1 Reyes 15 - Q'eqchi Bible

Laj Abías, awab'ej re Judá

¹ Ak waqxaqlaju chihab' rokik cho'q awab'ej laj Jerobohán, ralal laj Nabat, naq laj Abías kixtikib' awab'ejink sa' xb'eeneb' laj Judá.

² Oxib' chihab' ki'awab'ejink aran Jerusalén. xMahaká xk'ab'a' li xna', xrab'in laj Absalón.

³ A'an ajwi' kixb'aanu li maak kixb'aanu li xyuwa' junxilaj chiru a'an. Moko wank ta li xch'ool rik'in li Qaawa' li xYos, jo' naq kiwank li xch'ool laj David li xyuwa'.

⁴ Ab'anan, sa' xk'ab'a' xraab'al laj David, li Qaawa' li xYos kixk'e naq junelik lochlooq li xsaqenk aran Jerusalén: kixsi jun li ralal chi awab'ejink sa' xna'aj ut kixk'ojob' xch'ool Jerusalén.

⁵ Kixb'aanu chi jo'kan, xb'aan naq laj David kiwank sa' tiikilal chiru li Qaawa' ut ink'a' kixq'et junaq xchaq'rab' li Qaawa' chiru chixjunil li xyu'am. Ka'ajwi' kimaakob'k chiru laj Urías laj Hit.

^6-7 Chixjunil li xyehom xb'aanuhom laj Abías, tz'iib'anb'il sa' xHuhil li xyehom xb'aanuhomeb' li awab'ej re Judá. K'ajo' li yalok ke'xb'aanu chirib'ileb' rib' laj Abías ut laj Jerobohán.

⁸ Naq laj Abías kiq'ajk kisutq'iik rik'ineb' li xxe'toonil yuwa', ke'xmuq sa' xtenamit laj David. Ut li kikanaak sa' xna'aj, a'an laj Asá li ralal.

Laj Asá, awab'ej re Judá

⁹ Ak junmay chihab' rokik cho'q awab'ej laj Jerobohán, awab'ej re Israel, laj Asá kixtikib' taqlank sa' xb'eeneb' laj Judá.

¹⁰ Jun roxk'aal chihab' ki'awab'ejink aran Jerusalén. xMahaká xk'ab'a' li xna', xrab'in laj Absalón.

¹¹ Laj Asá kixb'aanu li nawulak chiru li Qaawa', jo' tz'aqal kiwank laj David li xyuwa'.

¹² Kirisiheb' sa' li tenamit eb' li neke'b'aanunk li tz'i'b'eetalil, ut kixjuk'eb' chixjunileb' li jalanil yos yiib'anb'ileb' xb'aaneb' li xxe'toonil yuwa'eb'.

¹³ Kirisi ajwi' xwankil li xna' cho'q xna'eb' li tenamit, a' lix Mahaká, xb'aan naq kixyiib' jun xjalam u lix Aserá. Laj Asá kixputz'i li tz'i'b'eetalil a'an ut kixk'at chire li nima' Sedrón.

¹⁴ Ab'anan ink'a' ke'juk'mank eb' li tijob'aal chi xjolomeb' li tzuul, us ta laj Asá q'axal tiik xch'ool chirix li Qaawa', chiru chixjunil li xyu'am.

¹⁵ Kixk'am sa' rochoch li Yos chixjunil li k'a'aq re ru kixmayeja laj David li xyuwa', jo' ajwi' li ki'alaak sa' xch'ool xyeechi'inkil: plaat ut oor ut eb' li k'anjelob'aal.

Laj Asá kixk'ojob' jun sumwank rik'in laj Ben-Adad

¹⁶ Junelik ke'wank sa' yalok laj Asá rik'in laj Basá, awab'ej re Israel.

¹⁷ Ut naq laj Basá, awab'ej re Israel, koho chi yalok rik'ineb' laj Judá, kixkawub'resi li tenamit Ramá, re xtz'apb'al xb'e laj Asá, awab'ej re Judá.

¹⁸ Toja' naq laj Asá kixxok chixjunil li plaat ut oor li wank sa' rochoch li Yos ut li wank sa' rochoch li awab'ej, kixk'e reheb' laj k'anjel chiru ut kixtaqla re laj Ben-Adad, awab'ej re Aram. A'an ralal laj Tabrimón ut ri xmam laj Jesión, ut wank sa' li tenamit Damaask. Laj Asá kixtaqla ajwi' xyeeb'al re laj Ben-Adad:

¹⁹ “Qak'eeq qib' sa' sum'aatin laa'in ut laa'at, jo' naq ke'wank laayuwa' rik'in linyuwa' laa'in. Xintaqla li maatan a'in cho'q aawe, plaat ut oor. B'aanu usilal, maatenq'a chik laj Basá, awab'ej re Israel, re naq ink'a' chik tinxch'i'ch'i'i”.

²⁰ Laj Ben-Adad kixpaab' li kixye laj Asá li awab'ej ut kixtaqlaheb' li xjolomileb' laj puub' chi yalok rik'ineb' li tenamit sa' xteepal Israel. Chi jo'kan kixsach ruheb' li tenamit Iyón, Dan ut Abel-Bet-Mahaká, jo' ajwi' chixjunil xteepal Kinerot ut li xteepal Neftalí.

²¹ Naq laj Basá kirab'i resil li kik'ulmank, kixkanab' xkawub'resinkil li tenamit Ramá ut kikanaak aran Tirsá.

²² Toja' naq laj Asá li awab'ej kixb'oqeb' chixjunileb' laj Judá. Ke'xxok eb' li pek ut eb' li che', li yookeb' wi' chi xkawub'resinkil Ramá, ut rik'in a'an ke'xyiib' eb' li tenamit Jeba re Benjamín ut Mispá.

Xkamik laj Asá

²³ Chixjunil li xyehom xb'aanuhom laj Asá, li yalok kixb'aanu, tz'iib'anb'ileb' sa' xHuhil xyehom ut xb'aanuhomeb' li awab'ej re Judá. Sa' xtiixilal kixtaw xyajel li roq.

²⁴ Ut naq laj Asá kiq'ajk kisutq'iik rik'ineb' li xxe'toonil yuwa', ke'xmuq sa' xtenamit laj David li xyuwa'. Moqon chik laj Josafat li ralal kikanaak chi awab'ejink sa' xna'aj.

Laj Nadab, awab'ej re Israel

²⁵ Laj Nadab, ralal laj Jerobohán, ki'ok chi awab'ejink sa' xb'eeneb' laj Israel, naq ak wiib' chihab' chik rokik laj Asá cho'q awab'ej re Judá. Wiib' chihab' kitaqlank sa' xb'eeneb' laj Israel.

²⁶ Laj Nadab kixb'aanu li ink'a' nawulak chiru li Qaawa': kixk'anasi re li xyuwa' ut kixk'am xb'eheb' laj Israel chi maakob'k.

²⁷ Laj Basá, ralal laj Ajías, xkomoneb' li ralal xk'ajol laj Isakar, kixq'etq'eti rib' chiru laj Nadab ut kixk'uub' xkamsinkil. Ut kixkamsi naq sutsu li tenamit Jibetón sa' xteepal Filistea xb'aan laj Nadab jo' ajwi' xb'aaneb' laj Israel.

²⁸ Oxib' chihab' rokik laj Asá cho'q awab'ej re Judá, naq kikamsiik laj Nadab xb'aan laj Basá, ut a'in kikanaak sa' xna'aj.

²⁹ Ka'ajwi' ki'ok cho'q awab'ej, ut kixkamsiheb' chixjunil xsa' li xjunkab'al laj Jerobohán, kixsach ruheb' chixjunileb' li xkomon, jo' kixye li Qaawa' chi xtz'uumal re laj Ajías, li propeet aj Siló.

³⁰ A'an kik'ulmank xb'aan li maak kixb'aanu laj Jerobohán naq kixk'am xb'eheb' laj Israel chi maakob'k ut kixchiq' xjosq'il li Qaawa', xYos laj Israel.

³¹ Chixjunil li xyehom xb'aanuhom laj Nadab, tz'iib'anb'il sa' xHuhil xyehom ut xb'aanuhomeb' li awab'ej re Israel.

³² Junelik ke'wank sa' yalok laj Asá rik'in laj Basá, awab'ej re Israel.

Laj Basá, awab'ej re Israel

³³ Laj Basá, ralal laj Ajías, ki'ok cho'q awab'ej re Israel, naq ak oxib' chihab' rokik chi awab'ejink laj Asá aran Judá. Laj Basá kiwank xwankil sa' li tenamit Tirsá, ut kaahib' xka'k'aal chihab' ki'awab'ejink sa' xb'eeneb' laj Israel.

³⁴ Kixb'aanu li ink'a' nawulak chiru li Qaawa': kixb'aanu li maa'usilal chiru li Qaawa' jo' kixb'aanu laj Jerobohán naq kixk'am xb'eheb' laj Israel chi maakob'k.