إنجيل مرقس 9 - Qatifi New Arabic Version / الترجمة العربية القطيفية الجديدة

¹ و قال ليهم: «بأمانة أقول ليكم: إن بعض الواقفين هني، ما بيضوقوا طعم الموت إلا بعد ما يشوفوا ملكوت الله جا بسلطان.»

التجلي

² و بعد ستة أيام، أخد يسوع بطرس ويعقوب ويوحنا، وركب وياهم لوحدهم جبل عالي، وهناك تجلى قدامهم،

³ وصارت ثيابة لماعة أبيض من الثلج، ما في لون أبيض في الأرض يقدر يلمع زيها.

⁴ وظهر ليهم إيليا و موسى وكانوا يتكلموا ويا يسوع.

⁵ و قام بطرس يقول ليسوع: «يا معلم، أحسن لينا ما نقعد هني. خلينا ننصب ثلاث خيامات: وحدة لك، و وحدة لموسى، و وحدة لإيليا!»

⁶ لأن من الخوف ما كان داري وش يقول، لأنهم كانوا ميتين من الخوف.

⁷ وجت سحابة وخيمت عليهم، و طلع صوت من السحابة يقول: «هدا هو أبني الحبيب. أسمعوا كلامه!»

⁸ وفجأة طالعوا حوالهم و ما شافوا أحد وياهم غير يسوع لحاله.

⁹ و هم نازلين من الجبل، وصاهم إنهم ما يقولوا لأحد بإلا شافوه، إلا بعد ما يقوم إبن الإنسان من بين الأموات.

¹⁰ و سووا إلا وصاهم به، وسألوا نفسهم «وشو يعني القيامة من بين الأموات؟»

¹¹ و بعدين سألوه: «ليش يقولوا الكتبة إن إيليا لازم يجي أول؟»

¹² و رد عليهم و قال: «صحيح، إن إيليا بيجي أول و على ايده بيتجدد كل شي. و چدي أنكتب في الكتاب إن إبن الإنسان لازم يتألم واجد وينهان.

¹³ و أنا أقول ليكم: إن إيليا فعلًا جا، وسووا فيه إلا يمبوا، زي إلا أندكر عنه في الكتاب!»

يسوع يشفي صبي فيه شيطان

¹⁴ و لما وصلوا إلى باقي التلاميد، شافوا جماعة كبيرة حواليهم وجماعة من الكتبة يتحاججوا وياهم.

¹⁵ و لما شافوه الجماعة، أستغربوا كلهم وركضوا عشان يسلموا عليه.

¹⁶ و قام سألهم: «عن ويش كنتوا تتحاججوا وياهم؟»

¹⁷ و رد عليه واحد من الجماعة و قال: «يا معلم، جبت لك ولدي وفيه روح مخليتنه أطرم،

¹⁸ كل ما أستقوى عليه يصرعه، ويقوم يزبد ويطحن أسنانه ويتيبس. وطلبت من تلاميدك إنهم يطردوه، و لكن ما قدروا».

¹⁹ قال ليهم يسوع: «أنتون جيل ماعندكم ايمان! إلى متى بقعد وياكم؟ إلى متى بتحملكم؟ تِجِيبوه ليي!»

²⁰ و جابوه إلى يسوع. و الروح من شاف يسوع، قام صرع الولد، وطاح الولد على الأرض و قام يتدحلب ويزبد.

²¹ و قام يسوع سأل أبو الولد: «من متى يصير فيه چدي؟» و جاوبه: "من صغره."

²² و واجد كان يفلته في النار أو في الماي عشان يموته. و لكن إدا أنت قادر إنك تسوي شي، أتحنن علينا و عِينَا!»

²³ و قال له يسوع: «إدا أنت مصدق ومؤمن أني أقدر، للمؤمن كل شي ممكن يصير!»

²⁴ وصرخ أبو الولد على طول بصوت عالي و قال: «أنا مؤمن، فعين عدم إيماني».

²⁵ و لما شاف يسوع الجماعة تجمعوا حواليه بسرعة، قام أنتهر الروح النجسة و قال له: «يا الروح الأخرس الأصمخ، أنا آمرك، أطلع منه ولا ترجع تدخله مرة ثانية!»

²⁶ صرّخ الروح وصرع الولد بقوه، و بعدين طلع. وصار الولد كأنه ميت، حتى إن أكثر الجماعة قالوا: «دكو مات!»

²⁷ و لكن يسوع مسك أيده وقومه، و قام.

²⁸ و بعد ما دخل يسوع البيت، سألوه تلاميده لما كانوا لوحدهم وياه: «ليش ما قدرنا أحنا نطرد الروح؟»

²⁹ و رد عليهم: «هدا النوع ما ينطرد إلا بالصلاة!»

يسوع يتنبأ مرة ثانية بموته

³⁰ و بعدين مشوا من هناك وعبروا منطقة الجليل، و يسوع ما كان يمبى أحد يعرف إنه موجود،

³¹ لأنه كان يعلم تلاميده ويقول ليهم: «إن إبن الإنسان بيتسلّم للناس عشان يقتلوه، و بعد ما ينقتل بيقوم في اليوم الثالث».

³² و لكن هم ما فهموا عليه، وخافوا يسألوه.

من الأعظم

³³ و بعدين راحوا قرية كفرناحوم، و لما كان في البيت، قام سأل تلاميده: «في ويش كنتوا تتناقشوا و أنتون في الطريق؟».

³⁴ و سكتوا، لأنهم في الطريق كانوا يتحاججوا ويا بعض في منهو الأعظم بينهم.

³⁵ و قعد، و عيط على تلاميده الإطنعشر، و قال ليهم : «إدا بغى واحد يصير في المقدمة، فلازم يخلي نفسه آخر شيء و يصير خادم للكل!»

³⁶ بعدين أخد ولد صغير ووقفه في وسطهم، وضمه في حضنه، و قال ليهم:

³⁷ «أي واحد يقبل بإسمي واحد زي هالطفل الصغير، فكأنه قابلني أنا. و إلا يقبلني، فهو في الحقيقة ما يقبلني أنا، لكنه يقبل إلا أرسلني».

إلا مو ضدنا فهو ويانا

³⁸ و تكلم يوحنا و قال: «يا معلم، شفنا واحد يطرد شياطين بأسمك،، فقمنا منعناه لأن هو مو من أتباعنا!»

³⁹ و قال له يسوع: «لا تمنعوه! لأن ما في أحد يقدر يسوي معجزة بأسمي، وبعدين على طول يقدر يتكلم عليّ بشر.

⁴⁰ و إلا مهو ضدنا فهو ويانا.

⁴¹ و إلا يسقيكم كاس ماي بإسمي لأنكم من أتباع المسيح، فبأمانة أقول ليكم إن جزاه ما بيضيع!

مسببين العثرات

⁴² وأي واحد يكون عثرة لواحد من الأطفال إلا آمنوا بي، أحسن له ينربط في رقبته حجر الرحى - وهو حجر كبير مستخدم لطحن القمح- ويغرق في قاع البحر.

⁴³ فإدا كانت إيدك فخ إلك، أقطعها: أحسن لك إنك تكون في الحياة وإيدك مقطوعة من أن يكون عندك إيدين وتروح جهنم، للنار إلا ما تنطفي

⁴⁴ مكان ما حتى الدود ما يموت، والنار ما تنطفي

⁴⁵ و إدا كانت رجولك فخ إلك، أقطعها: أحسن لك إنك تكون في الحياة ورجولك مقطوعة من أن يكون عندك رجولين و يرموك في جهنم، في النار إلا ما تنطفي.

⁴⁶ مكان ما الدود ما يموت، والنار ما تنطفي.

⁴⁷ و إدا كانت عيونك فخ إلك، اقلعها: أحسن لك تدخل ملكوت الله وعيونك مقلوعة من أن تكون عندك عيونين وتنرمى في نار جهنم.

⁴⁸ مكان ما الدود يموت، والنار ما تنطفي.

⁴⁹ و كل إنسان بيتملح بالنار.

⁵⁰ الملح زين، و لكن إدا راحت منه ملوحته، فچيفه بترجعوا له طعمه؟ خل يكون عندكم ملح في نفسكم، وصيروا مسالمين ويا بعض!»