Proverbios 19 - Qheshwa Biblia DC

¹ Cheqanta kausakoj wajcha runaqa aswan allin, pipajpis rimaj wampu runamanta nisqaqa.

² Mana allinchu apurakunaqa manaraj allinta reparashaspaqa, anchata apurakuypeqa pantay tiyan.

³ Runaj wampu kaynenqa ñanninta chinkachin, chaymantaqa Señorpa contranta sonqompi phiñakun.

⁴ Qhapajyayqa ashkha kausaqesta apamun; uj wajchatarí kausaqesnin saqerparinku.

⁵ Uj llulla sut'inchajqa jasut'isqapuni kanqa; pichus llulla kajqa mana llusp'enqachu.

⁶ K'acha runa kajtaqa tukuy runas mask'anku, tukuy runas kausaqen kayta munanku khuyakoj kasqanrayku.

⁷ Wajcha runataqa wauqesnimpis chejninku, kausaqesnenqa astawanraj karunchakunku paymantaqa. Chaymantaqa mask'an pipis parlaykurinanta, nitaj pipis kanchu parlapayaykurej.

⁸ Pichus yachasqanman jina ruwajqa pay kikinta munakun. Pichus yachasqanman jina purin chayqa, allin kajta tarin.

⁹ Llulla sut'inchajqa jasut'isqapuni kanqa; llullataqa wañuy suyashan.

¹⁰ Wampu runaqa mana sumaj imaspeqa tiyayta atinchu, jinallataj kamachipis kurajkunata mana kamachiyta atinchu.

¹¹ Runaj sumaj yuyaywan ruwasqanqa phiñakuyta thasnun, k'acha runaqa chejnikuyta mana kasuta ruwanchu.

¹² Reypa phiñakuynenqa leompa qhaparisqan jina, khuyakuyninrí qhora patapi chhulla jina.

¹³ Uj wampu runaqa tatanta llakichin. Maqanakuta mask'aj warmeqa, mana sayk'uyta sut'oj yaku jina.

¹⁴ tatasmanta jap'inku wasita, kapuykunatapis; Señormantataj k'acha yuyayniyoj warmita.

¹⁵ Qhella kayqa sinch'ita puñuchin, qhellaqa yarqhaypi rikhurenqa.

¹⁶ Pichus kamachisqasta junt'ajqa kausayninta waqaychan; pichus Señorpa yachachisqanta qhesachajqa, wañonqa.

¹⁷ Wajcha runaman manoyqa, Señorman manuywan ninakun; Señor kikintaj chay manuta junt'anqa.

¹⁸ Wawaykitaqa jasut'iy paypaj jinaraj allin kashan chayqa; amataj jasut'inkichu wañuchinaykikamaqa.

¹⁹ Anchata phiñakojqa aswan llakiyniyoj kanqa; astawan phiñakusparí, aswan millaykunata ruwanqa.

²⁰ Yuyaychasqataqa uyariy, k'amisqatapis jap'ikuy; ajinamanta chayanki sumaj yachayniyoj kayman.

²¹ Runaqa ashkha imasta wakichin, chaykunatataj Dioslla atin junt'achiyta.

²² Runaj ashkhata munapayaynenqa urmaynin; aswan allinmin wajcha kanaqa llulla kanamantaqa.

²³ Señorman k'umuykoyqa kausayman pusan; Señorman may kusisqa tiyakonqa, manataj ima llakiypis chayanqachu.

²⁴ Qhellaqa makinta chuwaman sat'iykun, manataj siminmanqa qayllaykuchiyllatapis atinchu.

²⁵ Machu machu jasut'ichikusqanta rikuspa, mana yuyayniyoj runaqa manaña ruwanchu; yachayniyoj runaqa uj k'amisqallamanta yachaqakun.

²⁶ Tatata ñak'aricheyqa, mamatataj wasimanta wijch'oyqa uj p'enqay, mana allinchu chay wawapajqa.

²⁷ Wawáy, k'amisqasta mana jap'ikunkichu chayqa, yachaypa yuyaychakunasninmanta t'aqakunki.

²⁸ Llulla sut'inchajqa cheqan kajmanta alqochakun; sajra kajqa siminmanta sajra kajta ajtumun.

²⁹ Jasut'eqa wakichisqapacha kashan chay jina machu machuspajqa; wampuspa wasampaj kashan allin jasut'isqa.