إنجيل مرقس 3 - Qatifi New Arabic Version / الترجمة العربية القطيفية الجديدة

يسوع يشفي في السبت

¹ ودخل يسوع المعبد مرة ثانية. و كان في هناك رجَّال إيده يابسة.

² و قاموا يراقبوه عشان يشوفوا إدا بيشفيه في يوم السبت، عشان يلاقوا حجه ويتهموه.

³ و قال للرجال إلا إيده يابسة: «قوم أوقف في الوسطى!»

⁴ و بعدين سألهم: «هل يجوز في السبت فعل الخير أو فعل الشر؟ تخليص نفس أو قتلها» و ظلوا ساكتين.

⁵ وطلّع فيهم يسوع و هو متضايق من قساوة قلوبهم، و قال للرجال: «مد إيدك!» و مدها، وإلاهي صارت سليمة.

⁶ و على طول طلعوا الفريسيين من المعبد، وياهم جماعة حزب هيرودُس، وتآمروا عليه عشان يقتلوه.

الجماعات تتبع يسوع

⁷ و بعدين قرب يسوع وتلاميده من جهة البحر. ولحقوه جماعة ناس كبيرة من مناطق الجليل و من منطقة اليهودية

⁸ و أورشليم وأَدومية و ما بعد نهر الأردن، وجماعة كبيرة من ضواحي صور وصيدا، و جوا له لما سمعوا بإلا سواه.

⁹ و أمر يسوع تلاميده أنهم يجهزوا سفينة صغيرة مخصصة له، عشان ما يزاحمهوه الجماعة،

¹⁰ لأنه شفى ناس واجد، و صار كل مريض يقرب منه عشان يلمسه.

¹¹ وكانت الأرواح النِجْسة لما تشوفه تخر له ساجدة، وتصرّخ: «أنت إبن الله!»

¹² و كان يحدرها بشدة من أنها تنشر الخبر عن منهو هو.

الرسل الإطنعشر

¹³ بعدين ركب يسوع فوق الجبل، وعيط على إلا يمباهم، وراحوا له.

¹⁴ وعيّن إطنعشر شخص عشان يبقوا وياه ويرسلهم عشان يبشروا،

¹⁵ وتكون ليهم سلطة على طرد الشياطين.

¹⁶ والتلاميد الإطنعشر إلا عيّنهم، هم: سمعان وسماه بطرس،

¹⁷ ويعقوب بن زَبدي، ويوحنا أخوه، وسماهم بُوَانَرْجِسَ، يعني أولاد الرعد،

¹⁸ وَأَنْدَرَاوُسُ، وَفِيلِبُّسُ، وَبَرْثُلَمَاوُسُ، وَمَتَّى وَتُومَا، وَيَعْقُوبُ بْنُ حَلْفَى، وَتَدَّاوُسَ، وَسِمْعَانُ الْقَانَوِيُّ -إلا يدعم أستقلال اليهود من سلطة الرومان-،

¹⁹ ويهودا الإسخريوطي إلا خان يسوع.

يسوع يوم أتهموه عائلته والكتبة

²⁰ و بعدين رجع البيت، وتجمعوا الناس، و ما قدر يسوع وتلاميده حتى ياكلوا لقمة.

²¹ و لما سمعوا نسايب يسوع بالتجمع، جوا عشان ياخدوه، لأنه أنتشر خبر عنه إنه أستخف.

²² و الكتبة إلا جو من أورشليم، قالوا: «ترا هو مسكون بَعْلَزَبُولَ، وإنه يطرد الجن برئيس الجن!»

²³ و نادهم عشان يجوا له وكلمهم بالأمثال، و قال ليهم: «كيف يقدر جني يطرد جني تاتي؟

²⁴ لأن إدا أنقسمت مملكة على نفسها، فما تقدر تصمد.

²⁵ و إدا أنقسم بيت معين على نفسه، فمهو ما يقدر يصمد.

²⁶ والشيطان إدا ناقض نفسه وأنقسم على نفسه فهو ما يقدر يصمد، لكن ينتهي أمره!

²⁷ ما أحد يقدر يدخل بيت شخص قوي ويبوق أغراضه إلا إدا ربَّط الشخص القوي أول شي. و بعدين يبوق بيته.

²⁸ بكل أمانة أقول ليكم: إن كل الخطايا مغفورة لبني البشر، حتى كلام الكفر إلا يقولوه.

²⁹ و لكن إلا يتمسخر على الروح القدس، ما ينغفر له له أبدا، بالعكس هو يستحق العقاب الأبدي عشان هالخطيئة إلا سواها».

³⁰ و قال ليهم هالكلام لأنهم قالوا: «إن فيه جني - روح نجسة- ساكنه فيه!»

³¹ وجوّا أخوته و أمه، ووقفوا برا البيت ورسلوا له أحد عشان يقواوا له أنهم يمبوه.

³² و كانوا قاعدين حوالية جماعة كبيرة، و قالوا له: «أمك وأخوتك برا يمبوك!»

³³ و رد عليهم يسوع و قال: «منهم أمي و أخوتي؟»

³⁴ بعدين طالع في القاعدين حوالية و قال ليهم: «هدولين هم إلا قاعدين هني هم أمي وأخوتي،

³⁵ لأن إلا يسوي إرادة الله هو أخويي وأختي وأمي!»