1 Samuel 15 - Q'eqchi Bible

Li Qaawa' ink'a' chik kixk'ul ru laj Saúl

¹ Sa' jun kutan kixye laj Samuel re laj Saúl: “Li Qaawa' xinxtaqla chaq re aaxaqab'ankil cho'q awab'ej re Israel li xtenamit. Jo'kan b'i', ab'i li raatin li Qaawa'.

² A'in naxye li Nimajwal Yos: «Ak xink'uub' xrahob'tesinkileb' laj Amalek jo' reeqaj li ke'xb'aanu reheb' laj Israel: eb' a'an ke'xram xb'e lintenamit naq yookeb' chaq chi taqe'k Ejiipt.

³ Ayu anaqwan ut rahob'tesiheb' laj Amalek. Chaq'axtesiheb' chi oso'k rochb'eeneb' chixjunil li reechanihomeb'. Maawil xtoq'ob'aal ruheb', chakamsi b'an chixjunileb', jo' winq ut ixq, eb' li kok'al ut eb' li k'uula'al, eb' li b'ooyx ut eb' li karneer, eb' li kameey ut eb' li b'uur»”.

⁴ Tikto laj Saúl kixch'utub'eb' li tenamit ut kirajlaheb' aran Telán: lajeek'aal mil (200,000) chi winq li neke'xik yal chi roqeb' ut lajeeb' mil (10,000) chi winq aj Judá.

⁵ Chirix chik a'an koho toj sa' xtenamiteb' laj Amalek, koxmuq rib' sa' li taq'a

⁶ ut kixye reheb' laj Ken: “Elenqex, jek'omaq eerib' rik'ineb' laj Amalek, re naq ink'a' texinsach rochb'eeneb' a'an, xb'aan naq usilal xeb'aanu reheb' chixjunil laj Israel naq yookeb' chaq chi taqe'k Ejiipt”, chan. Ut eb' laj Ken ke'elk sa' xyanqeb' laj Amalek.

⁷ Toja' naq laj Saúl kixsacheb' laj Amalek, chalen chaq Abilá toj Sur, li wank sa' xnub'ajlil Ejiipt.

⁸ Kixchap chi yo'yo laj Agag, awab'ej re Amalek, ut kixkamsiheb' chi ch'iich' li poyanam, tik ke'oso'k chixjunileb'.

⁹ Ab'anan laj Saúl ut eb' laj puub' ink'a' ke'xkamsi laj Agag ut li xchaab'ilal eb' li xkarneer, chi moko li wakax ninqeb' xtib'el, eb' li xchib'aat ut li k'aru terto xtz'aq. Ink'a' ke'raj xq'axtesinkil chi oso'k. Ka'ajwi' li k'aru tz'eqtaananb'il ut maak'a' na'ok wi' ke'xq'axtesi chi sache'k.

¹⁰ Chirix chik a'an li Qaawa' kiraatina laj Samuel ut kixye:

¹¹ “Ink'a' sa sa' inch'ool rik'in laj Saúl. Ink'a' raj xinxaqab' cho'q awab'ej, xb'aan naq ink'a' xtaaqe linb'e chi moko xpaab' lintaqlahom”, chan. Kiraho'k xch'ool laj Samuel ut kixnumsi li q'oqyink a'an chi tijok chiru li Qaawa'.

¹² Eq'la sa' li kutan jun chik kiwakliik re xik chi xk'ulb'al laj Saúl, ab'anan ke'xye re: “X'elk chik laj Saúl, xkoho Karmeel b'arwi' xxaqab' jun li eetalil pek re naq taapatz'e'q xk'ab'a'. Ut chirix a'an xkoho Kilkal”.

¹³ Toja' naq laj Samuel koho wan wi' laj Saúl, ut a'in kixye re: “Li Qaawa' chi'osob'tesinq taxaq aawe. Ak xinb'aanu li xinxtaqla wi' li Qaawa'”.

¹⁴ Ab'an laj Samuel kixpatz' re: “Chan put ru naq yookin chi rab'inkileb' li karneer neke'me'lok ut eb' li wakax neke'muub'ak?”, chan.

¹⁵ Kichaq'ok laj Saúl: “Rik'ineb' laj Amalek xqak'ameb' chaq, xb'aan naq li tenamit ink'a' xe'xkamsi li ninqi karneer ut wakax, re xmayejankileb' chiru li Qaawa' laaYos. Ut li junch'ol chik xqaq'axtesi chi sache'k”, chan laj Saúl.

¹⁶ “Tz'aqal li xaye -chan laj Samuel-. Ab'i li k'aru xk'ut chiwu li Qaawa' ewer chi q'eq”. Kichaq'ok laj Saúl: “Us, aatinan”, chan.

¹⁷ Toja' naq laj Salomón kixye: “Us ta nakak'oxla naq kach'in laawankil, ab'anan ma ink'a' tab'i' xaqab'anb'ilat cho'q xjolomil chixjunileb' li xteepal laj Israel? Li Qaawa' xyuluk aawe cho'q awab'ej re Israel.

¹⁸ Jo'kan utan, wi li Yos xatxtaqla chi yalok ut xye aawe naq tento xsachb'aleb' ru laj Amalek toj reetal te'oso'q chi junajwa, xb'aan naq aj maakeb',

¹⁹ k'a'ut naq ink'a' xapaab' li Qaawa'? K'a'ut naq xachap li k'aru reheb' laj Amalek ut xab'aanu li ink'a' nawulak chiru li Qaawa'?”.

²⁰ Laj Saúl kixsume laj Samuel: “Laa'in xinpaab' li xtaqlahom li Qaawa'. Xinb'aanu li xinxchaq'rab'i wi': xink'am chaq laj Agag, awab'ej re Amalek, ut xinq'axtesiheb' laj Amalek re sache'k.

²¹ Ab'anan eb' li tenamit xe'xchapeb' li karneer ut li wakax, a' li xchaab'ilal li k'aru ak q'axtesinb'il re sache'k, ut xe'xk'ameb' chaq re xmayejankil chiru li Qaawa' laaYos, aran Kilkal”.

²² Toja' naq kixye laj Samuel: “Ma rik'in tab'i' k'atb'il mayej ut eeyeechi'om nak'ojlaak xch'ool li Qaawa'? Malaj a' li xpaab'ankil li raatin a'an li q'axal nawulak chiru? Jwal us paab'ank chiru mayejak, jwal loq' ab'ink chiru li xxeeb'ul li karneer.

²³ Li xq'etb'al li xchaq'rab' li Yos, a'an maak kama' li q'ehink; ut li xtz'eqtaanankil li raatin li Qaawa', a'an ajwi' maak kama' li loq'onink chiru li jalanil yos. Jo' laa'at xatz'eqtaana li raatin li Qaawa', jo'kan ajwi' tatxtz'eqtaana A'an anaqwan, re naq ink'a' chik tat-awab'ejinq”.

²⁴ Toja' naq laj Saúl kixye re laj Samuel: “Xinmaakob'k, xinq'et xchaq'rab' li Qaawa' jo' ajwi' laawaatin, xb'aan naq xinxiwak chiru li tenamit ut xinb'aanu li xe'xye we.

²⁵ Chakuy inmaak, nintz'aama chawu naq tatxik chiwix re xloq'oninkil li Qaawa'”, chan laj Saúl.

²⁶ Ab'an laj Samuel kixsume: “Ink'a' tinxik chawix. Laa'at xatz'eqtaana li raatin li Qaawa', jo'kan naq tz'eqtaananb'ilat anaqwan xb'aan li Qaawa' re naq ink'a' chik tat-awab'ejinq sa' xb'eeneb' laj Israel”.

²⁷ Ut laj Samuel kixsutq'isi rib' re taaxik, ab'an laj Saúl kixchap li raq' ut a'in kiq'iche'k.

²⁸ Toja' naq kixye laj Samuel: “Jo'kan ajwi' li Qaawa' xmaq' chawu laawankil sa' xb'eeneb' laj Israel sa' li kutan a'in, ut xq'axtesi re jalan chik q'axal chaab'il chawu laa'at.

²⁹ Li Qaawa' a'an li xloq'al eb' laj Israel, ut ink'a' natik'ti'ik chi moko nawiib'ank xch'ool, xb'aan naq maawa' yal winq re naq tixjal xk'a'uxl”.

³⁰ Kichaq'ok laj Saúl ut kixye: “Xinmaakob'k, ab'an nintz'aama usilal chawu: k'e inloq'al cho'q awab'ej chiruheb' li xcheekal winqul lintenamit ut chiruheb' chixjunil laj Israel. Kim chiwix chi xloq'oninkil li Qaawa' laaYos”.

³¹ Toja' naq laj Samuel kisutq'iik chirix laj Saúl, ut a'in koxloq'oni ru li Qaawa'.

³² Chirix chik a'an kixye laj Samuel: “K'amomaq chaq laj Agag, awab'ej re Amalek”. Ut laj Agag kixk'ut rib' chiru laj Samuel chi sa sa' xch'ool, yo chi xyeeb'al: “Relik chi yaal naq ink'a' chik tine'xkamsi”, chan.

³³ A'ut laj Samuel kixye re: “Rik'in laach'iich' xakanab'eb' naab'al chi na'b'ej chi maak'a'eb' chik xkok'al. Jo'kanaq ajwi' laana', taakanaaq chi maak'a' chik li xyum”, chan. Tikto kixseti laj Agag chiru li Qaawa' aran Kilkal.

³⁴ Chirix chik a'an laj Samuel koho Ramá ut laj Saúl kisutq'iik sa' li rochoch aran Kibehá, sa' li xna'aj.

³⁵ Laj Samuel ink'a' chik kiril ru laj Saúl chiru chixjunil li xyu'am. Nayaab'ak laj Samuel chirix laj Saúl xb'aan naq ra chik sa' xch'ool li Qaawa' naq kixxaqab' laj Saúl cho'q awab'ej re Israel.