1 Reyes 19 - Q'eqchi Bible

Laj Elías koho sa' li tzuul Horeb

¹ Laj Ajab kixseeraq'i re lix Jesabel chixjunil li kixb'aanu laj Elías ut chanru naq kixkamsiheb' chi ch'iich' chixjunileb' li xpropeet laj Bahal.

² Toja' naq lix Jesabel kixtaqla xyeeb'al re: “Chine'xkamsihaq eb' li yos, wi wulaj sa' ajwi' li honal a'in ink'a' tatinkamsi jo' naq xakamsiheb' li xpropeet laj Bahal”.

³ Naq kirab'i a'an, laj Elías kichalk xxiw ut ki'elelik re xkolb'al rib': koho toj Berseba li wank sa' xteepal Judá, ut aran kixkanab' laj k'anjel chiru.

⁴ Chirix chik a'an jun kutan kib'eek xjunes sa' li chaqich'och', toj reetal kiwulak ut kihilank rub'el jun toon chi che'. Aran q'axal kixrahi li kamk ut kixye: “Tz'aqalaq li rahilal a'in, at Qaawa'! Us raj wi tinaak'e chi kamk xb'aan naq moko jwal chaab'ilin ta chiruheb' linxe'toonil yuwa'!”, chan.

⁵ Kixjilib' rib' chi wark rub'el li xtoon li che', ab'an ki'ajsiik xb'aan jun x'ánjel li Qaawa' li kixye re: “Waklin ut wa'in!”.

⁶ Laj Elías ki'ilok chi xsutam ut kixk'e reetal naq chi xjolom wank jun li wa pomb'il sa' xb'een pek ut jun xaar chi ha'. Kiwa'ak ki'uk'ak, ut ki'ok wi' chik chi wark.

⁷ Ab'anan li x'ánjel li Qaawa' kirajsi wi' chik xka'sutil ut kixye re: “Waklin ut wa'in, xb'aan naq jwal najt roq li b'e chawu”.

⁸ Laj Elías kiwakliik, kiwa'ak ki'uk'ak, ut li tzekemq a'an kixk'e xkawilal chi b'eek chiru ka'k'aal kutan ut ka'k'aal q'oqyink toj reetal kiwulak Horeb, sa' li tzuul re li Qaawa'.

⁹ Aran ki'ok sa' jun li ochoch pek b'arwi' kixnumsi li q'oqyink. Ab'anan ki'aatinaak xb'aan li Qaawa', li kixye re: “K'aru yookat arin, a Elías?”.

¹⁰ “K'ajo' naq naxamnak linch'ool xb'aan aaraab'al, at Qaawa', xb'aan naq eb' laj Israel xe'xtz'eqtaana laasumwank, xe'xjuk'i eb' laa'artal ut xe'xkamsiheb' laapropeet! Ka'ajin aj chik xinkanaak, ut te'raj ajwi' inkamsinkil”, chan laj Elías.

¹¹ Kichaq'ok li Qaawa' ut kixye: “Elen chaq ut xaqab' aawib' chiru li Qaawa', sa' xb'een li tzuul”. Toja' naq li Qaawa' kinume'k ut kiwank jun kawil kaqsut-iq' li kixjach li tzuul ut kilajxjor eb' li pek chiru li Qaawa'; ab'an li Qaawa' maa'ani sa' li kaqsut-iq'. Chirix li kaqsut-iq' aka' chik li hiik; ab'an li Qaawa' maa'ani sa' li hiik.

¹² Chirix li hiik, aka' chik li xam; ab'an li Qaawa' maa'ani sa' li xam. Chirix chik li xam aka' chik li mayuus, timil timil ki'eek'ank.

¹³ Naq kirab'i a'in laj Elías, kixtz'ap li ru rik'in li xb'atb'al, ki'elk sa' li ochoch pek ut kikanaak chi xaqxook sa' li okeb'aal. Toja' naq kirab'i jun xyaab' kuxej li kixye re: “K'aru yookat arin, a Elías?”.

¹⁴ Kichaq'ok ut kixye: “K'ajo' naq naxamnak linch'ool rik'in aaraab'al, at Qaawa', xb'aan naq eb' laj Israel xe'xtz'eqtaana laasumwank, xe'xjuk'i eb' laa'artal ut xe'xkamsiheb' laapropeet. Ka'ajin aj chik xinkanaak ut te'raj ajwi' inkamsinkil”.

¹⁵ Toja' naq li Qaawa' kixye re: “Sutq'in sa' laab'e ut ayu sa' li chaqich'och' re Damaask. Naq tatwulaq aran, taayul rik'in aseeyt laj Jasahel cho'q awab'ej re Aram.

¹⁶ Taayul ajwi' laj Jehú, ralal laj Nimsí, cho'q awab'ej re Israel, ut laj Eliseo, ralal laj Safat, Abel-Mejolá xtenamit, taaxaqab' cho'q propeet cho'q aaweeqaj laa'at.

¹⁷ Li taakole'q sa' ruq' laj Jasahel, taakamsiiq xb'aan laj Jehú, ut li taakole'q sa' ruq' laj Jehú, taakamsiiq xb'aan laj Eliseo.

¹⁸ Ab'anan wuqub' mil chi aj Israel tinkanab'eb' chi yo'yo, jo'k'ihaleb' li ink'a' xe'wiq'laak chiru laj Bahal chi moko xe'xpatz' xk'ab'a' rik'in rutz'b'al ru”.

Kib'oqe'k laj Eliseo

¹⁹ Ki'elk aran laj Elías ut koxtaw laj Eliseo, li ralaj laj Safat, naq yo chi xpikb'al li ch'och' rik'in kab'laju sumal chi b'ooyx, ut laj Eliseo wank sa' li xmaril. Laj Elías kinume'k chi xk'atq ut kixkut li xb'atb'al sa' xb'een.

²⁰ Tikto laj Eliseo kixkanab'eb' li xb'ooyx ut kixchap raanil chirix laj Elías, kixye re: “Kanab'in wan chi xchaq'rab'inkileb' linna' linyuwa', ut tatintaaqe”. Kichaq'ok laj Elías: “Ayu; chirix chik a'an tatsutq'iiq chaq. Ab'anan chiwanq sa' laach'ool li xinb'aanu aawe”, chan.

²¹ Laj Eliseo kixsutq'isi rib', kixchapeb' jun sumal li xb'ooyx ut kixk'e cho'q xk'atb'il mayej. Li b'itche' kik'anjelak re xpomb'al li tib' li kixsi reheb' li tenamit re te'xtzeka. Chirix chik a'an koho chirix laj Elías ut ki'ok chi k'anjelak chiru.