Santiago 3 - Qheshwa Biblia DC

Runaj siminmanta

¹ Hermanosníy, ama ashkhachu yachachejkuna kaychej. Yachankichej jina, astawan juchachasqas kananchej tiyan.

² Tukuyninchej ashkha kutita pantanchej. Pichus mana pantanchu parlasqampi chayqa, chaymá sumaj runaqa. Paytaj atinman tukuy cuerponwan kasuchikuyta.

³ Caballospa siminman frenota churanchej chayqa, caballosqa kasukunku. Tukuy cuerpontataj maynejmampis apayta atinchej.

⁴ Qhawariychej buquestapis. Chay jina jatuchaj kanankupaj, sinch'i wayraj apaykachasqasnin, uj juch'uy timón nisqawantaj runaqa purichin, q'ewintaj maymanchá munasqanman.

⁵ Ajinallataj qallupis juch'uysitu kanampajqa, may jatun kasqanta yuyakun. Uj chhikan ninaqa may jatun sach'a montetapis ruphaykuyta atin.

⁶ Qallurí uj nina, sajra imaswan junt'asqa. Qalloqa cuerpojta kaspa sajrata chimpachin, infierno kikintaj qalloqa jap'irichin, tukuy kausaynimpitaj larwachin.

⁷ Runaqa atinman tukuy laya sajra animalesta mansuyachiyta, p'isqosta, katarista, challwasta, yakupi kausaj animalesta ima.

⁸ Manataj pipis atinmanchu qalluta mansuyachiyta; imaraykuchus uj sajra mana mansuyachiy atina, wañuchintaj venenowan junt'asqa kaspa.

⁹ Kay kikin qallullawantaj yupaychanchej Señorninchej Dios Tatanchejta. Chayllawantaj maldicinchej runa masisninchejta. Runasqa Diospa rijch'ayninman jina ruwasqas kanku.

¹⁰ Kikin simillamantataj llojsin Diosta yupaychanas, runasta maldicinas. Hermanosníy, kayqa mana jinachu kanan tiyan.

¹¹ Uj kikin juturillamantachu llojsinman misk'i yaku, k'ara yakupis?

¹² Hermanosníy, atinmanchu higo sach'aqa aceitunasta poqoyta, chayrí uva sach'achu higosta poqoyta atinman? Ajinata manallataj atinmanchu uj juturillamanta llojsiyta k'ara yaku, misk'i yakuwan.

Patamanta yachaykuna

¹³ Qankunamanta mayqellampis yachayniyoj kanman chayqa, rikuchichun sumaj kausayninta, llamp'u sonqowan yachayninman jina.

¹⁴ Chayrí, jaqay qhawanakupichus, churanakupichus sonqoykichej kashan chayqa, ama jatunchakuychejchu, nitaj cheqa kajpa contranta llullakuychejchu.

¹⁵ Kay yachayqa mana Diosmantachu jamun, astawanqa kay pachallamanta, aychamanta, supaymanta ima.

¹⁶ Maypichá qhawanaku tiyan, churanakupis, chaypeqa tukuy imaymana pejtu tiyan, sajra ruwaykunataj.

¹⁷ Diosmanta jamoj yachayqa llimphu, sonqo tiyakuyniyoj, munakuyniyoj, khuyakuywan junt'asqa, sumaj poqoyniyoj, sut'inta ruwajtaj, manataj puraj uyachu.

¹⁸ Cheqan kajpa poqoynenqa, sonqo tiyakuypi tarpusqa, allin kausaypi kajkunapaj.