الإنجيل زي ما كتبه مَتَّى 18 - Qatifi New Arabic Version / الترجمة العربية القطيفية الجديدة

الأعظم في ملكوت السماوات

¹ و في هداك الوقت، جو التلاميد ليسوع يسألوه: " منهو أعظم واحد في ملكوت السماوات؟"

² و قام عيط على طفل ووقفه في الوسط،

³ و قال ليهم: "بأمانة أقول ليكم إدا ما صرتوا زي الأطفال، ما عمركم بتدخلوا ملكوت السماوات.

⁴ و إلا يتواضع ويصير زي هدا الطفل، هوأعظم واحد في ملكوت السماوات.

⁵ و إلا يرحب بإسمي طفل زي هدا، فيكون كأنه يرحب فيني.

مسببين العثرات

⁶ و إلا يكون عثرة لواحد من الأطفال إلا آمنوا بي، أحسن له ينربط في رقبته حجر الرحى (حجر كبير مستخدم لطحن القمح) ويغرق في قاع البحر.

⁷ الويل للعالم من العثرات! العثرات لابد أنها تجي، و لكن الويل للي تجي العثرات على إيده!

⁸ و إدا كانت إيدك أو رجولك فخ إلك، أقطعها وأرميها بعيد عنك: أحسن لك تعيش هالحياة وإيدك أو رجولك مقطوعة، من أنك تنرمى في النار الأبدية.

⁹ و إدا كانت عيونك فخ إلك، أقلعها وأرميها بعيد عنك: أحسن لك أن تجي إلى الدنيا وعيونك مقلوعة، من أنك تنرمى في نار جهنم وفيك عواينك الثنتين.

¹⁰ أحدروا أنكم تحتقروا أحد من هدولا الجهال الصغار! لأني أقول ليكم: إن ملائكتهم في السما يطالعوا في وجه أبويي إلا في السماوات.

زي الخروف الضايع

¹¹ لأن إبن الإنسان جا حق ينجي الهالكين.

¹² وش رايكن في هالقصة؟ لو كان في واحد كان عنده مية خروف، وضاع منهم واحد: مو بيترك التسعة وتسعين خروف في الجبال، وبروح يدور عن الخروف الضايع؟

¹³ بأمانة أقول ليكم: إنه إدا شافه، بيفرح به أكثر من فرحته بالتسعة وتسعين إلا ما ضاعوا!

¹⁴ ونفس الشي - أبوكم في السماوات ما يمبى واحد من هدولا الصغار يهلكوا.

إدا غلط عليك أخوك

¹⁵ إدا غلط عليك أخوك، روح عاتبه بينك وبينه بروحكم. و إدا سمع لك، بتكون ربحت أخوك.

¹⁶ و إدا ما سمع لك، خد وياك أخو ثاني أو إخوه أثنين، عشان يثبت كل أمر بشهادة شاهدين أو ثلاثة.

¹⁷ و إدا ما سمع ليهم، فاعرض الأمر على الكنيسة. و إدا ما سمع للكنيسة بعد، خل يكون عندك زي الوثني و إلا يشتغل في مكتب الضرايب.

¹⁸ بأمانة أقول ليكم: إن كل شي تربطوه على الأرض بيكون أنربط فوق في السما، و كل شي تحلوه على الأرض بيكون أنحل فوق في السما.

¹⁹ و بعد بأقول ليكم: إدا أتفق أثنين منكم على الأرض على أمر معين، بغض النظروشهو الامر، فهالشي بيصير من عند أبويي إلا في السماوات.

²⁰ و إدا أجتمع أثنين أو ثلاثة بإسمي، فأنا بأكون في وسطهم."

زي العبد إلا ما أنرحم

²¹ و بعدين جا له بطرس وسأله: "يا رب، كم مرة يغلط عليي أخويي وأغفر له؟ سبع مرات؟"

²² و رد عليه يسوع و قال: " لا مو سبع مرات بس، وادا قلت لك سبعين في سبع مرات!

²³ عشان چدي، ملكوت السماوات أشبه ما يكون بملك يمبى يحاسب عبيده.

²⁴ و لما بدا يحاسبهم، جابوا له واحد مديون بعشرة آلاف وزنه دهب.

²⁵ ولأنه ما كان عنده إلا يقدر يوفي به دينه، أمر سيده أن ينباع هو ومرته وأولاده و كل ما يملك حق يوفي الدين.

²⁶ لكن العبد خر قدامه ساجد و قال له: أمهلني حق أوفي لك الدين كله.

²⁷ فانكسر خاطر السيد على العبد، وخلاهم يتركوه في حاله، وسامحه على الدين.

²⁸ و لما طلع داك العبد، راح لواحد من أصحابه العبيد إلا كان مديون له بمئة دينار. و قام سحبه من ثوبه و قال له: رجّع ليي إلا عليك!

²⁹ و ركع صاحبه العبد قدامه و قام يتوسل له: أصبر علي شوي و بوفي لك دينك!

³⁰ ولا رضى، و قام رماه في السجن إلين يدفع المبلغ إلا عليه.

³¹ و لما شافوا أصحابه العبيد إلا صار،تضايقوا واجد، وراحوا قالوا لسيدهم بإلا صار.

³² و ناداه سيده و قال له: يا العبد الشرير، أنا الحين سامحتك على كل داك الدين إلا عليك لأنك توسلت ليي.

³³ مو المفروض أنك ترحم صاحبك العبد زي ما أنا رحمتك له؟

³⁴ و هو معصّب عليه، أمر الجلادين أنهم يعدبوه لغاية ما يوفي الدين إلا عليه.

³⁵ و چدي بيسوي فيكم أبوكم السماوي، إدا كل واحد فيكم ما سامح أخوه من كل قلبه!"