1 Corintios 10 - Q'eqchi Bible

Eb' laj Israel ke'xtz'eq xmaataneb'

¹ Ex was wiitz'in, twaj teenaw naq eb' li qana' qayuwa' chixjunileb' ke'wank chaq rub'el li choql ut chixjunileb' ke'nume'k sa' li palaw.

² Chixjunileb' ke'kub'siik xha' sa' li choql ut sa' li palaw re xtaaqenkil laj Moisés,

³ ut chixjunileb' ke'tzekank rik'in jun chi musiq'ejil tzekemq.

⁴ Chixjunileb' ajwi' ke'uk'ak rik'in jun chi musiq'ejil uk'a', xb'aan naq neke'uk'ak rik'in li musiq'ejil saqoonak li yo chi taaqenk reheb'; ut li saqoonak, a'an li Kriist.

⁵ Ab'an q'axal naab'al reheb' a'an ink'a' kiwulak chiru li Yos li xna'leb'eb', ut ke'kanab'aak chi kamenaqeb' sa' li chaqich'och'.

⁶ Chixjunil a'an kik'ulmank jo' loq'laj eetalil cho'q qe, re naq ink'a' tqarahi ru li ink'a' us kama' naq eb' a'an ke'xrahi chaq ru.

⁷ Mex'okenk chi xloq'oninkil li yal k'oxlanb'il yos jo' wan ke'b'aanunk chaq sa' xyanqeb' a'an, kama' tz'iib'anb'il sa' li Santil Hu: “Eb' li tenamit ke'chunlaak chi wa'ak chi uk'ak, ut chirix a'an ke'wakliik chi xajok ut chi maakob'k”.

⁸ Mooko'b'eetak jo' ke'xb'aanu eb' a'an, ut ke'kamk oxib' xka'k'aal mil chiru jun kutan.

⁹ Miqayal rix li Qaawa', jo' wan ke'b'aanunk sa' xyanqeb' a'an, ut ke'sache'k xb'aaneb' li k'anti'.

¹⁰ Chi moko choowech'oq, jo' wan ke'b'aanunk sa' xyanqeb' a'an, ut ke'sache'k xb'aan laj Sachonel.

¹¹ Chixjunil a'an kichalk sa' xb'eeneb' jo' loq'laj eetalil, ut kitz'iib'aak re xk'eeb'al qana'leb' laa'o li wanko sa' roso'jikeb' li kutan.

¹² Jo'kan utan, li naxk'oxla naq kaw xaqxo, chirilaq rib' mit'ane'k.

¹³ Maji' nachalk sa' eeb'een junaq aaleek q'axal nim chiru li neke'xk'ul chixjunileb'. Li Yos naxb'aanu li xyeechi'i, ut ink'a' texxkanab' chi aaleek jo' ink'a' truuq teekuy. Rik'in li aaleek, li Yos tixk'e ajwi' eere chanru teekuy re naq us tex'elq.

Li xsek' li Qaawa' ut li xsek'eb' li maa'us

¹⁴ Jo'kan utan, ex was wiitz'in raarookex inb'aan, tz'eqtaanahomaq li jalan loq'onink.

¹⁵ Yookin cheraatinankil jo'kex li wankeb' xna'leb'. Ut laa'ex naru teeye ma us li ninye malaj ink'a'.

¹⁶ Li osob'tesinb'il sek' nokooyoxink wi' ma maawa' tab'i' a'an li sumwank rik'in xkik'el li Kriist? Ut li wa naqajachi ma maawa' tab'i' a'an li sumwank rik'in xtz'ejwal li Kriist?

¹⁷ Wank jun ajwi' chi wa; jo'kan naq, us ta naab'alo, ab'an junaj chi tz'ejwalej naq wanko, xb'aan naq chiqajunilo nokootz'aqonk rik'in li jun chi wa.

¹⁸ K'ehomaq reetal li tenamit Israel. Eb' li neke'tzekank re li namayejaak, ma ink'a' tab'i' neke'tz'aqonk rik'in li artal?

¹⁹ K'aru xyaalal li yookin chi xyeeb'al? Ma yookin chi xyeeb'al naq li k'aru mayejanb'il chiruheb' li yal k'oxlanb'il yos wank xyaalal malaj naq eb' li yal k'oxlanb'il yos wankeb' xyaalal?

²⁰ Ink'a', ninye b'an naq li k'aru neke'xmayeja eb' li ink'a' neke'xpaab' li Kriist, chiruheb' li maa'us neke'xmayeja ut ink'a' chiru li Yos. Ut laa'in ink'a' nawaj naq yooqex chi tz'aqonk rik'ineb' laj tza.

²¹ Ink'a' naru teeruk' xsa' li xsek' li Qaawa' ut xsa' xsek'eb' li maa'us. Ink'a' naru textz'aq rik'in li xmeex li Qaawa' ut rik'in xmeexeb' li maa'us.

²² Malaj tqaj xyoob'ankil xsowenal li Qaawa'? Ma q'axal kawo tab'i' laa'o chiru li Yos?

Xtawb'al xyaalal

²³ “Chixjunil naru ninb'aanu!”, ab'an moko chixjunil ta us xb'aanunkil. “Chixjunil naru ninb'aanu!”, ab'an moko chixjunil ta nakab'lank li komonil.

²⁴ Maa'ani chixsik' li k'aru us cho'q re xjunes, a'aq b'an li us cho'q re li ras riitz'in chixsik'.

^25-26 Li Qaawa' a'an laj eechal re li ruuchich'och' jo'wi' chixjunil li wank chisa'. Jo'kan naq naru teetzeka chixjunil li nak'ayimank sa' k'ayiil chi ink'a' teepatz'i b'ar xchalk, re naq maak'a'aq eek'a'uxl naq teetzeka.

²⁷ Wi junaq ink'a' napaab'ank texxb'oq chi tzekank ut wi naxk'ul eech'ool xik rik'in, tzekahomaq jo'ch'inal jo'nimal li taak'ehe'q eere chi ink'a' teepatz'i b'ar xchalk xb'aan xq'unal eech'ool.

²⁸ Ab'an wi junaq taayehoq eere: “A'in xmayejaak chiruheb' li yal k'oxlanb'il yos”, meetzeka xb'aan li xyehok eere, jo'wi' re naq ink'a' taa'ok xk'a'uxl.

²⁹ Ink'a' yookin chi xyeeb'al a'in chirix laak'a'uxl laa'at, chirix b'an xk'a'uxl li jun chik, xb'aan naq chan put ru naq twech'iiq wix laa'in li wankin chi ach'ab'anb'il, xb'aan jalan aj k'a'uxl?

³⁰ Wi laa'in ninyoxink chirix li xintz'aqk, k'a'ut naq tinq'useq' rik'in li k'aru ninyoxi?

³¹ Jo'kan utan, wi texwa'aq tex'uk'aq malaj k'a'aq chik re ru teeb'aanu, b'aanuhomaq chixjunil re xloq'oninkil ru li Yos.

³² Meeluktesi xch'ooleb' laj Judiiy chi moko eb' laj Griego malaj li x'Iklees li Yos,

³³ jo' naq laa'in ninyal inq'e chi xk'ojob'ankileb' xch'ool chixjunileb' rik'in chixjunil. Ink'a' ninsik' li k'aru us cho'q we injunes, a' b'an li us cho'q re chixjunileb', re naq te'kole'q.