Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Samuel 14 - Q'eqchi Bible


Laj Jonatán ut eb' laj Filistea

1 Sa' jun kutan laj Jonatán, ralal laj Saúl, kixye re laj tenq' re: “Kim, yo'o toj wankeb' wi' jun ch'ina ch'uuteb' aj puub' aj Filistea, toj junpak'al li nima'”, chan. Ab'anan maak'a' kixye re li xyuwa'.

2 Laj Saúl wan chaq sa' xnub'ajlil Kibehá, rub'el jun toon chi granaad li wank chi xk'atq Mikrón, rochb'eeneb' lajeek'aal xkab' o'q'ob' (600) chi winq

3 (laj tij li wank li efod chirix, a'an aj Ajías, ralal laj Ajitub, riitz'in laj Ikabod, ralal laj Pinjás, ralal laj Elí, laj tij chiru li Qaawa' aran Siló). Eb' laj puub' ink'a' ke'xk'e reetal naq xikenaq laj Jonatán.

4 A'in traj wulak wankeb' wi' jun ch'ina ch'uuteb' aj puub' aj Filistea ut tento taanume'q sa' jun li na'ajej wank ninqi saqoonak chi xka'pak'alil. Li jun Boses xk'ab'a', ut li saqoonak jun chik Sené naxk'ab'a'in.

5 Li xb'een wank sa' xjayal releb'l iq', sa' xka'yab'aal Mikmás, ut li xkab' wank sa' xjayal rokeb'l iq', sa' xka'yab'aal Kibehá.

6 Kixye laj Jonatán re laj tenq' re: “Kim, q'axonqo junpak'al, b'arwi' wankeb' laj puub' li ink'a' neke'xpaab' li Yos. Mare chan naq li Qaawa' tooxtenq'a, xb'aan naq moko ch'a'aj ta chiru li Qaawa' qak'eeb'al chi q'axok u, us ta ink'a' naab'alo”.

7 Kichaq'ok laj tenq' re: “B'aanu li k'aru naxye laach'ool. Yo'o, laa'in tatintenq'a”, chan.

8 Toja' laj Jonatán kixye: “Numenqo junpak'al, wankeb' wi' li winq a'an, ut tqak'e qib' chirileb'.

9 Wi te'xye qe: «Xaqlinqex aran toj reetal toowulaq wankex wi'», laa'o tookanaaq sa' li na'ajej a'an ut ink'a' tooxik wankeb' wi'.

10 Ab'anan wi te'xye qe: «Taqenqex chaq arin», laa'o tootaqe'q, xb'aan naq a'an reetalil chiqu naq li Qaawa' tixq'axtesiheb' sa' quq'”.

11 Jo'kan naq ke'xk'e rib' chi ile'k xkab'ichaleb' xb'aaneb' laj puub' aj Filistea, ut eb' a'an ke'xye: “K'ehomaq reetal! Eb' laj Hebreo yookeb' chaq chi elk sa'eb' li ochoch pek b'arwi' xe'xmuq rib'eb'”.

12 Tikto ke'xjap reheb' chi xyeeb'al re laj Jonatán ut laj tenq' re: “Kimqex qik'in. Wank k'aru tqaye eere”. Toja' naq laj Jonatán kixye re laj tenq' re: “Taaqehin, xb'aan naq li Qaawa' ak xq'axtesiheb' sa' ruq'eb' laj Israel”.

13 Kitaqe'k laj Jonatán chi k'achlenb'il, ut chirix yo laj tenq' re. Neke't'anlok eb' laj Filistea chiru laj Jonatán, ut tikto laj tenq' re naxchoy xkamsinkileb'.

14 Sa' li xb'een q'axok u a'in, laj Jonatán ut laj tenq' re ke'xkamsiheb' junmay chi winq sa' li ch'ina na'ajej a'an.

15 Ke'ok xxiw jo'k'ihaleb' li wankeb' sa' xmuheb'aaleb' ut sa' k'aleb'aal, jo'wi' chixjunileb' li poyanam. Ke'xiwak ajwi' eb' laj puub' li yookeb' chi k'aak'alenk ut eb' laj k'ehol eetal. Kixhich'le rib' li ruuchich'och' ut k'ajo' naq ke'xiwak chixjunileb'!

16 Eb' laj k'aak'alenel re laj Saúl li wankeb' Kibehá re Benjamín ke'ril li xk'ihaleb' laj Filistea yookeb' chi elelik yalaq b'ar.

17 Toja' naq laj Saúl kixye reheb' laj puub' li wankeb' rochb'een: “Ch'utub'omaq chixjunileb' laj puub' ut ilomaq ani x'elk sa' qayanq”. Naq ke'xch'utub'eb' laj puub', ke'xk'e reetal naq maa'aniheb' laj Jonatán ut laj tenq' re.

18 Toja' naq laj Saúl kixye re laj Ajías: “K'am chaq li x'efod li Qaawa'”, xb'aan naq sa'eb' li kutan a'an li x'efod li Qaawa' wank rik'ineb' laj Israel.

19 Ab'anan naq laj Saúl yo chi raatinankil laj tij, yo ajwi' chi numtaak li poqoqij ib' sa' xna'ajeb' laj Filistea. Jo'kan naq laj Saúl kixye re laj tij: “Kanab' wan”.

20 Tikto laj Saúl ut chixjunileb' laj puub' li wankeb' rochb'een ke'xch'utub' rib'eb' ut koheb' chi yalok. K'ajo' li poqoqij ib' sa' xyanqeb' laj Filistea: yookeb' chi xkamsinkil rib' chirib'ileb' rib' xb'aan naq sachsookeb' xna'leb'!

21 Ut eb' laj Hebreo li junxil okenaqeb' sa' xyanqeb' laj Filistea chi k'anjelak chiruheb' ut anaqwan rochb'eeneb' chi yalok, ke'xjal xk'a'uxeb' ut ke'okenk chirixeb' laj Israel li wankeb' rochb'een laj Saúl ut laj Jonatán.

22 Jo'kan ajwi' chixjunileb' laj Israel li muqmuukeb' chaq sa' xtzuulul Efraín, naq ke'xnaw naq yookeb' chi elelik laj Filistea, jun xikikeb' chi yalok rik'ineb' ut chi raanilasinkileb'.

23 Jo'ka'in naq li Qaawa' kixk'eheb' laj Israel chi q'axok u sa' li kutan a'an. Li yalok kiwulak toj junpak'al Bet-Jorón.


Li xjurament laj Saúl

24 Q'axal ra wankeb' laj Israel sa' li kutan a'an, xb'aan naq laj Saúl kixb'aanu li jurament a'in: “Tz'eqtaananb'ilaq li ani taawa'aq hoon naq toj maji' na'ok li q'oqyink, wi toj maji' nink'eheb' li xik' neke'ilok we chi xtojb'aleb' li xmaakeb'”. Jo'kan naq maajun reheb' li tenamit kiwa'ak.

25-27 Ut naq ke'wulak sa' jun k'iche' b'arwi' naab'al li xya'al kab', maa'ani kiyalok re xb'aan xxiweb' chiru li jurament. Ab'an laj Jonatán ink'a' rab'ihom li raatin li xyuwa' sa' xb'een li tenamit; jo'kan naq kixye' li ru'uj li xxuq', kixch'ik sa' li rochoch seer ut chirix a'an kixyal li xya'al kab' li wank sa' ruq'. Toja' naq kik'ulunk xch'ool.

28 Tikto jun reheb' li poyanam kixye re: “«Tz'eqtaananb'ilaq li ani taawa'aq hoon», chan laayuwa' reheb' li tenamit. Jo'kan naq tawasinb'ileb' chixjunileb'”.

29 Kichaq'ok laj Jonatán ut kixye: “Linyuwa' ink'a' us xb'aanu re li tenamit. Chek'e reetal chanru naq kawin chik anaqwan, yal xb'aan naq xinyal b'ayaq li xya'al kab'.

30 Wi ta eb' laj puub' xe'xtzeka anaqwan li k'aru xe'reechani rik'ineb' li xik' neke'ilok reheb', ma ink'a' numtajenaq raj chik li rahilal xe'xk'ul laj Filistea?”.

31 Sa' li kutan a'an ke'sache'k ru eb' laj Filistea, chalen chaq Mikmás toj Ayalón; ab'anan q'axal tawajenaqeb' laj Israel naq ke'raqe'k chi yalok.

32 Jo'kan naq ke'xkut rib'eb' sa' xb'een li k'a'aq re ru xe'reechani sa' li yalok, ke'xchap eb' li karneer, eb' li b'ooyx ut li saaj wakax, ke'xkamsiheb' chiru ch'och' ut ke'xtiw rochb'een li xkik'el.

33 Toja' naq kiyehe'k resil re laj Saúl naq eb' li tenamit yookeb' chi maakob'k chiru li Qaawa', xb'aan naq yookeb' chi xtiwb'al tib' rochb'een li xkik'el. Ut laj Saúl kixye: “Laa'ex xeq'et li raatin li Yos. Tolk'osihomaq chaq arin junaq nimla pek.

34 Jek'ihomaq eerib' sa' xyanqeb' li tenamit ut yehomaq reheb' naq li junjunq chixk'am chaq li xb'ooyx malaj xkarneer, re naq laa'ex teekamsiheb' ut teetiw chi ink'a' texmaakob'q chiru li Qaawa' rik'in xtzekankil li kik'”, chan. Sa' li q'oqyink a'an li junjunq kixk'am chaq li xb'ooyx, ut ke'xkamsi aran.

35 Ut laj Saúl kixyiib' jun li artal re li Qaawa'. A'an li xb'een artal li kixyiib' cho'q re li Yos.

36 Chirix chik a'an kixye: “Kub'eeqo chiru q'oqyink chi raanilasinkileb' laj Filistea. Tooyaloq rik'ineb' toj taasaqewq, re naq maajun chik reheb' taakanaaq chi yo'yo”, chan. Kisumeek: “B'aanu li nakak'oxla naq us”, chankeb'. Ab'an laj tij kixye: “Jiloqo arin chiru li Yos chi patz'ok”.

37 Ut laj Saúl kixpatz' re li Yos: “Ma tinkub'eeq chi raanilasinkileb' laj Filistea? Ma taaq'axtesiheb' sa' ruq'eb' laj Israel?”, chan. Ab'an li Yos ink'a' kixsume laj Saúl sa' li kutan a'an.

38 Jo'kan naq laj Saúl kixb'oqeb' chixjunileb' li xjolomil li tenamit ut kixye reheb': “Tz'ilomaq rix ut ilomaq ani xmaakob'k sa' li kutan a'in.

39 Sa' xk'ab'a' li yo'yookil Yos li xkolok re laj Israel, ninye eere naq li ani wank xmaak taakamq, us ta a'an laj Jonatán li walal”, chan. Maajun sa' xyanqeb' li tenamit kichaq'ok.

40 Jo'kan naq laj Saúl kixye reheb' chixjunil laj Israel: “K'ehomaq eerib' aran, ut laa'in wochb'een laj Jonatán li walal tqak'e qib' arin”. Ke'chaq'ok chixjunileb': “B'aanu li nakak'oxla naq us”, chankeb'.

41 Toja' naq laj Saúl kixye: “At Qaawa', xYos laj Israel, k'a'ut naq ink'a' nakasume laj k'anjel chawu sa' li kutan a'in? Wi laa'in wank inmaak malaj xmaakob'k laj Jonatán li walal, k'e Urim, at Qaawa', xYos laj Israel. Ab'anan wi laatenamit Israel wank xmaak, k'e Tumim”, chan naq kitijok. Ut naq ke'b'uulik, kik'utunk naq laj Saúl ut laj Jonatán wankeb' xmaak, ut eb' li tenamit ke'kanaak chi maak'a'eb' xmaak.

42 Chirix chik a'an kixye laj Saúl: “B'uulihomaq qix, laj Jonatán ut laa'in”. Ut kik'ute'k laj Jonatán.

43 Toja' naq laj Saúl kixye re laj Jonatán: “Ye we k'aru xab'aanu”. Kichaq'ok laj Jonatán: “Maak'a', ka'ajwi' xinyal b'a'b'ay li xya'al kab' chi ru'uj linxuq'. We'kin re kamk”, chan.

44 “A' taxaq li Yos tinxk'e chi xtojb'al linmaak chi q'axal ra, wi ink'a' tatkamq, a Jonatán!”, chan laj Saúl.

45 Ab'an eb' li tenamit ke'xye re laj Saúl: “Ma us naq taakamq laj Jonatán, a' li xkolok qe laa'o aj Israel? Maajoq'e taak'ulmanq a'an! Sa' xk'ab'a' li yo'yookil Yos naqaye naq maajun rismal li xjolom taat'ane'q sa' ch'och'. Li k'aru xb'aanu anaqwan, rik'in xtenq'aal li Yos xb'aanu”, chankeb'. Jo'ka'in naq eb' li tenamit ke'xkol laj Jonatán, ut ink'a' kikamk.

46 Laj Saúl kixkanab' raanilasinkileb' laj Filistea, ut eb' a'in koxe'xtaw li xtenamiteb'.

47 Naq laj Saúl kixaqab'aak cho'q awab'ej re Israel, kiyalok yalaq b'ar rik'ineb' li xik' neke'ilok re: rik'ineb' laj Mohab, laj Amón ut eb' laj Edom, rik'in li awab'ej re Sobá ut rik'ineb' laj Filistea. Yalaq b'ar naxik, naq'axok chaq u.

48 Kixk'ut li xkawilal li xch'ool naq kixsach ruheb' laj Amalek ut kixkoleb' laj Israel sa' ruq'eb' li neke'elq'ank reheb'.

49 A'aneb' a'in li ralal laj Saúl: laj Jonatán, laj Isió ut laj Malkisúa. Li xk'ab'a'eb' li wiib' xrab'in a'aneb' a'in: li chaq'na'b'ej, xMerab xk'ab'a', ut li iitz'inb'ej, xMikal xk'ab'a'.

50 Li rixaqil laj Saúl, a'an lix Ajinohán, xrab'in laj Ajimás. Li xjolomileb' laj puub', a'an laj Abner, ralal laj Ner, rikan laj Saúl.

51 Laj Kis, xyuwa' laj Saúl, ut laj Ner, xyuwa' laj Abner, a'aneb' li ralal laj Abiel.

52 Jo' najtil kiyo'yook laj Saúl, kaw kiyalok rik'ineb' laj Filistea. Ut naq naril junaq winq kaw rib' ut yo'oon chi yalok, naxb'oq chaq ut naxk'e sa' xyanqeb' laj puub'.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ