1 Reyes 7 - Q'eqchi Bible

Li rochoch laj Salomón

¹ Toja' naq laj Salomón kixyiib' li rochoch; chiru oxlaju chihab' kiyaalo'k chixjunil.

² Kixyiib' ajwi' li rochoch, “K'iche' re Líbano” xk'ab'a', kach'in chik maa waqxaqib' xka'k'aal moqoj li roq, kach'in chik maa kaalaju moqoj li xnimal ru ut numenaq waqxaqib' moqoj xteram, k'ojk'o sa' xb'een kaahib' tzol chi xche'el li yaw; ut sa' xb'eeneb' li oqech neke'hilank li tz'amb'a yiib'anb'ileb' ajwi' rik'in yaw.

³ Chixjunileb' li tz'amb'a a'an, oob' roxk'aaleb', o'laqlaju chi oqech wank sa' li junq tzol.

⁴ Wank ajwi' oxib' tzol chi b'entaan, li neke'xka'ya rib'eb', kok'eb' chirix ut ninqeb' chisa'.

⁵ Chixjunileb' li xche'el li re kab'l ut eb' li b'entaan junes kaaxukuuteb' ut neke'xka'ya rib' sa' oxib' tzol.

⁶ Kixyiib' ajwi' xmu li kab'l rik'in junes oqech: naxb'is kach'in chik maa kaalaju moqoj li roq ut numenaq waqxaqib' moqoj li ru. Li xmu kab'l a'in wank sa' xjayal li jun chik; wankeb' li oqech ut li che' li ke'xk'e sa' xb'een.

⁷ Kixyiib' li xmuheb'aal li raqb'a-aatin, ut kixtz'ap rik'in tz'alamche' re yaw, chalen sa' ch'och' toj chiru li tz'amb'a.

⁸ Li xmuheb'aal laj Salomón li wank sa' jun chik li neb'aal, juntaq'eet rik'in li xkomon li kab'l, juntaq'eet li xyiib'ankil. Kixyiib' ajwi' jun chik li kab'l cho'q re li xrab'in laj Parahón, li kixk'am laj Salomón cho'q rixaqil: juntaq'eet ajwi' li xyiib'ankil.

⁹ Chixjunil li ochoch a'an kiyiib'amank junes rik'in pek tuqub'anb'ileb' ru rik'in ch'iich' li nachalk naxik xninqal, chalen chaq sa' rub'elankil toj taqe'q, chalen chaq chirix toj chiru li nimla neb'aal.

¹⁰ Sa' li rub'elankileb' li ochoch ke'xk'e junes chaab'il pek, jwal xninqal pek: wank aj oxib' moqoj, wank aj numenaq wiib' moqoj.

¹¹ Jo'kan ajwi' li tz'ak wank sa' xb'een: ke'xk'e li pek junes sik'b'ileb' ru, tuqub'anb'ileb' ut b'isb'ileb' ru, jo'wi' che' re yaw.

¹² Chiru li nimla neb'aal wank oxib' tzol chi pek tuqub'anb'ileb' ru, ut jun tzol li tz'amb'a re yaw; juntaq'eet ajwi' rik'in li neb'aal li wank chisa' ut li xmu li rochoch li Yos.

Li xyiib'ahom laj Jirán

¹³ Laj Salomón li awab'ej kixtaqla xk'amb'al chaq laj Jirán toj sa' li tenamit Tiro.

¹⁴ Laj Jirán a'an xyum jun li ixq xma'alka'an, xkomoneb' li ralal xk'ajol laj Neftalí. Li xyuwa' a'an aj Tiro, naxk'anjela li q'anch'iich'. Li winq a'in q'axal seeb' xch'ool ut jwal seeb' li ruq' chi xyiib'ankil yalaq k'a'aq re ru rik'in q'anch'iich'. Jo'kan naq kiwulak rik'in laj Salomón li awab'ej ut kixb'aanu chixjunil li k'anjel kik'eemank chixb'aanu.

¹⁵ Xb'enwa kixyiib' wiib' oqech q'anch'iich': li xb'een nab'isok oob' moqoj li roq ut numenaq oxib' moqoj li xsa'. Jo'kan ajwi' li jun chik.

¹⁶ Kixyiib' ajwi' wiib' xsahob' ruheb' re xk'eeb'al sa' xjolomeb' li oqech, aj numenaq jun moqoj xteram li junjunq.

¹⁷ Kixtz'ul ajwi' wiib' xsahob' ru chanchan li kareen, re xk'eeb'al sa' xb'eeneb' li oqech: junjunq li xsahob' ru cho'q re li junjunq chi oqech.

¹⁸ Kixyiib' wiib' tzol chi granaad chi xsutam li q'anch'iich' li kixtz'ul, re xtz'apb'al li xjolomeb' li oqech.

¹⁹ El li xsahob' ru li wankeb' chaq toj sa' ru'ujeb' li oqech, chanchaneb' li asuseen. Numenaq jun moqoj xninqaleb' li junjunq.

²⁰ Chi xsutam eb' li xsahob' ru eb' li wiib' chi oqech, chiruheb' li tz'ulb'il kareen, wank lajeek'aal chi granaad.

²¹ Laj Jirán kixxaqab'eb' li oqech chire rokeb'aal li rochoch li Yos: jun kixxaqab' sa' li xnim ut Yakín kixk'e cho'q xk'ab'a'; ut li kikanaak sa' xtz'e, Bohás kixk'ab'a'in.

²² Eb' li xsahob' ruheb' li oqech li ke'kanaak sa' ru'ujeb', chanchaneb' li asuseen. Chi jo'kan kichoymank xyiib'ankileb' li oqech.

Eb' li xk'anjelob'aal li rochoch li Yos

²³ Chirix chik a'an kixyiib' jun nimla xna'aj ha' rik'in q'anch'iich', li nab'isok oxib' moqoj li re junpak'al rik'in li jun chik, numenaq jun moqoj li xteram ut waqxaqib' moqoj li xsuram.

²⁴ Chi rub'el re li xna'aj ha', sa' xsutam li waqxaqib' moqoj wank wiib' tzol li k'um, lajeetq li ru sa' li junjunq chi xyanq, ut latzlo chi junwaakaj rik'in li xna'aj ha'.

²⁵ A'an k'ojk'o sa' xb'een kab'laju chi b'ooyx yiib'anb'ileb' rik'in q'anch'iich': oxib' neke'ilok sa' xjayal releb'l iq', oxib' neke'ilok sa' rokeb'l saq'e, oxib' sa' xsak'leb' iq' ut li oxib' chik neke'ilok sa' releb'l saq'e. Ke'xchunub' li nimla xna'aj ha' sa' xb'eeneb' li b'ooyx, ut li roqeb' li wankeb' chirix ke'kanaak rub'el li xna'aj ha'.

²⁶ Li xpimal ru li xna'aj ha', a'an junq ch'ol k'utub', ut li re chanchan ru li asuseen. Ut naxkuy wiib' mil kuk chi ha'.

²⁷ Kixyiib' ajwi' lajeeb' k'ochleb'aal yiib'anb'il rik'in q'anch'iich' aj junq moqoj roq, junq moqoj li ru ut waqib' k'utub' xteram.

²⁸ Eb' li k'ochleb'aal a'in k'ub'k'uukeb' chi jo'ka'in: wankeb' xperpookil ch'iich', ut eb' a'in ak sa' xna'aj xna'aj li junjunq wankeb'.

²⁹ Eb' li perpookil ch'iich' a'in, uutz'u'ujinb'ileb' ru rik'in xjalam uheb' li kaqkoj, b'ooyx ut kerubín. Jo'kan ajwi' sa' xb'eeneb' ut rub'eleb' li kaqkoj ut eb' li b'ooyx, wank ruutz'u'ujinkileb' yiib'anb'ileb' rik'in q'anch'iich'.

³⁰ Li junjunq chi k'ochleb'aal wank kaahib' xsursu q'anch'iich'; jo'kan ajwi' li chapcho wi'. Sa' li xuk xkaapak'alil, rub'el li xna'aj ha', wankeb' xkuut uutz'u'ujinb'ileb'.

³¹ Li re li xna'aj ha' chalen chaq toj chisa' wank sa' wiib' k'utub' rik'in li xik', chalen taq'a toj taqe'q, sursu li re ut uutz'u'ujinb'il rik'in eetalil, ut li xtz'apb'al li re a'an kaaxukuut.

³² Eb' li kaahib' chi sursu wankeb' rub'el li perpookil ch'iich', ut li chapchookeb' wi' ch'ikch'ookeb' sa' li k'ochleb'aal. Li xteram li junjunq chi sursu, a'an ox ox k'utub'.

³³ Eb' li sursu a'in juntaq'eeteb' rik'in li xyantil eb' li b'eleb'aal ch'iich'. Li nachapok reheb', eb' li sursuukil ch'iich', chixjunileb' a'in yiib'anb'ileb' rik'in q'anch'iich'.

³⁴ Eb' li k'ochleb'aal wankeb' xchapb'al sa' xkaaxukuutil, ut a'an chapcho rik'ineb' li junjunq.

³⁵ Chire eb' li k'ochleb'aal wank jun sursuukil ch'iich' li nab'isok wiib' k'utub' xteram; ut chixjunil li wank sa' xb'een tik xchapom rib' rik'ineb' li k'ochleb'aal.

³⁶ Chiruheb' li perpookil ch'iich', laj Jirán kixlet'exiheb' li kerubín, eb' li kaqkoj, li kala' ut eb' li ruutz'u'ujil chi xsutameb'.

³⁷ Jo'ka'in naq kixyiib' li lajeeb' chi k'ochleb'aal: junqnaqik xyiib'ankil ut juntaq'eet li xninqaleb' chixjunil.

³⁸ Kixyiib' ajwi' lajeeb' xna'aj ha' rik'in oor, li junjunq naxkuy junqmay kuk chi ha'. Li junjunq chi xna'aj ha' nab'isok junq moqoj roq. Wank jun xna'aj ha' sa' xb'een li junjunq chi k'ochleb'aal.

³⁹ Eb' li lajeeb' chi k'ochleb'aal a'in ke'k'ehe'k chi xk'atq li rochoch li Qaawa': oob' sa' li xnim ut oob' sa' li xtz'e. Ut li xnimla na'aj ha' kik'ehe'k sa' xnim li rochoch li Qaawa', sa' releb'l saq'e, sa' xjayal li rokeb'l iq'.

⁴⁰ Laj Jirán kixyiib' ajwi' li xna'aj li cha, li xokleb' ru xam ut eb' uk'leb' sek'. Jo'ka'in naq laj Jirán kixchoy xyiib'ankil chixjunil li kiyehe'k re xb'aan laj Salomón li awab'ej, cho'q re li rochoch li Qaawa':

⁴¹ eb' li wiib' chi oqech, eb' li xsahob' ru li kik'eemank sa' ru'ujeb' li oqech, eb' li wiib' chi tz'ulb'il ch'iich' re ruutz'u'ujinkil ru eb' li oqech;

⁴² eb' li jun o'q'ob' (400) chi granaad reheb' li b'entaan, ka'kab' tzol chi granaad cho'q re li junjunq chi tz'ulb'il ch'iich';

⁴³ eb' li lajeeb' chi k'ochleb'aal ut li lajeeb' chi xna'aj ha' sa' xb'eeneb' li k'ochleb'aal;

⁴⁴ li nimla xna'aj ha' ut eb' li kab'laju chi b'ooyx chi rub'el xna'aj li ha';

⁴⁵ eb' li xna'aj cha, eb' li xokleb' ru xam ut eb' li uk'leb' sek'. Chixjunil li k'a'aq re ru a'in li kixyiib' laj Jirán cho'q re laj Salomón re te'k'anjelaq sa' rochoch li Qaawa', chixjunil yiib'anb'il rik'in tz'aqal q'anch'iich'.

⁴⁶ Li awab'ej kixk'eheb' chi yiib'aak sa' xtaq'ahil li nima' Jordán, rik'in seb', sa' xyanq Sukot ut Sartán.

⁴⁷ K'ajo' xk'ihaleb' li k'anjelob'aal a'in, ink'a' naru xb'irb'al rix chixjunil li q'anch'iich' li ki'ok chisaheb'.

⁴⁸ Laj Salomón kixk'e ajwi' chi yiib'aak chixjunil li k'a'aq re ru wank sa' rochoch li Qaawa': li artal yiib'anb'il rik'in oor, li meex li nak'eemank wi' li mayejanb'il wa,

⁴⁹ eb' li xna'aj kanteel li wankeb' chiru li Santil Na'ajej, oob' wankeb' sa' xnim ut oob' wankeb' sa' xtz'e li rochoch li Qaawa'; eb' li uutz'u'uj, eb' li xna'aj xam ut eb' li waal. Chixjunileb' a'in yiib'anb'ileb' rik'in oor;

⁵⁰ eb' li lekleb', eb' li ch'iich', eb' li uk'leb' sek', li xna'aj li b'iin, li xna'aj ru xam junes tz'aqal oor; eb' li neke'surink wi' li xtz'apb'aleb' rokeb'aal li Santil Na'ajej, a' li q'axal Sant xk'ab'a', ut eb' li neke'surink wi' eb' li okeb'aal sa' rochoch li Qaawa', eb' a'in ajwi' yiib'anb'ileb' rik'in tz'aqal oor.

⁵¹ Naq kiraqe'k chixjunil li k'anjel kixb'aanu laj Salomón sa' rochoch li Qaawa', li awab'ej kixye naq chik'ame'q chaq jo'k'ihal q'axtesinb'il re li Qaawa' xb'aan laj David li xyuwa', li plaat ut oor ut wank chik xkomon, ut kixk'e sa' xyanq li xsahil eechej li rochoch li Yos.