Proverbios 5 - Qheshwa Biblia DC

Mana qhenchachakunamanta

¹ Yachayniyta uyariway, wawáy; yuyayniyman umaykita k'umuykuchimuy.

² Ajinamanta yuyaychasqayta waqaychanaykipaj, ajinamanta yachaywan parlanaykipaj.

³ Mana allin puriyniyoj warmeqa misk'ejta parlan, parlasqanqa aceitemantapis aswan llamp'uraj.

⁴ Chaywampis, tukukuynenqa ajenjomantapis aswan jaya, espada jinataj purajman sumaj filochasqa.

⁵ Paywan purispaqa wañuyman chayanki; chakisnenqa sepulturaman cheqanta chayan.

⁶ Paymanqa mana dakunchu kausay ñanta purinamanta, mana qhawakunchu maymanchus thaskisqanta.

⁷ Chayrayku uyariwaychej, wawasníy, amapuni yachachisqasniymanta t'aqakuychejchu.

⁸ Chay warmimantaqa karunchakuy, ama qayllaychu wasi punkullamampis.

⁹ Ama kapuyniykita wajkunaman qonaykipaj, nitaj ganakusqasniykitapis sajra runawan.

¹⁰ Ama waj runaslla kallpaykiwan sajsakunankupaj, jump'i suruyta llank'asqaykiwan.

¹¹ Chanta chay qhepata waqashanki, kallpayki pisimanta pisi tukukapojtin.

¹² Chaypitaj qanqa ninki: Ima nispataj allin imasta niwasqankuta qhesacharqaniri. Ima nispataj k'amiwasqankutapis mana jap'erqanichu?, nispa.

¹³ Yachachiwajkunata mana uyariyta munarqanichu, yachachiwajkunata mana uyarerqanichu.

¹⁴ Yanqhalla tukuy ima sajraspi purini, tukuy llajta masisniypa rikunanta.

¹⁵ Kikin yaku pujyuykimanta yakuta ujyay, chay kikin pujyuykimanta jutumoj yakuta.

¹⁶ Juturiykimanta yaku llojsimojtaqa ama jich'aykachaychu, amataj calleta qarpaspa usuchiychu.

¹⁷ Pujyuwan, yakuwanqa qampallata, mana pejpatachu; ama waj runasmanqa qoychu.

¹⁸ Chay juturiykeqa bendicisqa kachun. Wayna kashaspa casarakusqayki warmiykiwan, kusikuy.

¹⁹ Payqa kachun k'acha taruka jina, gacela nisqa jinataj. Munakuynin tukuy kausayniykipi kusichisuchun. Chay munakuynimpipuni qanqa kusikuy.

²⁰ Imaraykutaj wawáy, waj warmiwan jap'ichikuwajri? Imaraykutaj wajpa ojllaynimpi kawajri?

²¹ Runaj ñannintaqa Señor qhawamushan, may purisqantapis qhawashallampuni.

²² Sajra runataqa kikin sajra ruwasqallantaj qhatiykachan, kikin juchallantaj waskha jina jap'iykun.

²³ Chay mana allinta purisqan wañuyman pusanqa, wampu kaynintaj chinkayman pusanqa.