1 Reyes 17 - Q'eqchi Bible

Laj Elías li propeet

¹ Toja' naq laj Elías, Tisbé xtenamit, sa' xteepal Galahad, kixye re laj Ajab: “Sa' xk'ab'a' li Qaawa', xYos laj Israel, li yookin chi k'anjelak chiru, ninye aawe naq chiruheb' li chihab' a'in maak'a'aq xchu'ke chi moko li hab', wi ink'a' laa'in tinyehoq re”.

² Chirix chik a'an li Qaawa' kixye re laj Elías:

³ “Elen arin, ayu sa' xjayal releb'l saq'e ut toxaamuq aawib' chire li nima' Kerit, li wank chi xk'atq li nima' Jordán.

⁴ Sa' roq nima' tat-uk'aq, ut xinye reheb' li tz'oq naq te'xk'e aatzekemq aran”, chan.

⁵ Laj Elías kixpaab' li kiyehe'k re xb'aan li Qaawa', ut koho chi wank chire li nima' Kerit, sa' xjayal releb'l saq'e re li nima' Jordán.

⁶ Eb' li tz'oq neke'xk'am xwa eq'la ut xtib' ewu, ut na'uk'ak sa' roq li nima' Kerit.

⁷ Ab'anan moqon chik li nima' ki'ok chi chaqik, xb'aan naq ink'a' chik naxk'e li hab' sa' li tenamit.

Laj Elías ut li xmalka'an aj Sarepta

⁸ Toja' naq li Qaawa' kixye re laj Elías:

⁹ “Xaqlin ut ayu sa' li tenamit Sarepta, sa' xteepaleb' laj Sidón, ut kanaaqat aran, xb'aan naq ak xinye re jun xmalka'an li wank aran naq tatxch'oolani”, chan.

¹⁰ Kixaqliik laj Elías ut koho Sarepta. Naq yo chi ok sa' li tenamit, kiril aran jun xmalka'an yo chi xxokb'al xsi'. Kixb'oq li ixq ut kixye re: “B'aanu usilal, k'am chaq b'ayaq ha' sa' laakuk re tin'uk'aq”, chan.

¹¹ Koho li ixq chi xxokb'al li ha', ab'an laj Elías kixye wi' chik re: “B'aanu usilal, k'am ajwi' chaq kach'inaq inwa”, chan re.

¹² Kisumeek: “Sa' xk'ab'a' li Qaawa' laaYos, ninye aawe naq maak'a' inwa ak yiib'anb'il; yal jun mooch' aj chik ink'aj wank sa' jun uk'al ut b'a'b'ay aj chik in'aseeyt wank sa' linch'ina meet. Yookin chi xxokb'al kach'inaq insi' re xyiib'ankil li wa cho'q re linyum ut cho'q we laa'in. Tqawa' a'an, toja' naq tookamq”, chan li xmalka'an.

¹³ Kichaq'ok laj Elías ut kixye: “Matk'oxlak. Okan ut b'aanu jo' xaye, ab'an xb'enwa yiib' junaq inch'ina k'uluj ut taak'am chaq. Moqon chik taayiib' cho'q aawe ut cho'q re laayum.

¹⁴ Xb'aan naq jo'ka'in xye li Qaawa', xYos laj Israel: «Ink'a' taalajq li k'aj sa' li uk'al; chi moko taayamaaq xsa' li xkukb'il li aseeyt toj reetal naq li Qaawa' tixk'e chaq li hab' sa' xb'een li ruuchich'och'»”.

¹⁵ Koho li xmalka'an ut kixb'aanu jo' kixye laj Elías, ut ke'wa'ak laj Elías, li xmalka'an ut li xkomoneb'.

¹⁶ Chiru naab'al kutan li uk'al ut li kuk ink'a' kilajk xsa'eb', jo' kixye li Qaawa' chi xtz'uumal re laj Elías.

Li xwaklijik wi' chik chi yo'yo li xyum li xmalka'an

¹⁷ Chirix chik a'an kiyajerk li xyum li ixq aj eechal ochoch. Jwal kinimank xyajel toj reetal kikamk.

¹⁸ Toja' naq li ixq kixye re laj Elías: “K'aru wank we aawik'in, at xtaql li Yos? Ma xatchalk chi xjultikankil linmaak ut xkanab'ankil chi kamk linyum?”.

¹⁹ Kichaq'ok laj Elías ut kixye: “K'am chaq we laayum”, chan. Kixk'ul li ch'ina'al, kixk'am taqe'q sa' li xkab' k'ojar li kab'l ut kixsotob' chiru li xwarib'aal.

²⁰ Tikto kitijok chiru li Qaawa' ut kixye: “At Qaawa', at inYos, ma taarahob'tesi ajwi' xch'ool li xmalka'an a'in, li xk'ehok wochochnaal? K'a'ut naq xak'e chi kamk li xyum?”, chan.

²¹ Oxib' sut kixhupub' rib' sa' xb'een li ch'ina'al, ut chi kaw xyaab' xkux kixye re li Qaawa': “At Qaawa', at inYos, chiwanq wi' chik xyu'am li ch'ina'al a'in”.

²² Li Qaawa' kirab'i naq kitijok laj Elías chi kaw xyaab' xkux, ut kixk'e wi' chik xyu'am li ch'ina'al, li kiyo'laak wi' chik.

²³ Tikto laj Elías kixq'alu li ch'ina'al, kixkub'si chaq ut kixq'axtesi re li xna': “At ixq, laach'ina'al yo'yo”, chan re.

²⁴ Toja' naq li ixq kixye re laj Elías: “Anaqwan ninnaw chik naq laa'at xtaql li Yos, ut yaal naq li raatin li Qaawa' wank aawik'in”, chan.