1 Reyes 13 - Q'eqchi Bible

Kiq'use'k laj Jerobohán

¹ Naq laj Jerobohán xaqxo chiru li artal, ak ok raj re chi xk'atb'al pom, kiwulak aran Betel jun li propeet aj Judá taqlanb'il xb'aan li Qaawa'.

² Ut ki'aatinak chirix li artal chi kaw xyaab' xkux, jo' kiyehe'k re xb'aan li Qaawa': “At artal, at artal, jo'ka'in xye li Qaawa': «Sa' xyanqeb' li ralal xk'ajol laj David taayo'laaq jun k'uula'al, aj Josías xk'ab'a'. A'an tixmayeja sa' aab'een eb' laj tij li wankeb' sa'eb' li tijob'aal sa' xjolomeb' li tzuul, a'eb' li neke'k'atok pom sa' aab'een. Taak'atoq chik xb'aqeleb' kamenaq poyanam sa' aab'een»”.

³ Chiru ajwi' li kutan a'an, li propeet kixb'aanu jun nimla sachb'ach'oolej naq kixye: “A'an a'in li xnimal eetalil ut li sachb'ach'oolej tixb'aanu li Qaawa': li artal taajuk'e'q, ut li cha li wank sa' xb'een taapajiiq sa' iq'”.

⁴ Naq li awab'ej kirab'i li kixye li propeet chirix li x'artal Betel, laj Jerobohán kixye' li ruq' toj chaq sa' xb'een li artal ut kixye: “Chapomaq li winq a'an”, chan. Ab'an li ruq' li kixye', kichaqik ut ink'a' chik kixtaw xna'aj.

⁵ Toja' naq li artal kijuk'e'k ut li cha li wank sa' xb'een kipaje'k, jo' chanru xk'utunk sa' li xnimal eetalil kixb'aanu li propeet sa' xk'ab'a' li Qaawa'.

⁶ Ut laj Jerobohán li awab'ej kixye re li propeet: “B'aanu usilal, tijon chiwix chiru li Qaawa' laaYos ut tz'aama naq tixk'irtasi li wuq'”. Kitijok li propeet chiru li Qaawa', ut li ruq' laj Jerobohán kik'iraak ut kikanaak jo' naq xwank junxil.

⁷ Chirix chik a'an laj Jerobohán li awab'ej kixye re li propeet: “Okan sa' li wochoch, hilan ut tink'e junaq aamaatan”, chan.

⁸ Ab'an li propeet kixye re li awab'ej: “Us ta raj taasi we li xyiijachil laajunkab'lal, ink'a' tin'ok sa' laawochoch. Ink'a' tintzekanq ut ink'a' tin'uk'aq sa' li na'ajej a'in,

⁹ xb'aan naq jo'ka'in yeeb'il we xb'aan li Qaawa': «Ink'a' tattzekanq, ink'a' tat-uk'aq chi moko tatsutq'iiq chaq sa' li b'e tatxik wi'»”.

¹⁰ Ut koho sa' jalan chik b'e, ink'a' chik kisutq'iik sa' li b'e koho wi' Betel.

¹¹ Sa'eb' li kutan a'an aran Betel kiwank jun li propeet tiix aj chik. Eb' li ralal kole'xseeraq'i re chixjunil li k'aru kixb'aanu laj k'anjel chiru li Yos chiru li kutan a'an aran Betel, jo' ajwi' eb' li aatin kixye re laj Jerobohán li awab'ej.

¹² Naq ke'raqe'k chi aatinak, li xyuwa'eb' kixpatz' reheb': “B'ar xk'am naq xkoho?”, chan. Ut eb' li ralal ke'xk'ut li b'e kixk'am laj k'anjel chiru li Yos li kichalk chaq Judá.

¹³ Toja' naq kixye reheb' li ralal: “K'ehomaq rix linb'uur”. Eb' li ralal ke'xk'e rix li b'uur, ut li yuwa'b'ej kitaqe'k chirix

¹⁴ ut koho chi xsik'b'al laj k'anjel chiru li Yos, ut koxtaw chi chunchu rub'el jun toon chi ji: “Ma laa'at li xtaql li Qaawa' li xchalk chaq Judá?”, chan re. Kichaq'ok a'an ut kixye: “Hehe', laa'inin”.

¹⁵ “Kim sa' li wochoch ut tzekan b'ayaq”, chan li tiixil propeet.

¹⁶ Ab'an li xtaql li Qaawa' kixye: “Ink'a' naru tinxik chawix sa' laawochoch. Ink'a' naru tintzekanq chi moko tin'uk'aq sa' li na'ajej a'in,

¹⁷ xb'aan naq xye we li Qaawa': «Ink'a' tattzekanq, ink'a' tat-uk'aq chi moko tatsutq'iiq chaq sa' li b'e xatchalk wi'», chan we li Qaawa'”.

¹⁸ Ab'anan li tiixil winq kixtik'ti'i ut kixye re: “Laa'in ajwi' jun propeet kama' laa'at. Ut jun x'ánjel li Qaawa' xtaqlaak chaq wik'in re xyeeb'al we: «B'oq chaq aawik'in sa' laawochoch, re taatzekanq ut taa'uk'aq»”.

¹⁹ Toja' naq li propeet li kichalk chaq Judá kisutq'iik, kiwa'ak ki'uk'ak sa' rochoch li jun chik.

²⁰ Ut naq chunchuukeb' sa' meex, li raatin li Qaawa' kichalk rik'in li tiixil propeet li kisutq'isink re li xtaql li Yos li kichalk chaq Judá.

²¹ Ki'aatinak chi kaw ut kixye: “Jo'ka'in xye li Qaawa': Xaq'et raatin li Qaawa' laaYos ut ink'a' xapaab' laachaq'rab'inkil xb'aan.

²² Laa'at xatsutq'iik chaq, xattzekank ut xat-uk'ak sa' li na'ajej xye aawe naq ink'a' tattzekanq tat-uk'aq. Jo'kan naq laach'och'el laasululel ink'a' taamuqe'q sa' xyanqeb' laana' laayuwa'”.

²³ Naq ak ke'raqe'k chi wa'ak chi uk'ak, kixk'e rix li xb'uur li propeet kichalk chaq Judá,

²⁴ ut a'in koho. Ab'an naq yo chi xik, kixk'ul jun li kaqkoj sa' li b'e ut kikamsiik xb'aan: li xch'och'el xsululel kikanaak chi jiljo sa' b'e, ut li b'uur ut li kaqkoj xaqxookeb' chi xk'atq li kamenaq naq ke'kanaak.

²⁵ Wankeb' winq ke'nume'k aran, ke'ril li kamenaq jiljo sa' b'e ut li kaqkoj xaqxo chi xk'atq. Tikto koheb' ut koxe'xseeraq'i sa' li tenamit wan wi' li tiixil propeet.

²⁶ Naq kirab'i a'an li propeet li kisutq'isink re li jun chik sa' li xb'e, kixye: “A'an li xtaql li Yos li xq'et raatin li Qaawa'. Jo'kan naq li Qaawa' xq'axtesink re sa' ruq' li kaqkoj li xputz'i ut xkamsi, jo' xyehe'k re xb'aan li Qaawa'”.

²⁷ Tikto kixye reheb' li ralal: “K'ehomaq rix linb'uur”. Eb' ralal ke'xk'e rix li xb'uur,

²⁸ ut a'an koho ut koxtaw chi jiljo li kamenaq sa' b'e, xaqxookeb' li b'uur ut kaqkoj chi xk'atq. Li kaqkoj toj maji' naxtiw li kamenaq chi moko naxt'upi li b'uur.

²⁹ Toja' naq li tiixil propeet kixxok li kamenaq, li xtaql li Qaawa', kixjilib' chirix li b'uur ut kixk'am sa' li xtenamit re xmuqb'al.

³⁰ Kixk'e li kamenaq sa' li xmuqleb'aal a'an ut ke'yaab'ak chirix: “At, wiitz'in, xat-oso'k”, chankeb' re.

³¹ Naq ak xmuq li kamenaq, kixye reheb' li ralal: “Naq tinkamq laa'in, tineemuq sa' li muqleb'aal xinmuq wi' li xtaql li Qaawa'. B'ar wank li xch'och'el xsululel, aran tineemuq laa'in,

³² xb'aan naq ch'olch'o naq taatz'aqloq ru li raatin li Qaawa' li xye chirix li artal re Betel ut chirix chixjunileb' li tijob'aal li wankeb' sa' xjolomeb' li tzuul, sa' xteepal Samaria”.

³³ Ab'anan us ta kik'ulmank chixjunil a'an, laj Jerobohán ink'a' kixkanab' xb'aanunkil li yib' aj b'aanuhom, ki'ok b'an wi' chik chi xxaqab'ankileb' aj tij re te'k'anjelaq sa'atqeb' li tijob'aal sa' xjolomeb' li tzuul: yalaq ani sa' xyanqeb' li poyanam nawulak chiru ok cho'q aj tij, naxaqab'aak cho'q aj tij.

³⁴ Li yib' aj b'aanuhom a'in kik'amok re laj Jerobohán chi maakob'k jo' ajwi' eb' li ralal xk'ajol. A'an ajwi' xyaalal naq kisache'k li xjunkab'al chi junajwa sa' xb'een li ruuchich'och'.