1 Reyes 12 - Q'eqchi BibleLi nimla ch'utam aran Sikem ( 2 Kr 10 ) 1 Laj Robohán koho Sikem, xb'aan naq aran koheb' chixjunileb' laj Israel re xxaqab'ankil cho'q awab'ej. 2 Ab'an laj Jerobohán, ralal laj Nebat, kirab'i a'in naq toj wan chaq Ejiipt, b'arwi' ki'elelik chiru laj Salomón li awab'ej. 3 Naq ke'xtaqla xb'oqb'al, laj Jerobohán kiwulak rochb'een chixjunil li xkomonileb' laj Israel, ut ke'raatina laj Robohán chi jo'ka'in: 4 “Laayuwa' kaw kooxtaqla chi k'anjelak. Wi laa'at taakotz b'ayaq li kawil k'anjel ut li iiq kixteneb' laayuwa' sa' qab'een, laa'o took'anjelaq chawu”, chankeb'. 5 Laj Robohán kixye reheb': “Ayuqex wan anaqwan, ut sa' oxib' kutan chik texsutq'iiq wi' chik wik'in”. Ut eb' li tenamit koheb'. 6 Toja' naq laj Robohán li awab'ej kixpatz' xna'leb' reheb' li cheekel winq li ke'k'anjelak chiru laj Salomón naq toj yo'yo: “Chanru tinsumeheb' li tenamit a'in?”, chan. 7 Ke'chaq'ok eb' a'an ut ke'xye: “Wi anaqwan tatk'anjelaq sa' xyaalal chiruheb' li tenamit a'in ut taawaatinaheb' rik'in chaab'il aatin, a'anaqeb' aj k'anjel chawu chi junelik”. 8 Ab'an laj Robohán ink'a' kixpaab' li raatineb' li cheekel winq, koho b'an chik chi patz'ok rik'ineb' li saaj al, rech ch'ajomaleb' ut aj k'anjeleb' chiru, 9 ut kixpatz' reheb': “K'aru nekeye laa'ex? K'aru tinsume wi' li tenamit li yookeb' chi xtz'aamankil naq tinkotz b'ayaq li k'anjel kixteneb' linyuwa' sa' xb'eeneb'?”, chan. 10 Eb' li rech ch'ajomal ke'xye re: “Jo'ka'in taasumeheb' wi' li poyanam li xe'yehok aawe naq taakotz b'ayaq li kawil k'anjel kixteneb' laayuwa' sa' xb'eeneb': «Wi kaw xextaqla linyuwa', q'axal kaw wi' chik laa'in. 11 Wi linyuwa' kaw xmin eeru chi k'anjelak, laa'in jwal kaw wi' chik texink'e chi k'anjelak, ut wi a'an xexsak' chi yal tz'uum, laa'in texinsak' rik'in tz'uum wank ch'iich' chi ru'uj»”. 12 Sa' rox li kutan laj Jerobohán rochb'een chixjunileb' li tenamit ke'wulak wi' chik rik'in laj Robohán, jo' yeeb'il xb'aan li awab'ej. 13 Ab'an li awab'ej kaw kiraatinaheb' li tenamit, chi ink'a' kixk'e sa' xch'ool li raatineb' li cheekel winq. 14 Kiraatinaheb' jo' kiyehe'k re xb'aaneb' li saaj al ut kixye reheb': “Wi linyuwa' kaw xexk'e chi k'anjelak, laa'in q'axal wi' chik kaw tintaqlanq sa' eeb'een; ut wi linyuwa' chi tz'uum xe'xsak', laa'in texinsak' rik'in tz'uum wank ch'iich' chi ru'uj”, chan reheb'. 15 Li awab'ej ink'a' kiraj rab'inkil li xe'xtz'aama li tenamit, xb'aan naq ak k'uub'k'u chi jo'kan xb'aan li Qaawa', re naq taatz'aqloq ru li xyehom re laj Jerobohán, ralal laj Nebat, chi xtz'uumal re li propeet Ajías aj Siló. 16 Naq chixjunileb' laj Israel ke'xk'e reetal naq li awab'ej ink'a' kiraj rab'inkileb', ke'xye a'in: “Maak'a' wank qe rik'in laj David! Maak'a' qeechanihom rik'in li ralal laj Jesé! Ex Israel, ayuqex sa' leerochoch chejunjunqal! Ut laa'at, a David, chawil laajunkab'al!”. Toja' naq eb' laj Israel koheb' sa' li xna'ajeb'. 17 Laj Robohán ki'awab'ejink sa' xb'eeneb' laj Israel li wankeb' sa' xteepal Judá. 18 Ut naq laj Robohán li awab'ej kixtaqla laj Adonirán, aj jolominel reheb' li minb'ileb' ru chi k'anjelak, chixjunileb' laj Israel ke'xteni chi pek toj reetal ke'xkamsi. Toja' naq laj Robohán li awab'ej kixseeb'a rib' chi xsik'b'al li xb'eleb'aal ch'iich' re elelik toj Jerusalén. 19 Jo'ka'in naq eb' laj Israel ke'xtz'eqtaanaheb' li ralal xk'ajol laj David chalen toj anaqwan. Li jachok ib' sa' li x'awab'ejihom laj Salomón ( 2 Kr 10,1—11,4 ) 20 Naq chixjunileb' laj Israel ke'xnaw naq laj Jerobohán kisutq'iik chaq, ke'xtaqla xb'oqb'al sa' jun ch'utam ut ke'xxaqab' cho'q awab'ej sa' xb'eeneb' chixjunileb' laj Israel; maajun kixk'e xch'ool chi xtaaqenkileb' li xjunkab'al laj David, ka'aj chik li xteepaleb' aj Judá. 21 Naq laj Robohán kiwulak Jerusalén, kixch'utub'eb' b'eleek'aal mil (180,000) chi winq, sik'b'ileb' ru sa' xyanqeb' chixjunileb' laj Judá ut eb' laj Benjamín, re te'yaloq rik'ineb' laj Israel ut xq'axtesinkil wi' chik li awab'ejilal sa' ruq' laj Robohán, ralal laj Salomón. 22 Ab'an li Qaawa' kiraatina laj Semaías, xtaql li Yos, ut kixye re: 23 “Aatinan rik'in laj Robohán, ralal laj Salomón, awab'ej re Judá, jo'wi' rik'in chixjunileb' li ralal xk'ajol laj Judá, rik'ineb' laj Benjamín ut jo'k'ihaleb' xkomon li tenamit, ut ye reheb': 24 «Jo'ka'in xye li Qaawa': Mexxik chi yalok rik'ineb' laj Israel leerech tenamitul. Sutq'inqex b'an chejunjunqal sa' leerochoch, xb'aan naq li k'aru xk'ulmank, laa'in xink'uub'ank re»”. Naq eb' a'an ke'rab'i li raatin li Qaawa', ke'xpaab' ut ke'sutq'iik sa' rochocheb', jo' kiyehe'k reheb' xb'aan li Qaawa'. 25 Laj Jerobohán kixtaqla xyiib'ankil chi chaab'il li tenamit Sikem, li wank chi xtzuulul Efraín, ut aran kikanaak chi wank. Moqon ki'elk aran ut kixyiib' ajwi' chi chaab'il li na'ajej Penuel. 26 Ab'anan kixye sa' xch'ool: “Anaqwan mare li tenamit te'raj sutq'iik wi' chik rub'el xwankil li xjunkab'al laj David. 27 Wi eb' li tenamit a'in te'xik chi mayejak aran Jerusalén sa' rochoch li Qaawa', li xch'ooleb' taasutq'iiq wi' chik rik'in laj Robohán, awab'ej re Judá, ut laa'in tine'xkamsi”. 28 Jo'kan naq laj Jerobohán kixpatz' xna'leb', kixyiib' wiib' xjalam u saaj wakax yiib'anb'ileb' rik'in oor, ut kixye reheb' li tenamit: “Tz'aqalaq li xik chi mayejak aran Jerusalén. A'an a'in laayos, at Israel, li ki'isink chaq aawe sa' li tenamit Ejiipt”. 29 Toja' naq kixkanab' jun sa' li na'ajej Betel ut li jun chik kixkanab' chaq sa' li na'ajej Dan. 30 Jo'kan naq eb' laj Israel ke'ok chi maakob'k, xb'aan naq eb' li tenamit koheb' aran Betel ut Dan chi loq'onink. 31 Laj Jerobohán kixyiib'atq ajwi' eb' li tijob'aal sa' xjolomeb' li tzuul ut kixxaqab'eb' aj tij li maawa'eb' ralal xk'ajoleb' laj Leví. 32 Chirix chik a'an kixxaqab' xkutankil li ninq'e li taawanq sa' li o'laju xb'e li xwaqxaq po, jo' chanru neke'ninq'ehik eb' laj Judá. Ut koxmayejaq chiru li artal aran Betel, sa' xk'ab'a'eb' li wakax kixyiib'. Aran Betel kixxaqab'eb' ajwi' aj tij cho'q reheb' li tijob'aal kixyiib' sa' xjolomeb' li tzuul. 33 Sa' li kutan o'laju xb'e li xwaqxaq po koho laj Jerobohán chi mayejak chiru li artal kixyiib' Betel (sa' li po yal kixk'oxla junes rib' a'an ut kixxaqab' cho'q xninq'eheb' laj Israel). Koho aran Betel ut kixmayeja pom chiru li artal. |
Q'eqchi DC Bible © Bible Society in Guatemala, 2005.
Bible Society in Guatemala