San Lucas 19 - Qheshwa Biblia DC

Jesuswan Zaqueowan

¹ Jesús pasasharqa Jericó llajtanejta.

² Chaypi tiyakorqa uj qhapaj runa, Zaqueo sutiyoj. Payqa, impuestota cobrajkunaj kamachejnin karqa.

³ Rikuytataj munarqa Jesusta pichus kasqanta rejsinampaj. Juch'uy runa kaspataj, mana rikuyta aterqachu, runas k'iski kasqanrayku.

⁴ Usqhayta ñauparispataj wicharerqa uj sach'aman, chaymanta rikunampaj, imaraykuchus Jesusqa chayninta pasanan karqa.

⁵ Chaynejta pasashaspataj, Jesusqa patanejta qhawarispa Zaqueota rikorqa, nerqataj: Zaqueo, usqhayta uraykamuy. Kunanqa wasiykipi qhepakusaj.

⁶ Usqhayta uraykamuytawantaj, Zaqueoqa ancha kusiywan Jesusta wasinman pusaykorqa.

⁷ Chayta rikuspataj tukuy thutoj churakorqanku, uj juchasapawan wajyachikun nispa.

⁸ Chantá Zaqueoqa, sayaykukuspa Señorman nerqa: Señor, tukuy kapuwasqanta qosaj khuskanninta wajchasman. Pimantachus ch'aukiyaspa imatapis suwarqani chayqa, tawa jinatawan kutichipusaj.

⁹ Jesustaj payman kuticherqa: Kay wasiman kunan p'unchay salvación chayamun, Zaqueo Abrahampa wawan kasqanrayku.

¹⁰ Runaj Churenqa, chinkasqa kajta mask'aj, salvajtaj jamorqa.

Chunka qolqemanta rijch'anachina

¹¹ Kay imasta runas uyarishajtinkutaj, Jesusqa churarqa uj rijch'anachinata. Jerusalén llajta qayllapiña karqa. Paykunataj yuyasharqanku Diospa reinon chayamunan qayllaña kasqanta.

¹² Chaynejta nerqa: Uj qhapaj runa karqa, payqa riporqa karu llajtaman reinota jap'ej, chantataj kutimunampaj.

¹³ Manaraj rishaspataj wajyarqa chunka kamachisninta, sapa ujmantaj qorqa qolqeta: Kay qolqeta mirachiychej kutimunaykama, nispa.

¹⁴ Llajta masisnintaj chejnej kanku, chaynejta, kachasta qhepanta kachamorqanku, ninankupaj: Mana payta munaykuchu reyniykupaj, nispa.

¹⁵ Chantá rey kasqanmantaña kutimuspa, wajyacherqa chay kamachisninta, tapunampaj mashkhatachus sapa uj mirachisqanta chay qolqe qosqanta.

¹⁶ Ñaupaj kaj jamorqa nispa: Wiraqochi, qolqe qowasqaykitaqa chunka jinastawan mirachini.

¹⁷ Reytaj kuticherqa: Walejpacha sumaj kamachi; chay pisillawan allinta ruwaj kasqaykirayku, kunanmantapacha chunka llajtasta kamachinki.

¹⁸ Qhepan kajñataj jamuspa nerqa: Wiraqochi, qolqeykitaqa phishqa jinastawan mirachini.

¹⁹ Reytaj kuticherqa: Qampis phishqa llajtasta kamachinki.

^20-21 Chantá kinsa kajñataj jamuspa nerqa: Señor, jap'ikapullay, qolqeykitaqa jallch'aykorqani uj inkhuñapi; phiña runa kasqaykirayku manchachikorqayki; qanqa jap'ikapunki mana qampata kajta; oqharinkitaj mana tarpusqaykimanta.

^22-23 Chay kajmantaj reyqa nerqa: Qanqa mana allin kamachichu kanki. Parlasqaykipi rejsiyki. Phiña kasqayta yacharqanki, mana noqajta kajllata jap'ikapusqayta, mana tarpusqayta oqharisqayta ima chayqa; imaraykutaj mana bancoman churaykapuwarqankichu chay qosusqay qolqeyta? Kutimuspataj miraynintawan orqhokapuyman karqa.

²⁴ Chaypi kajkunamantaj nerqa: Qhechuychej chay qolqeta paymanta. Qoychejtaj chunkatawan mirachejman.

²⁵ Paykunataj kuticherqanku: Wiraqochi, chunkataña payqa jap'ishan, nispa.

²⁶ Reytaj kuticherqa: Kunanqa niykichej, kapuyniyojmanqa astawan qosqa kanqa; mana imayojmantataj, pisi kapusqampis qhechusqa kanqa.

²⁷ Jinallatataj, jaqay contrariosniy mana rey kanayta munajkunata, kayman pusamuychej, noqaj ñaupaqeypitaj wañurachiychej.

Jesús yaykun Jerusalenman

²⁸ Chayta nispataj Jesusqa, ñauparispa Jerusalenman risharqa.

^29-30 Olivos orqoj chimpampi, Betfagé llajtaman, Betaniaman ima qayllashaspataj, iskay yachachisqasninta kacharqa, nispa: Riychej jaqay chimpa ranchoman; chaypi tarinkichej uña burrota watasqata, chaymanqa ni pi kunankama tiyaykunrajchu, phaskaraspataj aysamuychej.

³¹ Pipis tapusojtiykichejtaj, imaraykutaj phaskarashankichej?, nispa chayqa, Señor necesitan, niychej.

³² Yachachisqasnintaj rispa, Señorpa nisqanman jina burrota tarerqanku.

³³ Burrota phaskashajtinkutaj, dueñosnin paykunata taporqanku: Imapajtaj phaskashankichej chay uña burrota?, nispa.

³⁴ Paykunataj kuticherqanku: Señor necesitashan, nispa.

³⁵ Chantá burrota Jesusman aysamorqanku; burroj wasanman p'achasninkuta caronaykuspataj, Jesusta tiyaykucherqanku.

³⁶ Ñan rinanmampis p'achasninkuta mast'ararqanku.

^37-38 Olivos orqo urayman qayllaykushajtinkutaj, tukuy yachachisqasnin, kusisqas qhaparispa Diosta yupaychayta qallarerqanku, tukuy milagrosta rikusqankumanta, nispa: Kusiy kachun Señorpa sutimpi jamoj reypaj; sonqo tiyasqa kay janaj pachapi kachun; Diosmantaj yupaychay!

³⁹ Chantá wakin fariseosqa runa chaupipi kajkuna nerqanku: Maestro, k'amiy yachachisqasniykita.

⁴⁰ Jesustaj kuticherqa: Paykuna ch'in kankuman chayqa, rumisñataj qhaparenqanku, nispa.

^41-42 Jerusalén llajta qayllaman chayaspataj, Jesusqa rikuytawan Jerusalenmanta waqarqa, nispa: Allin kanman qampis kay p'unchayniykipi unanchanayki, imachus kausayniykipaj allin kasqanta! Jinapis, kunanqa pakasqa kashan ñawisniykimanta.

^43-44 P'unchaykuna qampaj chayamonqanku. Chay p'unchaykunapeqa, enemigosniyki perqawan muyuykuchispa, muyuykamusonqanku, tukuynejmantataj k'iskiykamusonqanku, pampachasonqanku, jinallataj qampi kaj wawasniykitapis. Manataj qampi saqenqankuchu rumi patapi rumita; imaraykuchus mana unanchakorqankichu, Diosniyki qanman watukoj jamushasojtin.

Jesús qharqon templomanta vendejkunata

⁴⁵ Chaymantataj Jesusqa temploman yaykuspa, qharqoyta qallarerqa tukuy chaypi qhatojkunata, rantejkunata ima.

⁴⁶ Nerqataj: Escribisqa kashan: Waseyqa, Diosmanta mañakuna wasi; qankunataj suwa cuevaman tukuchisqankichej.

⁴⁷ Sapa p'unchaytaj Jesusqa templopi yachachej. Jatun sacerdotes, leymanta yachachejkuna, llajtamanta kurajkuna imatajri, imaynallamantapis payta wañuchiyta munasharqanku.

⁴⁸ Chaywampis mana imanayta aterqankuchu, imaraykuchus tukuy runa t'ukuspa Jesusta uyarisharqa.