الإنجيل زي ما كتبه مَتَّى 24 - Qatifi New Arabic Version / الترجمة العربية القطيفية الجديدة

علامات نهاية الزمان

¹ و بعدين طلع يسوع من الهيكل، و هو طالع جو له تلاميده، ولفتوا نظره إلى بنايات الهيكل.

² و قال ليهم: "شفتوا كل هدي المباني؟ بأمانة أقول ليكم: ما ببتظل حجرة على حجرة مكانها، و إلا ما بتطيح!"

³ و لما كان قاعد على جبل الزيتون، جو له التلاميد على أنفراد و قالوا له: "قول لينا متى هالشي بيصير؟ و وش هي علامة رجوعك و علامة نهاية الزمان؟"

⁴ و رد عليهم يسوع و قال: "أنتبهوا لا يضللكم أحد!

⁵ لأن ناس واجد بيجوا بإسمي ويقولوا،" أنا هو المسيح" وبيضللوا ناس واجد.

⁶ وبتسمعوا بحروب وأخبار حروب وإياني وياكم تخافوا! لازم يصير هدا كله، بس مو هادي هي النهاية.

⁷ وبتنقلب أمة على أمة، ومملكة على مملكة، وبتصير مجاعات وزلازل في عدة أماكن.

⁸ و لكن هدي كلها ما هي إلا أول آلام الولادة.

⁹ ووقتها بيسلمكم الناس إلى المحن والمصايب، وبيقتلوكم، وتكونوا مكروهين عند كل الشعوب بسبب أسمي؛

¹⁰ و بيرتدوا ناس واجد وبيسلموا بعض وبيكرهوا بعض،

¹¹ و بيطلعوا أنبياء دجالين واجد وبيضللوا ناس واجد.

¹² و إدا أنتشر الإثم، بتبرد المحبة عند ناس واجد.

¹³ و لكن إلا يثبت للنهاية، بينجوا.

¹⁴ وبتنتشر بشارة الملكوت هدي في العالم كله، شهادة ليي عند كل الشعوب. و بعدين بتجي النهاية.

¹⁵ فلما تشوفوا نجاسة الخراب، إلا دكرها النبي دانيال، قاعده تصير في المكان المقدس، خل القاري يفهم!

¹⁶ وقتها بيهرب إلا في منطقة اليهودية إلى الجبال؛

¹⁷ و إلا كان بيته بيركب على السطح، و لا ينزل عشان ياخد أعراضه إلا في بيته؛

¹⁸ و إلا في المزرعة، لا يرجع ياخد ثوبه!

¹⁹ والويل للحوامل والمرضعات في ديك الأيام!

²⁰ صلوا أن ما يصير هروبكم في الشتا أو في يوم سبت؛

²¹ لان وقتها بتصير ضيقة عظيمة ما صار زيها من بداية الخلق للحين، و ما بيصير.

²² ولولا أن ديك الأيام بتكون قصيرة، ما كان أحد بينجو منها. و لكن عشان المختارين أنا بقصر ديك الأيام.

²³ و إدا قال ليكم أحد وقتها: هدا هو المسيح هني، أو هناك، فلا تسمعوا كلامه ولا تصدقوا!

²⁴ لأن بيطلع أكثر من مسيح دجال ونبي دجال، و وبسموا معاجز عشان يضللوا المختارين،هدا لو قدروا.

²⁵ وهدانا قلت ليكم عن الشي قبل ما يصير.

²⁶ إدا قالوا ليكم الناس: هدا هو المسيح في البر! فلا تروحوا للبر؛ أو: هدا هو في الغرف الداخلية! فلا تصدقوهم.

²⁷ و زي ما يضوي البرق من الشرق بيضوي في الغرب، چدي يصير رجوع إبن الإنسان.

²⁸ وين ما تكون الجثث، تتجمع النسور!

²⁹ و على طول بعد الضيقة في ديك الأيام، بتظلم الشمس، والقمر بروح نوره، وبتطيح النجوم من السما، وبتتزعزع أجرام السماوات.

³⁰ وقتها تظهر آية إبن الإنسان في السما، فبتحزن كل قبايل الأرض، وبيشوفوا إبن الإنسان جاي على غيوم السما بقدرة وبمجد عظيم.

³¹ وبيرسل ملائكته صوت بوق عظيم عشان يجمعوا مختاريه من الجهات الأربع، من أقاصي السماوات إلى أقاصيها.

³² فتعلّموا من هدا المثل إلا بقوله من شجرة التين: لما تلين أغصانها وتطلع أوراقها،و تعرفوا إن الصيف قرب.

³³ و بعد ما تشوفوا هدي الأمور، أعرفوا أنه قريب على الأبواب!

³⁴ بامانه أقول ليكم: ما بينتهي هدا الجيل أبد قبل ما تصير هالأمور كلها.

³⁵ السما والأرض بتزول، و لكن كلامي ما بيزول أبدا.

اليوم والساعة العودة مو معروفين

³⁶ و داك اليوم وديك الساعة، ما يعرفهم أحد، ولا حتى ملائكة السماوات، ولا حتى الإبن، إلا الآب وحدة.

³⁷ وزي ما كان الحال في زمن نوح، بصير نفس الشي لما يرجع إبن الإنسان:

³⁸ لأن الناس في الأيام إلا سبقت الطوفان، ماكانوا منتبهين، كانوا ياكلوا ويشربوا ويتزوجوا ويعرسوا، حتى جاهم اليوم إلا نوح دخل فيه السفينة،

³⁹ ونزل الطوفان و هم لاهين وأخد الجميع. وچدي بيكون الحال لما يرجع إبن الإنسان:

⁴⁰ ووقتها يكون رجالين في المزرعة، واحد ينأخد وينترك الثاني،

⁴¹ ومرتين يطحنوا على الرحى، وحدة بتنأخد وبتنترك الثانية.

⁴² أسهروا عجل، لأنكم ما تعرفوا في أي ساعة بيرجع ربكم.

⁴³ ولو أنه عرف راعي البيت في أي ربع من الليل بيجي الحرامي، جان مانام، و ما ترك بيته ينباق.

⁴⁴ فكونوا أنتون بعد على أستعداد، لأن إبن الإنسان يمكن يرجع في أي ساعة ما تتوقعوها!

⁴⁵ من هو عجل داك العبد الأمين والحكيم إلا وكله سيده على أهل بيته عشان يجهز ليهم الأكل في أوانه؟

⁴⁶ هنيئا لداك العبد إلا يجي سيده و يحصله قاعد يسوي شغله.

⁴⁷ بأمانة أقول ليكم: إنه بيوكله ممتلكاته كلها.

⁴⁸ و لكن إدا قال داك العبد الشرير في قلبه: سيدي بيتأخر في رجعته!

⁴⁹ و قام يضرب أصحابه العبيد و قام ياكل ويشرب ويا السكارى،

⁵⁰ فأكيد سيد داك العبد لازم يرجع في يوم ما يتوقعه، وساعة ما يدري بها،

⁵¹ و بيضربه ويخلي نصيبه ويا المنافقين، وهناك بيصير الصياح والحسرة و الآلم!