Josué 13 - Qheshwa Biblia DC

Jallp'aqa qhechunapaj kanraj

¹ Señorqa Josueman nerqa machuña kashajtin: Qanqa machuña kashanki, chaywampis jallp'aqa ashkharaj tiyan qhechunapaj.

^2-3 Chaykunataj kanku: Filisteospa tukuy jallp'asninku, tukuy gesureospata; chay jallp'asqa kanku Sihormanta, Egiptoj inti llojsimuynimpi, Ecronwan mojon tinkuyninkama. Inti llojsimuynejpeqa cananeospa jallp'an kashan; chay jallp'apitaj filisteospa phishqa kurajkunasninku kashanku, Gazamanta, Asdodmanta, Ascalonmanta, Gatmanta, Ecronmanta ima. Chayllapitaj aveospa kurajninku karqa.

⁴ Uraynejmantaj kashan tukuy cananeospa jallp'anku, sidoneospa llajtanku Meharamantapacha Afeckama, amorreospa jallp'ankoj mojonninkama.

⁵ Giblitaspa jallp'anku tukuy Líbano inti llojsimuykama, Baal-gamanta Hermón orqo k'uchukama, Hamatman yaykunakama.

⁶ Israelitaspa ñaupaqempi noqa tukuchisaj sidoniosta, orqospi tiyakojkunata, Libanomanta Misrefot-maimkama. Qantaj chay jallp'asta israelitasman chayaqenkupaj rak'irapunki, imaynatachus kamachishayki chayman jina.

⁷ Kay jallp'astaqa isq'on aylluman rak'irapunki, chantá Manasespa khuskan ayllunmanwan.

Kinsa aylluspa jallp'asninku

⁸ Imaraykuchus Rubén aylluwan, Gad aylluwan, chanta Manasés khuskan aylluwanqa jallp'asniyojña kanku, chaytataj Moisesña chayaqenkupaj rak'iporqa Jordán mayu chimpapiña inti llojsimuypi.

⁹ Chay jallp'aspa mojonesnenqa kashan: Arnón mayu cantopi Aroermantapacha, valle chaupipi llajtantin, Meseba pampas, Dibonkama.

¹⁰ Tukuy Sehón llajtas amorreospa reynin, payqa kamacherqa Hesbompi, chanta Amompa wawasnimpa jallp'asninwan mojonninkama.

¹¹ Paykunallapajtaj karqa Gaalad, gesureospa jallp'asnin, maacateospa jallp'asnin, Hermón orqos, tukuy Basán jallp'as ima Salcakama.

¹² Chanta jap'ikullarqankutaj Basán rey Ogpa jallp'asninta, payqa Astarotpi, Edreipi ima kacherqa, payqa karqa refaitasmanta ch'uli; paykunatamin Moisesqa atipaspa chinkacherqa.

¹³ Gesureoswan, maacaswanqa mana chaynejmanta wijch'usqaschu karqanku, manachayqa paykuna kausashanku israelitaswan chajru kunan p'unchaykama.

¹⁴ Leví ayllumantaj Moisesqa jallp'ata mana qorqachu. Paykunapajqa kanan karqa Señor Diosman israelitaspa rikuchikuta apamusqallanku, imaynatachus Señorpa kamachisqanman jina.

Moisespa rak'isqasnin jallp'as

¹⁵ Moisesqa jallp'ata rak'erqa Rubén aylluman mashkhachus kasqankuman jina.

¹⁶ Chay jallp'ankutaj karqa Arnón mayu cantopi Aroermantapacha, valle chaupipi llajtantin, tukuy pampasnintin Medebakama.

^17-21 Chaymanta Hesbón, pampaspi kaj tukuy llajtasnintin: Dibón, Bamot-baal, Bet-Baal-Meón, Jahaza, Cademot, Mefaat, Quiriataim, Sibma, Zaret-sahar, valle lomapi, Bet-peor, Pizga kinraykuna, Betjesimot, tukuy pampa llajtas, amorreospa reynin. Sehompa kamachinasnin llajtas, payqa Hesbonmanta kamacherqa. Chaykunata Moisesqa atiparqa, Madianmanta kurajkunata, Evita, Requemta, Zurta, Hurta, Rebata, chay jallp'aspi Sehonmanta kurajkuna tiyakojkunata ima.

²² Chaymanta israelitas wañucherqanku Beorpa adivino wawan Balaamta, wajkunatawan.

²³ Rubén aylluman qosqa karqa llajtasniyoj, ranchosniyoj jallp'a mashkhachus kasqankuman jina, chay jallp'aj mojonnintaj karqa Jordán mayukama.

²⁴ Gad ayllumampis Moisesqa jallp'ata rak'irallarqataj mashkha familiachus kasqankuman jina.

²⁵ Paykunamantaj chayarqa Galaadmanta kaj tukuy llajtasniyoj Jazer jallp'as, chantá amonitaspa khuskan jallp'asninku ima, chaytaj karqa Rabá chimpampi Aroer llajtakama.

²⁶ Chantá Hesbonmanta, Ramat-mizpakama, chantá Betonim, chantá rillampuni Mahanaimninta Debirpa mojon tinkuyninkama.

²⁷ Vallenejpitaj chayarqa, Bet-aram, Bet-nimra, Sucot, Zafón, ima. Chay jallp'aqa puchorqa Hesbón rey Sehompata. Chay jallp'ataj karqa Jordán mayoj inti llojsimuyninmanta, Cineret qochej ura cantonkama.

²⁸ Chaymin chayaqenkoqa karqa Gadpa ayllumpaj mashkhachus kasqankuman jina, llajtasniyoj, ranchosniyojtaj kaj jallp'as.

²⁹ Chaymanta Moisesqa Manasespa khuskan ayllunman chayaqenku jallp'ata qopullarqataj mashkha familiachus kasqankuman jina.

³⁰ Paykunaj jallp'ankoqa karqa Mahanaimmantapacha, tukuy Basán jallp'as, chay niyta munan Basán rey Ogpa kamachisqan jallp'as, Basampi Jairpa juch'uy ranchosnin ima; chaykunataj karqanku sojta chunka llajtas.

³¹ Chaymantaqa Galaadpa khuskan, Astarot llajtas, Edrei llajta, Basampi rey Ogpa llajtasnin ima. Chay karqa Manasespa wawan Maquirpa wawasnimpaj, chay niyta munan Manasespa khuskan miraynimpaj, mashkhachus kasqankuman jina.

³² Chay jallp'asta Moisesqa rak'irarqa paykunaman Moab pampasta, inti llojsimuypi manaraj Jordán mayuta chimpashaspa.

³³ Leví ayllumanrí mana jallp'astaqa qorqachu Moisesqa, imaraykuchus paykunaj chayaqenkorqa Israelpa Señor Diosnillan, imaynatachus Señor nisqanman jina.