kixq'axeb' ru, toj reetal ke'elelik chixjunileb'.

⁹ Ab'an sa' jun kutan laj Saúl ki'eechaniik wi' chik xb'aan li ink'a' usil musiq'ej taqlanb'il xb'aan li Qaawa'. Naq chunchu sa' rochoch ut wank xjutz' che' sa' ruq',

¹⁰ kiraj raj xt'ojb'al laj David chiru tz'ak naq yo chi wajb'ak, ab'an laj David kixkol rib' chiru laj Saúl, ut li jutz' che' kixt'oj rib' sa' li tz'ak. Sa' ajwi' li q'oqyink a'an ki'elelik laj David ut koxmuq rib'.

¹¹ Tikto laj Saúl kixtaqlaheb' winq chi xk'aak'alenkil laj David sa' rochoch re raj naq eq'la tixkamsi, ab'anan lix Mikal li rixaqil kixye re laj David: “Wi ink'a' toxaakol aawib' sa' ajwi' li q'oqyink a'in, wulak tatkamq”.

¹² Tikto lix Mikal kixkub'si laj David sa' li b'entaan, ut a'in koho re naq tixkol rib'.

¹³ Chirix chik a'an lix Mikal kixchap jun li yiib'anb'il yos ut kixk'e sa' li ch'aat; kixk'e li rix jun chib'aat sa' xjolom ut kixtz'ap rik'in jun li t'ikr.

¹⁴ Naq laj Saúl kixtaqlaheb' winq chi xchapb'al laj David, li ixq kixye: “Yaj laj David”, chan.

¹⁵ Ab'an laj Saúl kixtaqlaheb' wi' chik li xtaql chi xsik'b'al laj David: “K'amomaq chaq laj David sa' xch'aat, re naq tinkamsi”, chan reheb'.

¹⁶ Naq eb' li xtaql laj Saúl ke'ok sa' rochoch laj David, a' li yiib'anb'il yos ke'xtaw sa' li ch'aat, rochb'een li rix chib'aat chi xjolom.

¹⁷ Toja' naq laj Saúl kixye re lix Mikal: “K'a' naq xinaab'alaq'i ut xakanab' chi elelik li xik' na'ilok we?”. Kichaq'ok lix Mikal: “A'an xye we: «Kanab'in chi elelik malaj tatinkamsi»”, chan.

¹⁸ Jo'kan naq ki'elelik laj David ut kixkol rib'. Koho wan wi' laj Samuel aran Ramá ut kixseeraq'i re chixjunil li ki'uxk re xb'aan laj Saúl. Chirix chik a'an laj David ut laj Samuel koheb' chi wank aran Nayot.

¹⁹ Kiyehe'k resil re laj Saúl naq laj David wank aran Nayot, nach' rik'in Ramá.

²⁰ Tikto kixtaqlaheb' winq re xchapb'al laj David. Ab'an naq ke'wulak aran, ke'ril jun ch'uuteb' chi propeet chi aatinak jo' propeet, ut laj Samuel yo chi k'amok b'e chiruheb'. Toja' naq li xmusiq' li Yos kichalk sa' xb'eeneb' li xtaql laj Saúl ut eb' a'an ajwi' ke'ok chi aatinak jo' propeet.

²¹ Naq laj Saúl kixnaw a'an, kixtaqla jalaneb' chik li xtaql, ab'anan eb' a'an ajwi' ke'xtikib' aatinak jo' propeet. Ut laj Saúl kixtaqlaheb' wi' chik rox sut li xtaql; ut jo'kan wi' chik ke'xk'ul.

²² Toja' naq a'an ajwi' koho Ramá ut naq kiwulak wan wi' li nimla kumb' aran Sekú, kixpatz': “B'ar wankeb' laj Samuel ut laj David?”, chan. Ke'xsume: “Wankeb' Nayot, nach' rik'in Ramá”, chankeb'.

²³ Koho laj Saúl aran Nayot, nach' rik'in Ramá. Ab'an li xmusiq' li Yos ki'eechanink re, ut laj Saúl kikanaak rub'el xwankil toj reetal kiwulak Nayot, nach' rik'in Ramá.

²⁴ Aran kirisi li raq' ut kixk'ut rib' chiru laj Samuel chi eechaninb'il xb'aan xmusiq' propeet. Ut kikanaak chi t'ust'u chiru ch'och' chiru chixjunil li kutan ut q'oqyink a'an. Jo'kan naq chalen sa' li kutan a'an nayeemank: “Ma xkomoneb' li propeet laj Saúl?”.