1 Reyes 16 - Q'eqchi Bible

¹ Li raatin li Qaawa' kiwulak rik'in laj Jehú, ralal laj Jananí, re raqok aatin sa' xb'een laj Basá. Ut laj Jehú kixye re laj Basá chi jo'ka'in:

² “Laa'at maak'a' aawankil naq xatwank. Ut laa'in xatinxaqab' cho'q xjolomil lintenamit Israel. Ab'an laa'at xachiq' injosq'il naq xab'aanu li maa'usilal kixb'aanu laj Jerobohán ut xak'e chi maakob'k lintenamit Israel.

³ Xb'aan a'an, tinsach aawu, a Basá, jo' ajwi' eb' laawalal aak'ajol; tinb'aanu re laajunkab'al li xinb'aanu re li xjunkab'al laj Jerobohán, li ralal laj Nebat.

⁴ Chixjunileb' laawech'alal li te'kamq sa' li tenamit, te'tiwe'q xb'aaneb' li tz'i', ut li te'kamq chaq sa' k'aleb'aal, te'k'uxe'q xb'aaneb' li so'sol”.

⁵ Chixjunil li xyehom xb'aanuhom laj Basá ut li yalok kixb'aanu, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel.

⁶ Naq laj Basá kiq'ajk kisutq'iik rik'ineb' li xxe'toonil yuwa', ke'xmuq sa' li tenamit Tirsá. Ut laj Elá li ralal kikanaak chi awab'ejink sa' xna'aj.

⁷ Li raatin li Qaawa' kiwulak chi raqok aatin sa' xb'een laj Basá ut sa' xb'eeneb' li ralal xk'ajol, chi xtz'uumal re li propeet Jehú, ralal laj Jananí, xb'aan chixjunil li maa'usilal kixb'aanu chiru li Qaawa'. Laj Basá kixchiq' xjosq'il li Yos naq kixyiib'atq jalanil yos rik'in ruq', jo' kixb'aanu laj Jerobohán, ut naq kixsach ajwi' li xjunkab'al chi junajwa.

Laj Elá, awab'ej re Israel

⁸ Laj Elá, ralal laj Basá, ki'ok chi awab'ejink sa' xb'eeneb' laj Israel, aran Tirsá, naq ak waqib' xka'k'aal chihab' chik rokik laj Asá cho'q awab'ej re Judá. Wiib' chihab' ajwi' ki'awab'ejink.

⁹ Ab'anan laj Simrí, aj k'anjel chiru ut xjolomileb' laj b'eresinel b'eleb'aal ch'iich', kixk'uub' xkamsinkil. Sa' jun kutan naq laj Elá yo chi kalaak sa' rochoch laj Arsá, laj ilol re li junkab'al aran Tirsá,

¹⁰ kichalk laj Simrí ut kixkamsi, re awab'ejink sa' xna'aj. A'an kik'ulmank naq yook wuqub' xka'k'aal chihab' rokik laj Asá cho'q awab'ej re Judá.

¹¹ Ka'ajwi' ki'ok chi taqlank ut kik'ojlaak sa' li xk'ojarib'aal, kixkamsiheb' chixjunil li ralal xk'ajol laj Basá: maajun chik xkomon malaj ramiiweb' kixkanab' chi yo'yo.

¹² Laj Simrí kixsach ru chixjunileb' li ralal xk'ajol laj Basá, jo' kixye li Qaawa' chi xtz'uumal re laj Jehú li propeet,

¹³ xb'aan chixjunil li maa'usilal kixb'aanu laj Basá ut laj Elá li ralal, naq ke'xk'am xb'eheb' laj Israel chi maakob'k ut ke'xchiq' xjosq'il li Qaawa', xYos laj Israel, rik'in xyiib'ankil xyoseb'.

¹⁴ Chixjunil li xyehom xb'aanuhom laj Elá, tz'iib'anb'il sa' xHuhil li xyehom ut xb'aanuhomeb' li awab'ej re Israel.

Laj Simrí, awab'ej re Israel

¹⁵ Ak wuqub' xka'k'aal chihab' rokik laj Asá cho'q awab'ej re Judá, naq sutsu li tenamit Jibetón, sa' xteepal Filistea, xb'aaneb' laj Israel, kixtikib' awab'ejink laj Simrí; ut wuqub' kutan ajwi' kiwank cho'q awab'ej aran Tirsá.

¹⁶ Sa' ajwi' li kutan naq hilhookeb' laj puub', ut ke'rab'i xyeeb'al naq laj Simrí kiq'etq'eto'k ut kixkamsi li awab'ej, chixjunileb' laj Israel ke'xxaqab' laj Omrí, xjolomileb' laj puub', cho'q awab'ej re Israel.

¹⁷ Toja' naq laj Omrí, rochb'een chixjunileb' laj Israel, ke'elk Jibetón, koheb' chi tzuul ut koxe'xsut li tenamit Tirsá.

¹⁸ Naq laj Simrí kiril naq ak wank li tenamit sa' ruq'eb' laj Israel, koxmuq rib' sa' ru'uj li rochoch ut kixk'e xxamlel, chi wank a'an chisa', ut chi jo'kan kikamk.

¹⁹ Chixjunil a'in kik'ulmank xb'aan chixjunil li maa'usilal kixb'aanu, naq kimaakob'k chiru li Qaawa' jo' kixb'aanu laj Jerobohán naq kixk'eheb' laj Israel chi maakob'k.

²⁰ Chixjunil li xyehom xb'aanuhom laj Simrí ut naq kixk'uub' xkamsinkil li awab'ej, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel.

²¹ Toja' naq eb' laj Israel ke'xjek' rib' sa' wiib' ch'uut: jun ch'uut koho chirix laj Tibní, ralal laj Kinat, re xxaqab'ankil cho'q awab'ej, ut li jun ch'uut chik koheb' chirix laj Omrí.

²² Ab'an li ch'uut ke'okenk chirix laj Omrí, ke'yalok rik'ineb' li xch'uut laj Tibní, li ralal laj Kinat. Kikamk laj Tibní ut a' chik laj Omrí kikanaak chi awab'ejink.

Laj Omrí, awab'ej re Israel

²³ Ak junlaju xka'k'aal chihab' rokik laj Asá cho'q awab'ej re Judá, naq kixtikib' awab'ejink laj Omrí sa' xb'eeneb' laj Israel, ut kab'laju chihab' ki'awab'ejink. Sa' li tenamit Tirsá kiwank waqib' chihab'.

²⁴ Laj Omrí kixloq' li xtzuulul Samaria chiru laj Sémer chi oxib' o'q'ob' chi tumin plaat. Kixkawub'resi li na'ajej ut aran kikab'lak: Samaria kixk'e cho'q xk'ab'a' li tenamit sa' xk'ab'a' laj Sémer, laj eechal re xb'enwa li na'ajej.

²⁵ Laj Omrí kixb'aanu li ink'a' nawulak chiru li Qaawa'; q'axal yib' wi' chik ru kixb'aanu chiruheb' li ke'wank junxil.

²⁶ Kixk'anasi re laj Jerobohán, ralal laj Nebat, sa' chixjunil li kixk'ameb' wi' xb'eheb' laj Israel chi maakob'k: ke'xchiq' xjosq'il li Qaawa', xYos laj Israel, rik'in xyiib'ankil li xyoseb'.

²⁷ Chixjunil li xyehom ut xb'aanuhom laj Omrí, tz'iib'anb'il sa' xHuhil xyehom ut xb'aanuhomeb' li awab'ej re Israel.

²⁸ Naq laj Omrí kiq'ajk kisutq'iik rik'ineb' li xxe'toonil yuwa', kimuqe'k aran Samaria. Ut a' chik laj Ajab li ralal kikanaak chi awab'ejink sa' xna'aj.

Laj Ajab, awab'ej re Israel

²⁹ Ak waqxaqlaju xka'k'aal chihab' rokik laj Asá cho'q awab'ej re Judá, naq kixtikib' awab'ejink laj Ajab, ralal laj Omrí, sa' xb'eeneb' laj Israel. Wiib' xka'k'aal chihab' kitaqlank laj Ajab, ralal laj Omrí, aran Samaria.

³⁰ Laj Ajab, ralal laj Omrí, kixb'aanu li ink'a' nawulak chiru li Qaawa'; q'axal yib' wi' chik ru kixb'aanu chiruheb' li ke'wank xb'enwa.

³¹ Ink'a' kitz'aqlok re xb'aanunkil li xmaakeb' laj Jerobohán, ralal laj Nebat; kixk'am aj b'an wi' cho'q rixaqil lix Jesabel, xrab'in laj Itobahal, awab'ej re Sidón, ut ki'ok chi k'anjelak chiru li jalanil yos, Bahal xk'ab'a', ut kixloq'oni ru.

³² Kixyiib' jun x'artal laj Bahal, sa' li xtijob'aal laj Bahal li kixyiib' aran Samaria.

³³ Kixyiib' ajwi' xjalam u lix Aserá li kixchiq' wi' xjosq'il li Qaawa', xYos laj Israel. K'ajo' wi' chik kixb'aanu chiruheb' li awab'ej ke'wank xb'enwa.

³⁴ Chiruheb' li kutan a'an, laj Jihel aj Betel kixwaklesi wi' chik li tenamit Jerikó. Rik'in xtz'aq laj Abirón, li xb'een ralal, kixk'ojob' rub'elankil li tenamit, ut rik'in xtz'aq laj Sejub, li xch'i'p, kixyiib' li xtz'apb'al li tenamit, jo' kixye li Qaawa' chi xtz'uumal re laj Josué, ralal laj Nun.