1 Reyes 5 - Q'eqchi Bible

Laj Jirán ut laj Salomón ke'xk'am rib' sa' aatin

¹ Naq laj Jirán, awab'ej re Tiro, kirab'i resil naq laj Salomón kixaqab'aak cho'q awab'ej sa' xna'aj laj David li xyuwa', kixtaqlaheb' li xtaql rik'in, xb'aan naq laj Jirán q'axal ramiiw laj David naq kiwank chi junelik.

² Toja' naq laj Salomón kixtaqla xyeeb'al re laj Jirán:

³ “Laa'at nakanaw chi us naq laj David linyuwa' ink'a' kiru xkab'lankil li rochoch li Qaawa' li xYos, xb'aan naq junelik yo chi yalok rik'ineb' li xik' neke'ilok re, toj reetal naq li Qaawa' kixq'axtesiheb' sa' ruq'.

⁴ Ab'an anaqwan li Qaawa' linYos xk'e tuqtuukilal yalaq b'ar sa' linsutam: maa'ani chik xik' na'ilok qe ut maak'a' chik junaq raaxiik'.

⁵ Jo'kan naq twaj xkab'lankil li rochoch li Qaawa' linYos, jo' chanru kixye re laj David linyuwa': «A' laawalal li tinxaqab' chi awab'ejink sa' laak'ojarib'aal, a'an taakab'lanq re li ochoch sa' ink'ab'a'», chan.

⁶ Nintz'aama usilal chawu naq taataqlaheb' aran Líbano li te'xyok' li ninqi che' yaw. Eb' laj k'anjel chiwu te'xik rochb'eeneb' laj k'anjel chawu laa'at. Tintojeb' jo'nimal li taapatz' we, xb'aan naq nakanaw naq maak'a'eb' sa' qayanq li neke'yok'ok che' jo'eb' laj Sidón”.

⁷ Naq laj Jirán kirab'i li raatin laj Salomón, k'ajo' naq kisaho'k sa' xch'ool ut kixye: “Nimaq ta xloq'al li Qaawa' anaqwan, xb'aan naq xk'ehom re laj David jun ralal q'axal chaab'il xna'leb' chi xjolominkil li nimla tenamit a'an!”, chan.

⁸ Chirix chik a'an laj Jirán kixtaqla xyeeb'al re laj Salomón: “Xwab'i li k'aru xataqla chaq xyeeb'al we. Tinb'aanu chixjunil li taawaj, chirix risinkileb' li che', li yaw ut li saqichaj.

⁹ Eb' laj k'anjel chiwu te'xyok' eb' li che' aran Líbano ut te'xkub'si toj chire li palaw; te'xtaqsi chiru poyte', ut chiru palaw te'xk'am toj sa' li na'ajej taaye we. Aran taahiteb' li poyte' ut taab'eela laa'at. Ka'ajwi' nintz'aama chawu naq taak'e chaq xtzekemqeb' li wankeb' sa' li wochoch”.

¹⁰ Jo'kan naq laj Jirán kixk'e re laj Salomón jo'k'ihaleb' li yaw ut li saqichaj kiraj,

¹¹ ut laj Salomón kixk'e junmay mil kintal chi k'aj ut junmay mil liitr chi aseeyt cho'q reheb' li wankeb' sa' rochoch laj Jirán. A'an li naq'axtesimank re laj Jirán xb'aan laj Salomón rajlal chihab'.

¹² Li Qaawa' kixk'e xchoxahil na'leb' laj Salomón, jo' kixyeechi'i re. Laj Jirán ut laj Salomón ke'xk'am rib' sa' aatin ut ke'wank sa' tuqtuukilal.

¹³ Toja' naq laj Salomón li awab'ej kixk'ojob' jun li chaq'rab' sa' chixjunil Israel re xsik'b'aleb' ru laj k'anjel, ut ke'ch'utlaak lajeeb' xka'k'aal mil chi winq minb'ileb' ru chi k'anjelak.

¹⁴ Eb' a'an ke'taqlaak aran Líbano; rajlal po neke'xjal rib'eb'. Chiru junq po li awab'ej naxtaqlaheb' lajeetq mil chi winq: jun po neke'wank chaq Líbano ut wiib' po neke'wank sa' rochocheb'. Laj Adonirán najolomink reheb' laj k'anjel a'an.

¹⁵ Laj Salomón kixxaqaleb' ajwi' lajeeb' xkaak'aaleb' mil (70,000) chi aj paqonel, ut kaak'aal mil (80,000) chi aj sik'ol pek sa'eb' li tzuul,

¹⁶ ink'a' k'eeb'ileb' sa' ajl laj ilol reheb' laj k'anjel, wankeb' oxib' mil rik'in o'lajuk'aaleb' (3,300) chi winq neke'taqlank reheb' laj k'anjel.

¹⁷ Li awab'ej kixtaqla risinkileb' xninqal pek jotzb'ileb' ru, re rub'elankil li rochoch li Qaawa'.

¹⁸ Eb' laj tz'ak sik'b'ileb' ru xb'aan laj Salomón, eb' laj Jirán ut eb' laj Jibal ke'xset ut ke'xpech' eb' li che' jo'wi' ke'xtuqub' ruheb' li pek re xkab'lankil li rochoch li Yos.