1 Pedro 5 - Q'eqchi Bible

Chirixeb' laj k'amol b'e

¹ Nintz'aama chiruheb' laj k'amol b'e li wankeb' sa' eeyanq, laa'in aj k'amol b'ehin ajwi' jo'eb' a'an ut tz'aqal wilom li rahilal kixk'ul li Kriist, laa'in li xintz'aqonk sa' li nimla loq'al taak'utb'esimanq chi seeb':

² cheberesiheb' li xkarneer li Yos k'eeb'ileb' cheril ut chek'aak'aleheb' chi ink'a' yal minb'ilaq eeru, chi anchalaq b'an eech'ool jo' naraj li Yos; moko re ta xsik'b'al eetumin, sa' eech'ool b'an chi'alaaq;

³ ink'a' texnumtaaq sa' xb'eeneb' li k'eeb'ileb' cheril, rik'in b'an xk'amb'al li chaab'il b'e chiruheb' li karneer.

⁴ Chi jo'kan, sa' xq'ehil li xk'utb'esinkil rib' li xnimal ru aj K'aak'alenel, teek'ul xnimal eeloq'al, a' leeq'ajkamunkil chi junelik.

Chirixeb' laj paab'anel

⁵ Jo'kan ajwi' laa'ex li saaj al, chexpaab'anq chiruheb' li xcheekel winqilaleb' li Iklees, ut chetiqib'aq eerib' chejunilex rik'in q'unil ch'oolej cherib'il eerib', xb'aan naq: “Li Yos xik' narileb' li b'ach'b'ach'eb', ab'an narusilaheb' li q'uneb' xch'ool”.

⁶ Chekub'si b'i' eerib' rub'el li xloq'laj wankilal li ruq' li Yos, re naq tixtaqsi eewankil naq taawulaq xq'ehil.

⁷ Q'axtesihomaq sa' ruq' li Yos chixjunil li k'a'uxl wi' eech'ool, xb'aan naq A'an na'ilok eere.

⁸ Aj'ajaq ru leek'a'uxl ut chexyo'leq! Li xik' na'ilok eere, a' laj tza, yo chi sutink re xsik'b'al ani tixnuq', jo' jun kaqkoj japjo re.

⁹ Cheramaq chiru ut kawaq eech'ool sa' leepaab'aal, rik'in xnawb'al naq leeras eeriitz'in li wankatqeb' sa' ruuchich'och', a' ajwi' li rahilal a'in yookeb' chi xkuyb'al.

¹⁰ Naq akaq xekuy b'ayaq li rahilal, li Yos taatz'aqob'resinq eere eeru, tixk'e xkawub' eech'ool, taawaklesinq ut taaxaqab'anq eere. A'an ajwi' li Yos li kib'oqok eere sa' li xjunelik loq'al sa' xk'ab'a' li Kriist, xb'aan xnimal xrahom.

¹¹ A'an laj eechal re li wankilal chi junelik q'e kutan. Jo'kan taxaq.

Xraqik li hu

¹² Laj Silvano xinxtenq'a chi xtz'iib'ankil li wib' oxib' chi aatin a'in; laa'in nink'oxla naq a'an jun was wiitz'in tiik xch'ool. Xintz'iib'ak eerik'in re xk'eeb'al eena'leb' jo' ajwi' re xch'olob'ankil cheru naq relik chi yaal naq a'an tz'aqal li xrahom li Yos. K'ehomaq eech'ool chi wank sa' li xrahom chi junelik.

¹³ Li Iklees li wank Babilonia, a' li sik'b'il ru kama' laa'ex, naxtaqla xsahil eech'ool, jo' ajwi' laj Markos li walal.

¹⁴ K'ehomaq xsahil eech'ool cherib'il eerib' rik'in santil utz'uk u sa' li rahok. Chiwanq taxaq li tuqtuukil usilal eerik'in chejunilex li wankex rik'in li Kriist.