Proverbios 28 - Qheshwa Biblia DC

¹ Juchaspaqa ayqen mana pi qhatiykachashajtillan; mana juchayoj kajrí k'achata tiyakun mana imamanta dakuspa, uj león jina.

² Uj nación mana allinta purejtenqa, kamachejkunaqa yapakunku; sumajta kamachej runarí unayta allimpi kausachin.

³ Wajchasmanta suwaj runaqa, cosechasta chinkachej llojlla paraman rijch'akun.

⁴ Leymanta t'aqakojkunaqa, sajra runata alabanku; leyta junt'ajkunarí, chay runaj contrampi kashanku.

⁵ Sajra runaqa mana unanchakunchu imachus cheqan kajmantaqa; Señorman qayllakojkunarí yachanku chay tukuy imachus kasqanta.

⁶ Wajcha kay, allinta puriytaj aswan allenqa, qhapaj kaspa mana allintataj purinamanta nisqaqa.

⁷ Diospa kamachisqanta junt'ajqa sumaj yuyayniyoj wawan, pichus oqoysapaswan purejkunaqa tatanta p'enqaypi qhawachin.

⁸ Qolqe reditosta mañaspa qhapajyajqa, tantapun wajchasta khuyakojllapaj.

⁹ Sichus pipis Diospa kamachisqanta mana uyarinchu chayqa, Diospis willachikuspa, manallataj chay runaj mañakusqantaqa uyarenqachu.

¹⁰ Pichus cheqanta purajkunamanta juchallichin mana allin ñanta purichispa chayqa, kikin tojllallapitaj urmanqa. Cheqanta purej runasrí, aswan allin kaj chayaqeta jap'enqanku.

¹¹ Qhapaj runaqa yuyakun may yachayniyoj kasqanta, allinta unanchaj wajcha runarí chay runaj yuyasqanta yachan.

¹² Cheqan runas atipaspaqa, sumaj fiestata ruwanku; sajra runas atipajtinkutaj, runasqa pakakamunku.

¹³ Pichus juchanta pakajtaqa mana allinchu renqa, pichus juchanta willakojqa, chaymanta t'aqakojtaj khuyakuyta tarenqa.

¹⁴ Kusikuyniyojmin Señorta manchachikojpuni runaqa. Pichus mana allinta kasukojrí mana allinman chayanqa.

¹⁵ Wajcha nacionesta ñak'arichispa kamachejqa, uj qhapariykachaj león jina, chayri yarqhasqa jukumari jinataj.

¹⁶ Mana yuyayniyoj wampu kamachejqa astawan yapakonqa mana allin kayta; qolqeta mana munapayajqa unayta kausanqa.

¹⁷ Runata wañuchejqa, sepulturakama ayqenqa; nitaj pipis chaymanta sayachiyta atenqachu.

¹⁸ Cheqanta purej runaqa salvasqa kanqa, mana allin ñanta purejrí mana allin kajmampuni chayanqa.

¹⁹ Jallp'anta sumajta llank'ajpataqa ashkha mikhunan kaponqa; qhella kajkunawan purejrí, wajchayanqa.

²⁰ Cheqan kaj runaqa allin imasta jap'enqa; sinch'ita qhapajyayta munajqa, jasut'isqa kanqa.

²¹ Wakin runallata allimpaj qhawanaqa mana allinchu; uj chhikan t'antaraykulla runaqa juchallikuyta atinman.

²² Mich'a runaqa usqhayllata qhapajyayta munan, manataj yachanchu paypa patanman wajchayay jamunantaqa.

²³ Pichus runata k'amejqa qhepaman munasqa kanqa, pichus qhasillata alabakojmanta nisqaqa.

²⁴ Pichus tatanmanta chayri mamanmantapis suwaspa, ninman mana juchayojchu kasqanta, runa wañuchi runaj kausaqenman tukun.

²⁵ Pichus anchata imatapis munapayajqa maqanakusta oqharichin, pichus Señorpi atienekojrí tukuy imapi ñaupajman renqa.

²⁶ Pichus sonqompi sumaj kasqanta yuyakojqa, wampumin. Pichus yachaywan imatapis ruwajqa mana urmallanqachu.

²⁷ Wajchata yanapajpataqa tukuy iman tiyaponqa; wajchasman mana yanapajmanqa ashkha maldiciones jamonqa.

²⁸ Juchasapas atipajtinkoqa, runas pakakunku; sajra runas chinkarejtinkutaj, cheqan runasqa astawan ashkhayanku.