1 Corintios 7 - Q'eqchi Bible

Chirix li sumlaak

¹ Chirix li k'aru xetz'iib'a chaq we, us raj cho'q re li winq naq ink'a' taach'e'oq ixq.

² Ab'an li junjunq chi winq chiwanq rixaqil ut li junjunq chi ixq chiwanq xb'eelom re naq ink'a' te't'ane'q sa' li maak.

³ Li b'eelomej chixk'e re li rixaqil jo' li teneb'anb'il sa' xb'een; jo'kan ajwi' chixb'aanu li ixaqilb'ej rik'in li xb'eelom.

⁴ Moko a' ta li ixaqilb'ej yaal re sa' xb'een li xtz'ejwal, a' b'an li xb'eelom. Jo'kan ajwi' li b'eelomej moko a'an ta yaal re sa' xb'een li xtz'ejwal, a' b'an li rixaqil.

⁵ Meeram li wank cherib'il eerib'; naru teekuy eerib' wi xek'uub' a'an sa' wiib'al, yal chiru jarub'aq kutan, re naq teek'e eech'ool chi tijok. Ab'anan moqon teelaq'ab' wi' chik eerib' re naq mexraale laj tza sa' xk'ab'a' naq ch'a'aj xkuyb'al eerib'.

⁶ Ninye a'in re eerusilankil, moko re ta eetaqlankil.

⁷ Nawaj raj naq chixjunileb' li winq jo'qeb' ta laa'in. Ab'an li junjunq wank xmaatan xk'ulum rik'in li Yos: wank xk'ulum xmaatan chi jo'kan ut wank jalan chik xmaatan.

⁸ Reheb' li ink'a' sumsuukeb' jo'wi' reheb' li xmalka'an ninye a'in: us raj te'kanaaq jo' laa'in.

⁹ Ab'an wi ink'a' neke'xkuy rib', sumlaaqeb'. Jwal us naq te'sumlaaq chiru naq te'atawanq.

¹⁰ Reheb' li sumsuukeb' ninye a'in (moko laa'in ta nink'ehok li xtaqlankileb' a'in, a' b'an li Qaawa'): li ixaqilb'ej ink'a' chixjach rib' rik'in li xb'eelom.

¹¹ Ut wi tixjach rib', misumlaak chik, malaj chixk'amaq wi' chik rib' sa' usilal rik'in li xb'eelom. Jo'kan ajwi' li b'eelomej mixkanab' li rixaqil.

¹² Reheb' li junch'ol ninye a'in (maawa' xyehom li Qaawa', inyehom b'an laa'in): wi junaq aj paab'anel wank rixaqil maak'a' xpaab'aal ut a'in naxk'ul ru wank rik'in, mixkanab' li rixaqil.

¹³ Ut wi junaq ixq wank xb'eelom maak'a' xpaab'aal ut a'in naxk'ul ru wank rik'in, mixkanab' li xb'eelom.

¹⁴ Xb'aan naq li b'eelomej maak'a' xpaab'aal a'an santob'resinb'il sa' xk'ab'a' li rixaqil, ut li ixaqilb'ej maak'a' xpaab'aal a'an santob'resinb'il sa' xk'ab'a' li xb'eelom aj paab'anel. Wi ta ink'a' jo'kan, eb' leeralal eek'ajol tz'aj raj ru li xyu'ameb', a'ut anaqwan santeb'.

¹⁵ Ab'anan wi li winq malaj li ixq maak'a' xpaab'aal naraj xjachb'al rib' rik'in li xsum'aatin, xjachaq rib': naq nak'ulmank a'an, laj paab'anel winq malaj laj paab'anel ixq moko b'ak'b'ookeb' ta chik, xb'aan naq li Yos kexb'oq re wank sa' tuqtuukil usilal.

¹⁶ K'a' ta nakanaw wi', at ixq, ma taakol laab'eelom? Ut laa'at winq, k'a' ta nakanaw wi' ma taakol laawixaqil?

¹⁷ Li junjunq chiwanq jo' chanru k'eeb'il re xb'aan li Qaawa'; chiwanq jo' b'oqb'il wi' li junjunq xb'aan li Yos. A'an a'in li ninchaq'rab'iheb' wi' chixjunileb' li Iklees.

¹⁸ Ma xatxb'oq li Yos naq ak aak'ulum li sirkunsisyon? Maamuq naq aak'ulum. Ma xatxb'oq chi maji' aak'ulum? Maak'ul li sirkunsisyon.

¹⁹ Li sirkunsisyon maak'a' naraj naxye; jo'kan ajwi' li wank chi maak'a' a'an. Li na'ajmank ru, a'an xpaab'ankil li xchaq'rab' li Yos.

²⁰ Jo' chanru wank li junjunq naq xb'oqe'k xb'aan li Yos, jo'kan ajwi' chikanaaq.

²¹ Ma wankat cho'q aj loq'b'il k'anjel naq xatb'oqe'k? Matk'oxlak. Ut us ta truuq tat-elq rub'el xwankil laj eechal aawe, chak'anjela chi us li wank cho'q aj loq'b'il k'anjel.

²² Xb'aan naq wi loq'b'il aj k'anjel wan wi' junaq naq xb'oqe'k xb'aan li Qaawa', a'an ach'ab'anb'il chik xb'aan li Qaawa'. Jo'kan ajwi' ani wank chi ach'ab'anb'il naq xb'oqe'k, a'an aj k'anjel chik chiru li Kriist.

²³ Loq'b'ilex chi terto eetz'aq! Meek'e eerib' cho'q xmooseb' li winq!

²⁴ Ex was wiitz'in, jo' chanru wank li junjunq naq xb'oqe'k, jo'kan ajwi' chikanaaq chiru li Yos.

²⁵ Chirixeb' li ink'a' sumsuukeb' maak'a' inchaq'rab'inkil xb'aan li Qaawa', ab'anan ninye li nink'oxla jo' winq aj paab'ajel sa' xk'ab'a' xnimal ruxtaan li Qaawa'.

²⁶ Laa'in nink'oxla naq us raj taakanaaq li winq chi jo'kan, sa' xk'ab'a' xch'a'ajkilal li kutan wanko wi'.

²⁷ Ma wank aawixaqil? Maasik' xjachb'al aawib'. Ma maak'a' aawixaqil? Maak'oxla xsik'b'al.

²⁸ Ab'anan wi tatsumlaaq, moko maak ta taab'aanu. Ut wi li ixqa'al taasumlaaq, moko maak ta a'an. Ab'anan eb' a'in rahilal te'xtaw sa' li tz'ejwalej, ut laa'in nawaj raj naq ink'a' teek'ul a'an.

²⁹ A'in li ninye eere, ex was wiitz'in: ak yo chi nume'k li honal. Jo'kan utan, eb' li wankeb' rixaqil che'wanq jo' maak'a' rixaqileb'.

³⁰ Eb' li neke'yaab'ak jo'kaqeb' li ink'a' neke'yaab'ak. Eb' li saheb' sa' xch'ool jo'kaqeb' li ink'a' saheb' sa' xch'ool. Eb' li neke'loq'ok jo'kaqeb' li maak'a' wankeb' re.

³¹ Eb' li neke'xyal xsahil li ruuchich'och' a'in, jo'kaqeb' li ink'a' neke'xyal xsahil. Xb'aan naq li rilob'aal li ruuchich'och' a'in yal taanume'q.

³² Nawaj raj naq maak'a' taaxik wi' eech'ool. Li ink'a' sumsu naxik xch'ool chirix li k'a' re ru re li Qaawa', jo' chanru taawulaq chiru li Qaawa'.

³³ Li sumsu naxik xch'ool chirix li k'a' re ru re li ruuchich'och', jo' chanru taawulaq chiru li rixaqil:

³⁴ chi jo'kan jachjo li xch'ool. Li ixq ink'a' sumsu jo' ajwi' li tuq'ixq naxik xch'ooleb' chirix li k'a' re ru re li Qaawa', re naq santaqeb' li xjunxaqalil ut li xmusiq'. A'ut li sumsu naxik xch'ool chirix li k'a' re ru re li ruuchich'och', jo' chanru taawulaq chiru li xb'eelom.

³⁵ Ninye a'in re eerusilankil, ut ink'a' re eera'lenkil. Nawaj xtoch'b'al eech'ool chirix li jwal us, re naq wanqex sa' sum'aatin rik'in li Qaawa' chi maak'a' k'oxlak.

³⁶ Ab'an wi wank junaq winq naxk'oxla naq tento taasumlaaq rik'in li tz'aamanb'il xb'aan, xb'aan ak tz'aqal chik chi k'ame'k li ixq, xb'aanuhaq li taaraj. Moko maak ta: che'sumlaaq.

³⁷ A'ut wi junaq winq ak xk'oxla chi us li tixb'aanu chi anchal xch'ool ut ink'a' minb'il ru, ut naraj roxloq'inkil xtuq'ixqilal li ixq, chaab'il tixb'aanu naq ink'a' taasumlaaq rik'in.

³⁸ Jo'kan utan, li nasumlaak rik'in li tuq'ixq tz'aamanb'il xb'aan, us tixb'aanu. Ut li ink'a' nasumlaak, q'axal us wi' chik tixb'aanu.

³⁹ Li ixq, b'ak'b'o rik'in li xb'eelom a' yaal jo' najtil tyo'yooq li winq; ut wi taakamq li winq, ach'ab'anb'il chik li ixq chi sumlaak rik'in jalan chik li tixk'ul wi' xch'ool, ab'an ka'ajwi' jo' naraj li Qaawa'.

⁴⁰ Ab'anan nink'oxla naq q'axal sahaq chik sa' xch'ool wi taakanaaq xjunes: a'an li na'leb' nink'e laa'in; ut nink'oxla naq laa'in ajwi' wank xMusiq' li Yos wik'in.