Josué 3 - Qheshwa Biblia DC

Israelitas Jordán mayuta chimpanku

¹ Q'ayantin paqarin tutamanta jatarispa, Josueqa tukuynin israelitaswan Sitinmanta purirerqanku. Jordán mayu cantoman chayaspa chaypi jarakorqanku, manaraj mayuta chimpashaspa.

² Kinsa p'unchaymantaj, kurajkunas tukuynin jarasta muyorqanku.

³ Kay kamachiytataj israelitasman qorqanku: Maypachachus Diosninchejpa cajonninta sacerdote levitas apashajta rikunkichej chayqa, llojsimuychej maypichá kashankichej chaymanta; qhepantataj puririychej.

⁴ Ajinapi yachankichej maynintachus rinaykichejta; qankunaqa mana jayk'ajpis chay ñantaqa purerqankichejchu. Chaywampis ama chay cajonmanqa anchata qayllankichejchu, uj kilometrota jinalla qhepanta rinkichej, nispa.

⁵ Josuetaj israelitasman nerqa: Llimphuchakuychej, imaraykuchus q'aya rikunkichej, Señor milagrosta ruwashajta.

⁶ Sacerdotesmampis nerqa: Qankuna oqhariychej Diospa ruwasqan trato cajonta. Chaywantaj runaspa ñaupaqenta puririychej. Paykunataj Diospa trato ruwasqan cajonta oqharispa runaspa ñaupaqenta purirerqanku.

⁷ Señortaj Josueman nerqa: Kunan p'unchaymantapacha may sumaj runata ruwasqayki israelitaspa ñaupaqempi. Ajinapi paykuna yachanqanku noqa qanwampuni kasqayta, imaynatachus Moiseswan karqani jinata.

⁸ Qan kamachiy ari sacerdotesta Diospa trato ruwasqan cajonta apanankuta; chanta Jordán mayuman chayaytawan yaku cantopi sayanankuta.

⁹ Chaymanta Josueqa israelitasman nerqa: Jamuychej, Señor Diosniykichejpa nisqanta uyariychej.

¹⁰ Kaypimin yachakonqa kausashaj Señor Diosniykichej qankunaj chaupiykichejpi kasqanqa, risqaykichejman jina ñaupaqeykichejmanta pichasqampi, cananeosta, hititasta, heveosta, ferezeosta, gergeseosta, amorreosta, chantá jebuseosta ima.

¹¹ Qhawaychej, Señorpa trato ruwasqan cajón Jordán mayuta ñaupaqeykichejta chimpanqa.

¹² Chayrayku kunanqa ajllaychej ari chunka iskayniyoj qharista, sapa uj Israel ayllumanta ujtakama.

¹³ Maypachachus sacerdotes tukuy jallp'amanta kaj Señorpa cajonninta apashajkuna yakuman saruykojtinkukamaqa, yaku iskayman t'aqarpayakonqa, patamanta jamoj yakoqa kikimpi sayaponqa qocha jina.

¹⁴ Chanta israelitasqa tukuyninku jarasninkuta oqharikorqanku Jordán mayuta chimpanankupaj. Ñaupaqenkutataj sacerdotes Señorpa trato ruwasqan cajón oqharisqa rerqanku.

¹⁵ Sacerdotes mayuman yaykusqankutawan, yaku cantoman saruykusqankutawan chakisninku joq'ochakojtinkama. Cosecha tiempota Jordán mayoqa wasarejpuni.

¹⁶ Pata mayumanta jamoj yakoqa kikimpi sayaykorqa qocha jina, Adán nisqa llajtapi, chayqa kashan jark'ana, Saretán llajtawan khuska. Ñaupajman p'itikoj yakutaj Wañusqa Qocha nisqaman uraykorqa tukukunankama. Ajinata yakoqa mayupi iskayman t'aqarpayakorqa. Israelitastaj chayninta chimparqanku Jericó llajta cheqaman.

¹⁷ Tukuynin israelitas Jordán mayuta ch'akipi chimparqanku. Señorpa trato ruwasqan cajonta apaj sacerdotespis khuskan mayupi ch'aki jallp'api sayaykorqanku tukuynin israelitas chaynejta chimpanankukama.