1 Corintios 13 - Q'eqchi Bible

Li rahok a'an q'axal loq'

¹ Us ta ninnaw raatinob'aaleb' li winq ut eb' li ánjel, ab'anan wi ink'a' ninrahok, chanchanin jun li ch'iich' natzintzotk malaj junaq wajb' natzanb'ak xyaab'.

² Wi wank ta inmaatan re aatinak jo' propeet, wi ninnaw ta chixjunileb' li xmuqmuukil na'leb' li Yos ut chixjunil li k'a'uxl, wi ta tz'aqlojenaq ru linpaab'aal re xjalb'al xna'aj eb' li tzuul, ab'anan wi ink'a' ninrahok, maak'a' nin'ok wi'.

³ Wi ta tinjek'i chixjunil linjunkab'lal reheb' li neb'a' ut tinq'axtesi ta wib' sa' xam, ab'anan wi ink'a' ninrahok, maak'a' ninra chirix a'an.

⁴ Li rahok wank xkuyum sa' chixjunil; a'an chaab'il. Li rahok ink'a' nakaqalik, ink'a' naxk'e xwankil xjunes, ink'a' naxq'etq'eti rib',

⁵ ink'a' naxb'aanu li ink'a' us, ink'a' naxsik' xchaab'ilal xjunes, ink'a' napo'k, ink'a' naxk'e sa' xch'ool li ink'a' us naxk'ul,

⁶ ink'a' nasaho'k sa' xch'ool rik'in li xmaak'a'il li tiikilal, nasaho'k b'an rik'in li yaal.

⁷ Li rahok chixjunil nariiqani, chixjunil naxpaab', chixjunil naroyb'eni, chixjunil naxkuy.

⁸ Li rahok maajoq'e na'oso'k. Taaraqe'q li maatan re aatinak jo' propeet, taaraqe'q li maatan re aatinak sa' jalanil aatin. Taawulaq xq'ehil naq ink'a' chik taak'anjelaq li maatan re xtawb'al ru chixjunil.

⁹ Xb'aan naq kach'in li qak'a'uxl ut kach'in ajwi' li naqanaw chi musiq'anb'il li qach'ool xb'aan li Yos.

¹⁰ Naq tol'elq li tz'aqal yaal, taa'oso'q li ink'a' tz'aqal re ru.

¹¹ Naq toj ch'ina'alin chaq, nin'aatinak jo' li ch'ina'al, nink'oxlak jo' li ch'ina'al ut ninna'leb'ak jo' li ch'ina'al. Ab'an naq xinwinqilo'k, xintz'eq chirix linch'ool chixjunil li k'a'aq re ru re li kach'inal.

¹² Anaqwan nokoo'ilok yal jo' sa' junaq lem moymoy ru, ab'anan sa' jun kutan toxqaka'ya li Yos jo' tz'aqal chanru na'ilok. Anaqwan kach'in ajwi' ninnaw, ab'anan sa' jun kutan toxinnaw ru, kama' naq li Yos naxnaw wu.

¹³ Anaqwan junelik xaqxookeb' li oxib' a'in: li paab'aal, li oyb'enink ut li rahok. Ab'an li q'axal nim xwankil sa' xyanqeb', a'an li rahok.