1 Samuel 10 - Q'eqchi Bible

Laj Saúl yulb'il cho'q awab'ej re Israel

¹ Toja' naq laj Samuel kixchap li xukub' xna'aj li aseeyt ut kixhoy sa' xjolom laj Saúl. Kirutz' ru ut kixye re: “A' li Qaawa' xyuluk aawe cho'q xjolomil Israel li xtenamit. Laa'at tatjolominq ut tatkoloq re sa' ruq'eb' li xik' neke'ilok re. Ut a'inaq reetalil naq li Qaawa' xatxyul cho'q xjolomil li xtenamit:

² Sa' li kutan a'in naq akaq xat-elk wik'in, taataweb' wiib' chi winq chi xk'atq li muqleb'aal re lix Rakel, aran Selsaj, sa' xteepal Benjamín. Ut eb' a'an te'xye aawe: «Eb' li b'uur li yookat chi xsik'b'al, ak xe'tawe'k. Anaqwan ink'a' chik yo chi k'oxlak laayuwa' chirixeb', ab'anan yo xk'a'uxl cherix: K'aru tinb'aanu cho'q re li walal? chan sa' xch'ool laayuwa'».

³ Toj najt chik chirix a'an, naq tatwulaq wan wi' li ji re Tabor, taak'uleb' oxib' chi winq yookeb' chi taqe'k, re xloq'oninkil li Yos aran Betel. Li jun yooq xk'amb'al oxib' chi kok' chib'aat, li jun chik yooq xk'amb'al oxib' chi k'uluj, ut li rox jun kuk chi b'iin.

⁴ Te'xk'e xsahil aach'ool ut te'xsi wiib' aawa, ut laa'at taak'uleb'.

⁵ Moqon chik tatwulaq Kibehá re li Yos, b'arwi' wankeb' li xjolomileb' laj Filistea. Ut naq tat-ok sa' li tenamit, taak'uleb' jun ch'uuteb' chi propeet li yookeb' chaq chi kub'eek taqe'q, aj k'amol xb'eheb' laj aarp, laj xolb' ut laj tzojtzoj.

⁶ Toja' naq tatreechani li xmusiq' li Qaawa', tat-aatinaq jo'keb' a'an ut jalanaqat chik.

⁷ Naq akaq xtz'aqlok ru chixjunil a'in, b'aanu li k'aru nakaweek'a naq us xb'aanunkil, xb'aan naq li Yos wank aawik'in.

⁸ Laa'at xb'enwa tatxik chiwu aran Kilkal, ut laa'in toxatintaw aran toj moqon, re xyeechi'inkil k'atb'il li mayej ut li k'a'aq re ru re k'amok ib' sa' usilal rik'in li Yos. Aran tinaawoyb'eni wuqub' kutan toj reetal tinwulaq wanqat wi' ut tinye aawe k'aru taab'aanu”.

⁹ Ka'ajwi' laj Saúl kixchaq'rab'i laj Samuel ut ki'elk rik'in, naq li Yos kixjal li xch'ool toj sa' xchamal, ut chixjunileb' li eetalil yeeb'il xb'aan laj Samuel kitz'aqlok ru sa' ajwi' li kutan a'an.

¹⁰ Moqon chik naq ke'wulak aran Kibehá, jun ch'uuteb' chi propeet yookeb' chaq chi chalk. Toja' naq laj Saúl ki'eechaniik xb'aan li xmusiq' li Yos ut ki'ok chi aatinak jo' propeet sa' xyanqeb' a'an.

¹¹ Chixjunileb' li neke'nawok ru chalen chaq junxil, ke'ril chi aatinak jo' propeet sa' xyanqeb' a'an, ut ke'xye chirib'ileb' rib': “K'aru xk'ul li ralal laj Kis? Ma propeet ajwi' laj Saúl?”, chankeb'.

¹² Ut jun kixye: “Ani li xyuwa'eb' a'in?”. Ut kikanaak li aatin chi jo'kan: “Ma propeet ajwi' laj Saúl?”.

¹³ Naq laj Saúl kiraqe'k chi aatinak jo' propeet, koho sa' rochoch.

¹⁴ Ut li rikan kixpatz' re laj Saúl ut re li xmoos: “B'ar xexwulak chaq?”. Kichaq'ok a'an: “Chi xsik'b'aleb' li b'uur. Ab'anan ink'a' xqataweb', jo'kan naq xkooho rik'in laj Samuel”, chan.

¹⁵ Toja' naq kixye li rikan laj Saúl: “B'aanu usilal, seeraq'i we k'aru xye chaq eere laj Samuel”.

¹⁶ Laj Saúl kixsume li rikan: “Ka'ajwi' xye qe naq ak xe'tawe'k li b'uur”, chan. Ab'an maajun t'orol li aatin kixye chirix naq taa'ok chi awab'ejink, jo' kiyehe'k chaq xb'aan laj Samuel.

¹⁷ Chirix chik a'an laj Samuel kixch'utub'eb' li tenamit chiru li Qaawa' aran Mispá

¹⁸ ut kixye reheb' laj Israel: “Jo'ka'in xye li Qaawa', xYos laj Israel: Laa'in kin'isink chaq re laj Israel aran Ejiipt ut kexinkol sa' ruq'eb' laj Ejiipt jo'wi' sa' ruq'eb' chixjunil li awab'ejihom li yookeb' chaq chi rahob'tesink eere.

¹⁹ A'ut anaqwan laa'ex xetz'eqtaana leeYos, li kikolok eere chiru chixjunil leerahilal ut ch'a'ajkilal, ut xeye re: «K'e qe junaq awab'ej», chankex. Jo'kan b'i', k'utomaq eerib' chiru li Qaawa', chi teepal ut chi junqkab'alil”.

²⁰ Laj Samuel kixb'oq chixjunileb' li xteepaleb' laj Israel, ut li Qaawa' kixsik' ru li xteepal laj Benjamín.

²¹ Chirix chik a'an kixb'oqeb' chi nach'ok li xteepal laj Benjamín chi junqkab'alil, ut kisik'mank ru li xjunkab'al laj Matrí; ut sa' xyanqeb' a'an kisik'e'k ru laj Saúl, ralal laj Kis. Ab'anan naq ke'xsik', ink'a' ke'xtaw.

²² Toja' naq ke'xpatz' wi' chik re li Qaawa': “Ma xk'ulunk arin laj Saúl?”, chankeb'. Kixye li Qaawa': “Wank aran, muqmu sa' xyanq li k'aru eere”.

²³ Tikto koheb' sa' aanil chi risinkil sa' li na'ajej muqmu wi', ut naq ke'xxaqab' chiruheb' li tenamit, ke'ril naq naxq'axeb' xteram chixjunileb'.

²⁴ Laj Samuel kixpatz' re chixjunileb' li tenamit: “Ma xeril li sik'b'il ru xb'aan li Qaawa'? Maajun junaq kama' a'an sa' chixjunil li tenamit”. Ut chixjunileb' ke'xchaj re chi xyeeb'al: “Sahaq taxaq xch'ool li awab'ej!”.

²⁵ Toja' naq laj Samuel kixch'olob' li xchaq'rab' li awab'ejihom chiruheb' li tenamit ut kixtz'iib'a sa' jun li hu li kixk'uula sa' rochoch li Qaawa'. Chirix chik a'an kixchaq'rab'i chixjunileb' li poyanam ut kixtaqlaheb' sa' rochocheb'.

²⁶ Laj Saúl ajwi' koho sa' rochoch aran Kibehá, rochb'een wiib' oxib' chi winq yo'ooneb' chi yalok, li ke'toch'e'k xch'ool xb'aan li Yos.

²⁷ Ab'an wankeb' li yib'ru xna'leb'eb' ke'xye: “Ma tooxkol awuli?”, chankeb'. Ke'xtz'eqtaana laj Saúl ut ink'a' ke'xk'e xmaatan. Ab'an laj Saúl ink'a' kixk'e sa' xch'ool li k'aru ke'xb'aanu.