Números 25 - Qheshwa Biblia DC

Israelitasqa Baal-peorta yupaychanku

¹ Israelitasqa Sitimpi tiyakorqanku; chaypitaj qharisqa Moab warmiswan qhenchachakuyta qallarerqanku.

² Chay warmis pusarqanku lantisninkuman uywa wañuchisqasta jaywasharqanku chaykunaman. Israelitastaj chay mikhuykunasta mikhuysikorqanku, yupaycharqankutaj moabitaspa lantisninkuta.

³ Ajinata paykunaqa pusachikorqanku Baal-peorta yupaychanaman. Chaymanta Señorqa maytapuni israelitaspaj phiñakorqa.

⁴ Chaymanta Moisesman nerqa: Israelitaspa tukuy kurajkunasninta tantachiy; paykunatataj noqaj ñaupaqeypi wañurachiy p'unchaypi sumajta inti k'ancharimushajtin. Ajinamanta k'ajaj phiñakuypis israelitasmanta qhechukonqa.

⁵ Moisesqa israelitaspa kurajkunasninta tantacherqa, nerqataj: Sapa ujniykichej ayllusniykichej ukhupi, pikunachus Baal-peorta yupaychaysinku, chaykunata wañurachiychej.

⁶ Chaypachapuni uj israelitaqa madianita warmita jaraman pusaykorqa; Moisespa rikunanta, tukuy israelitas tantakuspa Dioswan tinkukuna toldo punkupi waqarashajtinku.

^7-8 Chayta rikuspa, sacerdote Aarompa allchhin Eleazarpa wawan Finees, israelitas tantasqas kasharqanku chaymanta riytawan lanzanta sumajta wakiykuchikuspa, chay runaj qhepanta rerqa maypichus kasharqa chaykama. Chayaspataj, wijsampi t'ojsispa wañucherqa israelitata, chay madianita warmintinta. Ajinamanta manaña karqachu wañuy, israelitasta wañuy jasut'iy tukuchisharqa chay.

⁹ Chaykamaqa iskay chunka tawayoj waranqa israelitasña wañorqanku.

^10-11 Chaymanta Señorqa Moisesman parlarqa: Fineesqa phiñakuyniyta thasnun israelitaspa contranta; paypis noqa jinallataj juchaj contrampi kashan. Chayrayku noqaqa manaña astawan phiñakuyta atiymanchu, israelitasta tukuchinaypajqa.

¹² Niy kunanqa, noqa ruwasqayta uj allinyakuy tratota paywan.

¹³ Chayrayku payman qoni sacerdotej ruwanasninta wiñaypaj ruwanampaj, pay, jinallataj miraynimpis; imaraykuchus pay Diosninrayku chayta ruwan, jinallataj israelitaspaj perdonta tarinampaj.

¹⁴ Madianita warmiwan khuska wañuchisqa karqa chay israelitaj sutenqa karqa Zimri. Chay qharitaj karqa Simeompa ayllunmanta kuraj kaj Saloj wawan.

¹⁵ Madianita warmej sutintaj Cozbi karqa; payqa karqa Madián t'aqamanta kuraj kaj Zurpa wawan.

^16-18 Señorqa Moisesman nerqa: Madianitasta muyuykuspa atipaychej, imaynatachus paykunapis sajra mañasninkuwan ruwasorqachej ajinata. Paykunaqa Baal-peor lantinkute yupaychachisunkichej. Madianitaspa kurajnin kajpa ususin Cozbirayku, mayqenchus lanzawan wañuchisqa karqa maypachachus wañuyta apachimorqani chaypacha, imaraykuchus paykunaqa Baal-peorta yupaycharqanku.