1 Corintios 2 - Q'eqchi Bible

¹ Ex was wiitz'in, naq xinwulak sa' eeyanq, ink'a' xinwulak chi xpuktesinkil eere li xChaab'il Esil li Yos rik'in xninqal ru aatin malaj rik'in xninqal ru na'leb',

² xb'aan naq maak'a' xwaj xnawb'al sa' eeyanq, ka'ajwi' li Jesukriist, ut a'in k'eeb'il chiru krus.

³ Xinwulak sa' eeyanq chi maak'a' inmetz'ew, chi yook inxiw ut ninsiksotk.

⁴ Xin'aatinak ut xinch'olob' xyaalal moko rik'in ta xchaq'alil ru aatin neke'q'unb'esink ch'oolej, rik'in b'an li xk'utb'esinkil rib' xwankil li Musiq'ej,

⁵ re naq ink'a' k'ojk'ooq leepaab'aal sa' xb'een xna'leb'eb' li winq, sa' xb'eenaq b'an xwankil li Yos.

⁶ Yaal ajwi' naq sa' xyanqeb' li ak kaweb' sa' li paab'ank nokooch'olob'ank xninqal ru na'leb', ab'an maawa' xna'leb' li ruuchich'och' a'in chi moko xna'leb'eb' li neke'taqlank sa' ruuchich'och', li ak yo chi sachk xwankileb'.

⁷ Nokoo'aatinak chirix xna'leb' li Yos, muqmuukil na'leb' li ink'a' natawmank ru ut kawresinb'il chaq xb'aan li Yos rub'elaj xtiklajik li ruuchich'och' re naq twanq xnimal qaloq'al.

⁸ Maajun sa' xyanqeb' li neke'taqlank sa' li ruuchich'och' a'in ke'xtaw ru li na'leb' a'in, xb'aan naq wi ta ke'xtaw ru, ink'a' raj ke'xk'e chiru krus li Qaawa', laj Eechal re li loq'al.

⁹ Ab'anan, jo' naxye li Santil Hu: “Li ink'a' ilb'il ru, li ink'a' ki'ab'iik, chi moko kik'oxlaak sa' xch'ool li winq, a'an li kixkawresi li Yos cho'q reheb' li neke'rahok re”.

¹⁰ Chixjunil a'an kik'utb'esiik chiqu xb'aan li Yos sa' xk'ab'a' li Musiq'ej, ut li Musiq'ej chixjunil nalajxtz'ili rix, a' ajwi' li xchamal xk'a'uxl li Yos.

¹¹ Ani tab'i' sa' xyanqeb' li winq nanawok chi us li xch'ool li winq? Ma ink'a' ka'ajwi' li xmusiq' li winq li wank rik'in a'an? Jo'kan ajwi' maa'ani nanawok xchamal xk'a'uxl li Yos, ka'ajwi' li xMusiq' li Yos.

¹² Ut laa'o ink'a' xqak'ul xmusiq' li ruuchich'och', xqak'ul b'an li Musiq'ej li nachalk rik'in li Yos, re naq tqataw ru chixjunil li xqamaatani rik'in li Yos.

¹³ A'in tz'aqal li nokoo'aatinak wi', ink'a' rik'in aatin tzolb'il rik'in xna'leb' li ruuchich'och', rik'in b'an li aatin xqatzol rik'in li Musiq'ej: yooko chi xch'olob'ankil li k'a' re ru re li Musiq'ej, rik'in li aatin k'utb'il xb'aan li Musiq'ej.

¹⁴ Li winq li maak'a' xMusiq' li Yos rik'in moko naxk'ulub'an ta li k'aru nachalk rik'in xMusiq' li Yos; memil na'leb' b'an cho'q re. Ut ink'a' naruhank chi xnawb'al a'an, xb'aan naq ka'ajwi' rik'in li Musiq'ej naru xtawb'al xyaalal.

¹⁵ A'ut li winq li wank xMusiq' li Yos rik'in, chixjunil naxtaw ru ut maa'ani naraqok aatin sa' xb'een.

¹⁶ Naxye li Santil Hu: “Ani xnawok ru xk'a'uxl li Qaawa'? Ani taaruhanq chi xk'eeb'al xna'leb' A'an?”. Ab'anan laa'o wank xk'a'uxl li Kriist qik'in.