1 Reyes 11 - Q'eqchi Bible

Eb' li rixaqil laj Salomón

¹ Us ta ak wank cho'q tz'aqal rixaqil li xrab'in laj Parahón, laj Salomón li awab'ej kiwank chik naab'al li rixaqil, jalan xtenamiteb': ixqeb' aj Mohab, aj Amón, aj Edom, aj Sidón ut aj Hit.

² A'aneb' li tenamit b'arwi' kixye li Qaawa' reheb' laj Israel naq ink'a' taaruuq te'xsik' rixaqileb': “Wi teelaq'ab' eerib' rik'ineb' a'an, ch'olch'o naq te'xb'alaq'i leech'ool chi xloq'oninkil li xyoseb'”, chan li Yos. Ab'an laj Salomón kixk'ameb' cho'q rixaqil xb'aan naq kixraheb':

³ o'lajuk'aal xkab' o'q'ob' (700) rixaqil, junes xrab'ineb' awab'ej, kiwank laj Salomón ut o'lajuk'aal (300) xkab' rixaqil.

⁴ Sa' chik li xtiixilal, eb' li ixq ke'po'ok xch'ool laj Salomón re xloq'oninkileb' li jalanil yos, ut li xch'ool moko kiwank ta junes cho'q re li Qaawa' li xYos, jo' naq kiwank laj David li xyuwa'.

⁵ Laj Salomón kixloq'oni ru lix Astarté, xyoseb' laj Sidón, ut kixloq'oni ajwi' ru laj Milkón, xtz'eqb'eetalil yos eb' laj Amón.

⁶ Laj Salomón kixb'aanu li ink'a' us chiru li Yos, ut ink'a' kixpaab' li Qaawa' chi anchal xch'ool, jo' kixb'aanu laj David li xyuwa'.

⁷ Chiruheb' li kutan a'an, laj Salomón kixk'e chi yiib'aak x'artalil laj Kamós, xtz'eqb'eetalil yos eb' laj Mohab, aran sa' xb'een li tzuul li wank chi xk'atq Jerusalén. Kixk'e ajwi' chi yiib'aak x'artalil laj Milkón, xtz'eqb'eetalil yos eb' laj Amón.

⁸ Jo'kan ajwi' kixb'aanu cho'q reheb' li rixaqil aj jalanil tenamit, li neke'xk'at ruutz'u'ujeb' ut neke'mayejak chiruheb' li xyos.

⁹ Li Qaawa', xYos laj Israel, k'ajo' naq kijosq'o'k rik'in laj Salomón xb'aan naq kixkanab' xloq'oninkil li Qaawa', li kixk'ut rib' ka' sut chiru

¹⁰ ut ak xyehom re naq ink'a' raj tixtaaqe eb' li jalanil yos. Ab'an laj Salomón ink'a' kixk'e sa' xch'ool li xchaq'rab' li Qaawa'.

¹¹ Jo'kan naq li Qaawa' kixye re laj Salomón: “Laa'at xab'aanu chi jo'ka'in ut ink'a' xapaab' linsumwank ut eb' li waatin li xink'e chapaab'. Jo'kan naq twisi laawankil ut tink'e re jun aj k'anjel chawu.

¹² Ab'anan ink'a' tinb'aanu naq toj yo'yooqat, sa' xk'ab'a' xraab'al laj David laayuwa'; tinmaq' b'an sa' ruq' laawalal.

¹³ Chi moko tinmaq' chixjunil li awab'ejihom, tink'e b'an jun teepeb' li ralal xk'ajol laj Israel rub'el xwankil laawalal, sa' xk'ab'a' xraab'al laj David, laj k'anjel chiwu, ut sa' xk'ab'a' li tenamit Jerusalén sik'b'il ru inb'aan”.

Eb' li xik' neke'ilok re laj Salomón

¹⁴ Toja' naq li Qaawa' kixwaklesi chaq jun li winq Hadod xk'ab'a', Edom xtenamit, re xik' taaril laj Salomón. A'an xkomoneb' li ralal xk'ajol li awab'ej re Edom.

¹⁵ Naq laj David kixq'ax ruheb' laj Edom, laj Johab, xjolomileb' laj puub', koho chi xmuqb'aleb' li kamenaq, ut kixkamsiheb' chixjunileb' li winq aj Edom.

¹⁶ Waqib' po kikanaak aran laj Johab rochb'eeneb' chixjunileb' laj Israel, toj reetal ke'xchoy xkamsinkil chixjunileb' li winq aj Edom.

¹⁷ Ab'an laj Hadad, li saaj al, rochb'een wiib' oxib'eb' rech tenamitul, aj k'anjeleb' chiru li xyuwa', ke'elelik.

¹⁸ Ke'elk Madián ut ke'wulak Parán. Aran ke'xsik'eb' winq aj tenq'ahom reheb' ut koheb' Ejiipt; koxe'okaq rik'in laj Parahón, awab'ej re Ejiipt, ut a'an kixk'e rochocheb', kixyeechi'i xtzekemqeb' ut kixk'e ajwi' xch'och'eb'.

¹⁹ Laj Hadad kixtaw usilal chiru laj Parahón, li kixk'e cho'q rixaqil li riitz'in lix Tajpenés li rixaqil.

²⁰ Li riitz'in lix Tajpenés kiwank jun xk'uula'al, aj Kenubat xk'ab'a'. Lix Tajpenés kixk'iiresi li k'uula'al a'in sa' rochoch laj Parahón, sa' xyanqeb' li ralal laj Parahón.

²¹ Naq laj Hadad kirab'i resil naq ak xq'ajk xsutq'iik laj David, jo'wi' laj Johab, xjolomileb' laj puub', kixye re laj Parahón: “Kanab'in chi sutq'iik sa' lintenamit”, chan.

²² Laj Parahón kixsume: “K'aru xlajk aawe arin wik'in naq taawaj xik sa' laatenamit?”, chan. Kixye laj Hadad: “Maak'a' xlajk we, ab'anan chakuy inmaak, kanab'in chi xik sa' lintenamit”.

²³ Jo'kan ajwi', li Qaawa' kixk'e naq laj Resón, ralal laj Eliadá, xik' taaril laj Salomón. Laj Resón a'an li ki'elelik chiru laj Hadadéser, laj eechal re, awab'ej re Sobá;

²⁴ moqon chik kixch'utub' jun ch'uuteb' li winq ink'a' useb' xna'leb', ut anaqwan naxjolomiheb'. Naq laj David kixkamsiheb' laj Sobá, ki'elelik laj Resón toj Damaask, koxna'ajunq aran ut kiwank cho'q awab'ej re Damaask.

²⁵ Xik' kirileb' laj Israel chiru chixjunil li xyu'am laj Salomón. A'an ajwi' kixb'aanu laj Hadad, xb'aan naq kixtz'eqtaanaheb' laj Israel ut kiwank cho'q awab'ej re Siria.

Naq laj Jerobohán kixq'etq'eti rib' chiru laj Salomón

²⁶ Laj Jerobohán a'an ralal laj Nebat, Seredá xtenamit, sa' xteepal Efraín. Li xna' a'an jun xmalka'an ixq, xSeruhá xk'ab'a'. Kixq'etq'eti rib' chiru laj Salomón li awab'ej, naq toj yo chi k'anjelak chiru.

²⁷ A'an a'in li xyaalal naq kixq'etq'eti rib' chiru li awab'ej. Naq laj Salomón yo chi xtz'akankil li na'ajej Miló, yal re xramb'al jun b'e sa' xtenamit laj David li xyuwa',

²⁸ kixk'e reetal naq kaw rib' li winq a'an, a' laj Jerobohán, ut q'axal naxnaw jolomink. Laj Salomón kiril naq li saaj al a'an jwal naxnaw li k'anjel naxb'aanu; jo'kan naq kixk'e cho'q xjolomileb' chixjunileb' li xteepal li ralal xk'ajol laj José.

²⁹ Sa' jun kutan laj Jerobohán ki'elk chaq Jerusalén ut kik'ule'k sa' b'e xb'aan li propeet Ajías, Siló xtenamit, lanlo chaq sa' jun ak'il t'ikr. Naq xjuneseb' sa' li b'e,

³⁰ laj Ajías kixchap li ak' t'ikr li lanlo wi', kixpej ut kab'laju jachal kirisi,

³¹ ut kixye re laj Jerobohán: “K'am lajeeb' jachalaq aawe, xb'aan naq jo'ka'in xye li Qaawa', xYos laj Israel: «Tinmaq' li awab'ejihom sa' ruq' laj Salomón ut tink'e lajeeb' teepaleb' aawe.

³² Jun teep taakanaaq cho'q re a'an, sa' xk'ab'a' xraab'al laj David li xyuwa' ut xb'aan xraab'al Jerusalén, li tenamit sik'b'il ru inb'aan sa' xyanqeb' chixjunil xteepaleb' laj Israel.

³³ Xb'aan naq laj Salomón xinxtz'eqtaana ut x'ok chi xloq'oninkil ru lix Astarté, xyoseb' laj Sidón, laj Kamós, xyoseb' laj Mohab, ut laj Milkón, xyoseb' laj Amón, ut ink'a' chik nab'eek sa' tiikilal chiwu, ink'a' chik naxpaab' li waatin ut linchaq'rab', jo' kixb'aanu laj David li xyuwa'.

³⁴ Ab'anan ink'a' tinmaq' chixjunil li awab'ejihom sa' ruq', taawanq b'an xwankil jo' najtil yo'yooq, sa' xk'ab'a' xraab'al laj David laj k'anjel chiwu, linsik'om ru, li junelik kixpaab' li waatin ut linchaq'rab'.

³⁵ A'ut tinmaq' li awab'ejihom sa' ruq' li ralal ut tink'e cho'q aawe li lajeeb' jachal chi teep.

³⁶ Jun teep ajwi' tink'e re li ralal, re naq laj David, laj k'anjel chiwu, junelik wanq junaq xsaqenk lochlooq chiwu aran Jerusalén, sa' li tenamit sik'b'il ru inb'aan re naq aran tinwanq laa'in.

³⁷ Tatinxaqab' laa'at chi taqlank ut tat-awab'ejinq sa' xb'eeneb' li jo'k'ihal taawaj. Laa'ataq li awab'ej re Israel.

³⁸ Wi taapaab' chixjunil li tinye aawe, wi tatwanq sa' xyaalal ut taab'aanu li tiikilal chiwu rik'in xpaab'ankil li waatin ut linchaq'rab' jo' kixb'aanu laj David laj k'anjel chiwu, laa'in wanqin aawik'in ut tinxaqab' laawankilal chi junajwa jo' naq kinb'aanu re laj David.

³⁹ Tinq'axtesi aawe li tenamit Israel ut tink'ut xxutaaneb' li ralal xk'ajoleb' laj David, xb'aan li maak kixb'aanu laj Salomón. Ab'anan ink'a' chi junajwa»”.

⁴⁰ Jo'kan naq laj Salomón kiraj raj xkamsinkil laj Jerobohán, ab'an a'an ki'elelik ut koho Ejiipt, wan wi' laj Sosak, awab'ej re Ejiipt, ut aran kiwank chaq toj naq kikamk laj Salomón.

Xkamik laj Salomón

⁴¹ Chixjunil li xyehom xb'aanuhom laj Salomón ut li xnimal xchoxahil na'leb', tz'iib'anb'ileb' sa' li hu “Eb' li xb'aanuhom laj Salomón” xk'ab'a'.

⁴² Ka'k'aal chihab' kiwank laj Salomón chi awab'ejink sa' li tenamit Jerusalén ut sa' xb'een chixjunil Israel.

⁴³ Ut naq kiq'ajk kisutq'iik rik'ineb' li xna' xyuwa', kimuqe'k sa' xtenamit laj David li xyuwa'. Toja' naq laj Robohán li ralal kikanaak chi awab'ejink sa' xna'aj.