Zacarías 3 - Qheshwa Biblia DC

Profetaqa Josuéj p'achan cambiakusqanta rikorqa

¹ Chay qhepanta Señor rikuchillawarqataj mosqoypi jina, jatun sacerdote Josueta, Señorpa angelnimpa ñaupaqempi sayashajta. Chay ch'ataykoj angelqa Josuejpa paña ladompi kasharqa, ch'ataykojtaj churakorqa.

² Señorpa angelnintaj nerqa chay ch'ataykoj angeltaqa: Señor k'amisuchun, nispa. Jerusalenta munakoj chay Señor k'amisuchun nispataj, kay runata k'ajarishaj carbón jina karqa.

³ Josuetaj ch'ichi p'achaswan p'achallisqa kasharqa sayasqa Señorpa angelnimpa ñaupaqempi.

⁴ Chaypacha angelqa yanapajkunasninta kamacherqa Josuéj ch'ichi p'achasninta lluch'unankuta. Chantá nerqataj: Kayqa niyta munan juchasniykita qhechusqayta. Kunantaj kamachisaj k'acha mosoj p'achawanñataj p'achallichinasunkuta.

⁵ Qhepampi kamacherqa, kamachisninta chay llimphuchasqa ch'uluta Josuéj umanman churanankuta. Paykunataj chay mosoj p'achawanñataj p'achalliykucherqanku. Chaykamataj angelqa sayashallarqapuni.

^6-7 Chaymanta Señorpa angelnin nerqa Josueman: Kay jinata nin Tukuy Atiyniyoj Señorqa: Riy tukuy ñankunasniynejta kasuwaspa kay tukuy kamachisusqayta. Nisqayta junt'anki chayqa, kay yupaychana wasiypi ruwanasta qosqayki. Chay wasiyta sumajta qhawanki chantá patiosnintapis. Noqa lugarta qosqayki chay ángel kamachisniy ukhupi.

⁸ Allinta uyariy jatun sacerdote Josué, qanwan kajkuna chay sacerdotespis uyarillachunkutaj. Qankuna churasqas jina kankichej chayta qhepaman yachanankupaj,. Noqataj apamusaj kamachiyta Wiñashan nisqata.

⁹ Noqa churani Josuéj ñaupaqenman qanchis ladosniyoj uj rumita, noqa kikiytaj chayman qelqaykusaj. Chaymanta uj p'unchayllapi kay runaspa juchasninta pichasaj.

¹⁰ Chay p'unchay chayamojtenqa ujkuna ujkunata wajyarinakuyta atinkichej, uvaspa llanthumpi jinataj higos sach'aspa llanthumpi samarikunkichej. Noqa Tukuy Atiyniyoj Señorniykichej chayta niykichej.