1 Corintios 12 - Q'eqchi Bible

Li xmaatan li junjunq k'eeb'il xb'aan li Musiq'ej

¹ Ex was wiitz'in, chirix li maatan naxk'e li Musiq'ej twaj teetaw xyaalal.

² Nekenaw chi us naq, jo'q'e maak'a' chaq leepaab'aal, nekek'e eerib' chi k'ame'k yalaq chanru chirixeb' li memil yos.

³ Jo'kan naq nink'e chenaw naq maajun junaq li na'aatinak rik'in xMusiq' li Yos naru tixye: “Maa'usinb'ilaq taxaq li Jesus!”, ut maajun ajwi' naru tixye: “Li Jesus a'an li Qaawa'!”, wi ink'a' musiq'anb'il xb'aan li Santil Musiq'ej.

⁴ Jalan jalanq li qamaatan, ab'an li Musiq'ej a'an ajwi'.

⁵ Jalan jalanq li qak'anjel, ab'an li Qaawa' a'an ajwi'.

⁶ Jalan jalanq li qab'aanuhom, ab'an jun ajwi' li Yos li naxb'aanu chixjunil rik'in chixjunileb'.

⁷ K'eeb'il re li junjunq li xmaatan li nak'utunk wi' li Musiq'ej, re rusilankileb' chixjunil.

⁸ Wan xmaatani rik'in li Musiq'ej xnimal xk'a'uxl re aatinak; jun chik xmaatani aatinak chirix chaab'il k'a'uxl li nachalk rik'in ajwi' li Musiq'ej;

⁹ wan chik xmaatani xpaab'aal, rik'in ajwi' li Musiq'ej. Wan k'eeb'il xmaatan re k'irtasink rik'in li jun chi Musiq'ej;

¹⁰ wan chik xmaatani re xb'aanunkil sachb'ach'oolej; wan k'eeb'il xmaatan re aatinak jo' propeet; wan xmaatani xnawb'al ruheb' li musiq'ej; wan ajwi' xmaatani aatinak sa' jalanil aatin li ink'a' natawmank ru; wan chik k'eeb'il xmaatan chi xch'olob'ankil xyaalal eb' li aatin a'in.

¹¹ Ab'an chixjunil a'in a' ajwi' li jun chi Musiq'ej nab'aanunk re, ut A'an naxjek'i re li junjunq jo' chanru naraj.

¹² Jo' naq li tz'ejwalej junaj chirib'il ut wank naab'al li xcha'al, ut chixjunileb' li xcha'alil a'an us ta naab'aleb', ab'an jun ajwi' chi tz'ejwalej naq wankeb', jo'kan ajwi' li Kriist.

¹³ Xb'aan naq kub'sinb'il qaha' rik'in jun chi Musiq'ej re xk'uub'ankil ru jun chi tz'ejwalej chiqajunilo laa'o, us ta aj judiiy malaj aj griego, eb' li loq'b'il moos ut eb' li ach'ab'anb'ileb'. Ut chiqajunilo xoo'uk'ak rik'in jun chi Musiq'ej.

¹⁴ Jo'kan ajwi' li tz'ejwalej moko yal jun ta xcha'al wank, naab'al b'an.

¹⁵ Wi ta li oqej tixye: “Laa'in maawa'in li uq'ej; jo'kan naq moko xcha'alin ta li tz'ejwalej”, ma maawa'aq tab'i' xcha'al li tz'ejwalej yal xb'aan a'an?

¹⁶ Ut wi li xikej tixye: “Laa'in maawa'in xsa' uhej; jo'kan naq moko xcha'alin ta li tz'ejwalej”, ma maawa'aq tab'i' xcha'al li tz'ejwalej yal xb'aan a'an?

¹⁷ Wi ta chixjunil li tz'ejwalej a'an xsa' uhej, chan raj ru naq too'ab'inq? Ut wi chixjunil ta xikej, chan raj ru naq taqutz' li k'a'aq re ru?

¹⁸ Ab'anan li Yos kixk'e sa' xna'aj li junjunq chi xcha'al li tz'ejwalej, jo' chanru kiraj xch'ool.

¹⁹ Wi ta chixjunileb' li xcha'al li tz'ejwalej junaj ta ru, b'ar raj wank li tz'ejwalej?

²⁰ Us b'i', naab'aleb' li cha'alej, ab'an jun ajwi' chi tz'ejwalej.

²¹ Ink'a' naru tixye xsa' li uhej re li uq'ej: “Maak'a' nakat-ok wi' we!”. Chi moko li jolomej naru tixye reheb' li oqej: “Maak'a' nekex'ok wi' we!”.

²² Ink'a', a'eb' b'an chik li xcha'al li qatz'ejwal li maak'a' neke'ok wi' naq naqak'oxla, a'aneb' li q'axal neke'k'anjelak.

²³ Eb' li maak'a'eb' xloq'al naq naqak'oxla, a'aneb' li q'axal raarookeb' qab'aan; ut eb' li xcha'al li qatz'ejwal li nokooxutaanak xb'aan, q'axal tiqtookeb' chi chaab'il qab'aan.

²⁴ Xb'aan naq eb' li qacha'al li ink'a' nokooxutaanak xb'aan, ink'a' neke'raj a'an. Li Yos kixk'uub' li tz'ejwalej, ut q'axal chik xloq'al kixk'e reheb' li xcha'al li maak'a'eb' xloq'al,

²⁵ re naq maak'a'aq jachok ib' sa' li tz'ejwalej, chixjunileb' b'an li cha'alej te'xtenq'a rib' chirib'ileb' rib'.

²⁶ Wi ra naxk'ul junaq xcha'al li tz'ejwalej, chixjunileb' li cha'alej neke'raho'k rochb'een. Wi junaq cha'alej na'oxloq'iik, chixjunileb' neke'saho'k rochb'een.

²⁷ Laa'ex xtz'ejwal li Kriist, ut xcha'alex chejunjunqal.

²⁸ Jo'ka'in li Yos kixxaqab' xk'anjel li junjunq sa' li Iklees: xb'een xb'een eb' li apóstol, sa' xkab' eb' li propeet; sa' rox eb' laj tzolonel; chirix a'an k'eeb'il li maatan re xb'aanunkil sachb'ach'oolej; chirix chik a'an k'eeb'il li maatan re k'irtasink, re tenq'ank, re jolomink, re aatinak sa' jalanil aatin.

²⁹ Ma chixjunileb' tab'i' apostoleb'? Ma chixjunileb' tab'i' propeeteb'? Ma chixjunileb' tab'i' aj tzoloneleb'? Ma chixjunileb' tab'i' aj b'aanuhom sachb'ach'oolej?

³⁰ Ma chixjunileb' tab'i' k'eeb'ileb' xmaatan re k'irtasink? Ma chixjunileb' tab'i' neke'aatinak sa' jalanil aatin? Ma chixjunileb' tab'i' neke'xch'olob' xyaalal eb' li aatin a'in?

³¹ Cheq'axtesi leech'ool chi xsik'b'al li xninqal ru eemaatan. Ut toj tink'ut cheru jun li b'e q'axal wi' chik chaab'il.