Números 34 - Qheshwa Biblia DC

Canaán jallp'aj tinkuykunasnin

^1-2 Señorqa Moisesman nerqa: Israelitasman kay jinata kamachiy: Canaán jallp'ata chayaqepaj jap'ikushajtiykichej, chay jallp'aj tinkuykunasnenqa kay jina kanqa:

³ Uranejman tinkuynenqa Zin ch'in pampakama, Edom jallp'awan tinkuykama. Inti llojsimuynejmanqa Wañusqa mar qochaj ura cantonmantapacha kanqa.

⁴ Uranejmanqa rillanqapuni Acrabim wichaykama, chay pasanqa Zinnejmanta Cades-barneakama. Chaymanta rillanqapuni Hasar-adarnejman Asmonkama.

⁵ Chay Asmonmanta rillanqapuni Egiptoj muyuynin chay wayq'okama, chaymanta tinkonqa nisqa mar qochawan.

⁶ Inti yaykuyman jallp'aykichejpa tinkuynenqa jatun mar qochakama kanqa.

⁷ Patanejman jallp'aykichejpa tinkuynenqa mar qochamanta Hor nisqa orqokama kanqa.

⁸ Chay Hor nisqa orqomanta Hamat yaykuykama, chaymantaqa Zedadkama.

⁹ Zedadmanta pata kaj tinkuynintaj rillarqapuni Zifronkama, chaymantataj tukukonqa Hazer-enampi.

¹⁰ Inti llojsimuynejmanqa ruwaychej Hazer-enanmanta Sefamkama.

¹¹ Chaymanta Riblakama, Atin nisqamanta inti llojsimuynejman. Chaymantaqa uraykonqa Cineretpa mar qocha inti llojsimuyninnejta.

¹² Chaymanta rillanqapuni Jordán mayunta, wañusqa nisqa qochaj tukukuyninkama. Ajina kanqa jallp'asniykichejpa waj llajtaswan tinkuykunasniykichejqa.

Jallp'ata rak'inakunku

¹³ Moisesqa israelitasman kamacherqa: Kay jallp'asta qankuna jap'ikunkichej suerteta choqaspa. Chayta Señorqa nerqa isq'on ayllu khuskanniyoj qhepakojkunaman qonawanchejta.

¹⁴ Rubempa miraynin, mashkha wawasniyojchus kasqankuman jina; Gad ayllupis mashkha wawasniyojchus kasqankuman jina; jinallataj Manasés khuskan ayllupis mashkha wawasniyojchus kasqankuman jina ñapis jallp'ata chayaqenkupaj jap'inkuña.

¹⁵ Chay iskay ayllu khuskanniyoj jallp'ata jap'ikorqankuña chayaqenkupaj Jordán mayoj inti llojsimuynimpi, Jericó llajtaj chimpampi.

^16-17 Señorqa Moisesman nerqa: Chay jallp'astaqa rak'isonqachej sacerdote Eleazarwan, Numpa wawan Josuewan.

¹⁸ Sapa ayllumanta ajllankichej uj kuraj kaj runata jallp'ata mojonakunampaj.

¹⁹ Chaypajqa ajllankichej kay runasta: Judá ayllumanta Sefonej wawan Calebta.

²⁰ Simeón ayllumanta Amiudpa wawan Semuelta.

²¹ Benjamín ayllumanta Quislompa wawan Elidadta.

²² Dan ayllumanta Joglej wawan Buquita.

²³ Josej wawasnimpa ayllusninmanta Manasesmanta Efodpa wawan kuraj runapaj ajllasqa karqa Haniel.

²⁴ Efrainmantataj Siframpa wawan kuraj runapaj ajllasqa karqa Kemuel.

²⁵ Zabulón ayllumanta Parnacpa wawan kuraj runapaj ajllasqa karqa Elizafan.

²⁶ Isacar ayllumanta Azampa wawan kuraj runapaj ajllasqa karqa Paltiel.

²⁷ Aser ayllumanta Selomej wawan kuraj runapaj ajllasqa karqa Ahiud.

²⁸ Neftalí ayllumanta Amiudpa wawan kuraj runapaj ajllasqa karqa chay Pedaelta.

²⁹ Chay runasman Señorqa kamacherqa chay Canaán jallp'ata israelitasman rak'inankuta.