1 Reyes 10 - Q'eqchi Bible

Li xna'eb' li tenamit Sabá kirula'ani laj Salomón

¹ Li xna'eb' li tenamit Sabá kirab'i resil li xchoxahil na'leb' laj Salomón ut koho Jerusalén chi xyalb'al rix rik'in patz'om jwal ch'a'aj xsumenkil.

² Kiwulak Jerusalén rik'in k'iila kameey li ke'k'amok chaq sununkil b'an, oor chi yo'oon ut xchaq'alil ru pek. Naq kiwulak rik'in laj Salomón, kixye re chixjunil li patz'om kixk'oxla.

³ Ut laj Salomón kixsume chixjunil li xpatz'om: maak'a' junaq patz'om ink'a' ta kixsume.

⁴ Naq li xna'eb' li tenamit Sabá kixk'e reetal chixjunil li xchoxahil na'leb' laj Salomón, ut kiril li rochoch,

⁵ li xq'emal tzekemq naxtzeka, li rochocheb' laj k'anjel chiru, li xtiqib'ankileb' laj jolominel ut chanru neke'k'anjelak, eb' li neke'k'ehok ruk'a' ut eb' li k'atb'il mayej nayeechi'imank sa' rochoch li Qaawa', q'axal kisachk xch'ool chi rilb'aleb'

⁶ ut kixye re li awab'ej: “Q'axal yaal li xwab'i chaq chawix sa' lintenamit, chirix laachoxahil na'leb' ut laab'aanuhom!

⁷ Ink'a' xinpaab' li nayeemank aran; ab'an anaqwan xinchalk ut xwil rik'in wu. Xink'e reetal naq chi moko xyiijachil li xe'xseeraq'i we! Laachoxahil na'leb' ut laab'ihomal naxq'ax ru chixjunil li xwab'i.

⁸ Us xaq reheb' li ixq wankeb' aawik'in, us xaq reheb' laj k'anjel li wankeb' chawu junelik ut neke'rab'i laachaab'il k'a'uxl!

⁹ Loq'oninb'il taxaq li Qaawa' laaYos, li k'ojk'o xch'ool chawix ut xatxk'ojob' sa' xk'ojarib'aal laj Israel! Sa' xk'ab'a' xraab'aleb' laj Israel chi junelik, li Qaawa' xatxxaqab' cho'q awab'ej re naq tattaqlanq sa' xb'eeneb' sa' xyaalal ut sa' tiikilal”, chan.

¹⁰ Chirix chik a'an li xna'eb' li tenamit Sabá kixsi waqk'aal (120) chi tumin junes oor; kixsi ajwi' k'iila sununkil b'an ut xchaq'alil ru pek. Maajun sut kisiimank naab'al xsununkil b'an laj Salomón jo' xk'ihal kixsi li xna'eb' li tenamit Sabá.

¹¹ Li xk'iila jukub' laj Jirán, li ke'k'amok chaq oor aran Ofir, ke'xk'am ajwi' chaq naab'al li che' sándalo xk'ab'a' ut naab'al li xchaq'alil ru pek.

¹² Rik'in li che' a'in, laj Salomón kixyiib' xramb'al ru li rochoch li Qaawa' jo' ajwi' xramb'al li rochoch li awab'ej; kixyiib' ajwi' eb' li wajb' cho'q reheb' laj b'ichanel. Chalen toj anaqwan maajun sut chik ilb'il ru li xk'ihal li che' sándalo, jo' chaq sa' li kutan a'an.

¹³ Li awab'ej Salomón kixsi re li xna'eb' li tenamit Sabá li jo'k'ihal kiraj ut kixpatz', a' jalan wi li maatan ki'alaak sa' xch'ool xsiib'al laj Salomón. Chirix chik a'an li xna'eb' li tenamit Sabá kisutq'iik sa' li xtenamit, rochb'eeneb' laj k'anjel chiru.

Li xnimal xloq'al ut xb'ihomal laj Salomón

¹⁴ Rajlal chihab' laj Salomón naxk'ul waqib' xkaalajuk'aal xkab' o'q'ob' (666) chi tumin oor,

¹⁵ chi ink'a' k'eeb'ileb' sa' ajl li toj neke'xk'e laj k'ay, eb' laj yakonel, eb' li awab'ej re Arabia jo'wi' eb' li neke'jolomink li junjunq chi tenamit.

¹⁶ Laj Salomón kixtaqla xyiib'ankil lajeek'aal (200) chi koleb' ch'iich' jwal ninq, yiib'anb'ilaqeb' rik'in tz'aqal oor: kixha'lesi lajeek'aal xkab' o'q'ob' (600) chi tumin oor re xyiib'ankil a'an.

¹⁷ Ut kixk'e ajwi' chi yiib'aak o'lajuk'aal (300) chi kok' koleb' ch'iich': numenaq waqib' liib'r li chaab'il oor li ke'xyiib' wi' li junjunq. Chirix chik a'an li awab'ej kixk'uula chixjunil a'in sa' li ochoch “K'iche' re Líbano” xk'ab'a'.

¹⁸ Kixtaqla ajwi' xyiib'ankil jun li nimla k'ojarib'aal yiib'anb'il rik'in marfil, li kixletzexi ru rik'in tz'aqal oor.

¹⁹ Li k'ojarib'aal a'in, wank waqib' xtaqarib'aal ut sursu li anleb'aal ib'; wank jun xna'aj uq'mej chi junqpak'alil ut xaqxookeb' wiib' xjalam u li kaqkoj chi xk'atqeb' li xna'aj uq'mej,

²⁰ ut kab'lajuheb' chi jalam u kaqkoj wankeb' chi xaqxook sa' xb'eeneb' li taqarib'aal, junjunq chi xjunqpak'alil. Maajun chik junaq awab'ejihom kixyiib' jun k'ojarib'aal jo' a'an!

²¹ Chixjunileb' li x'uk'leb' sek' laj Salomón li awab'ej junes oor yiib'anb'ileb' wi'; jo'kan ajwi' chixjunileb' li sek' li wank sa' li kab'l “K'iche' re Líbano” xk'ab'a' tz'aqal chaab'il oor yiib'anb'ileb' wi'. Sa'eb' li kutan a'an, naq laj Salomón wan chaq chi awab'ejil, ink'a' jwal kik'eemank xtz'aq li plaat,

²² xb'aan naq li awab'ej wank xjukub'eb' re Tarsis rochb'een li xjukub'eb' laj Jirán, ut rajlal ox ox chihab' neke'k'ulunk eb' li jukub' aran Tarsis ut neke'xk'am chaq oor, plaat, marfil, eb' li b'atz' ut eb' li chakak.

²³ Jo'kan naq laj Salomón li awab'ej kixq'ax ruheb' chixjunileb' li awab'ej sa' ruuchich'och', rik'in b'ihomal ut choxahil na'leb'.

²⁴ Chixjunileb' sa' ruuchich'och' neke'raj rilb'al ru laj Salomón, re seeraq'ik rik'in ut xnawb'al li xchoxahil na'leb' k'eeb'il re xb'aan li Yos.

²⁵ Ut li junjunq, rajlal chihab', naxk'e xsimaatan: a' li k'a'aq re ru yiib'anb'il rik'in plaat ut oor, jo'wi' aq'ej, ch'iich', sununkil b'an, kawaay ut muul.

²⁶ Laj Salomón kixch'utub'eb' li b'eleb'aal ch'iich' ut eb' li neke'b'eek chirix kawaay: wank lajeek'aal xka o'q'ob' (1,400) chi b'eleb'aal ch'iich' ut kab'laju mil (12,000) chi winq li neke'b'eek chirix kawaay, ut ke'kanaak sa'eb' li tenamit xna'ajeb' li b'eleb'aal ch'iich' ut Jerusalén, re te'wanq wan wi' li awab'ej.

²⁷ Laj Salomón kixk'e chi tamk li plaat aran Jerusalén jo' eb' li pek; ut li che' yaw k'ajo' xk'ihaleb' naq kiwank: chanchan xk'ihal li xche'el li sikomoor li neke'wank chiru taq'a.

²⁸ Li xkawaayeb' laj Salomón neke'chalk chaq sa' li na'ajej Musrí ut Silisia, xb'aan naq eb' laj yakonel neke'loq'ok aran cho'q re li awab'ej chi junaj xtz'aq.

²⁹ Jun b'eleb'aal ch'iich' loq'b'il chaq Ejiipt a'an lajeek'aal xkab' o'q'ob' (600) chi tumin plaat, ut jun kawaay a'an lajeeb' xwaqxaqk'aal (150) xtz'aq. Neke'k'ayimank ajwi' reheb' li x'awab'ejeb' laj Hit ut li x'awab'ejeb' laj Aram sa' xk'ab'a'eb' laj k'anjel chiru laj Salomón.