Josué 12 - Qheshwa Biblia DC

Moisespa atipasqasnin

¹ Kay reyesta israelitasqa atiparqanku Jordán mayoj chimpampi inti llojsimuynimpi. Chay qhechusqanku jallp'astaj karqa: Arnón mayumanta Hermón orqokama, Jordán mayoj inti llojsimuynin vallesnintin.

² Chaypacha amorreospa reynin Sehón tiyakorqa Hesbompi. Payqa kamacherqa Arnón mayoj canton Aroermanta, vallej khuskanninmanta, Galaadpa khuskanninmanta, Amompa wawasnimpa jallp'ankoj tinkuynimpi Jaboc mayukama;

³ Arabamanta Cineret mar qochaj inti llojsimuyninkama; Arabá mar qochakama, k'ara qochaj inti llojsimuykama, Bet-jesimotman rej ñanmanta, Pisga orqoj ura k'uchunmantapacha.

⁴ Refaitasmanta ch'uli Basan rey Ogqa, Astarotpi, Edreipiwan tiyarqa.

⁵ Chay kajtaj kamacherqa Hermón orqomanta, Salcata, tukuy Basan jallp'asta, Gesurwan Maacawan tinkuykama, Galaadpa khuskannintawan, chay jallp'asqa karqa Hesbón rey Sehonpata.

⁶ Chay reykunata Señorpa kamachin Moiseswan, israelitaswanqa atiparqanku. Moisestaj chay jallp'astaqa rak'irarqa Rubén aylluman, Gad aylluman, Manasespa khuskan ayllunmanwan.

Josuejpa atipasqan reyes

⁷ Kaykuna karqanku chay reykuna, pistachus Josuewan, israelitaswan atiparqanku Jordán mayuta chimpaspaña inti yaykuynejpi, chaykuna. Paykunata wañuracherqanku Baal-gadmapi Líbanoj vallempi, Seirman wicharej Halac orqospi ima. Chay jallp'asta Josueqa israelitasman chayaqenkupaj rak'irarqa, mashkha aylluschus kasqankuman jina.

⁸ Kay jallp'asta qorqa: Monte jallp'asta, valle jallp'asta, Jordán vallesta, kinray jallp'asta, ch'in pampa jallp'asta, Neguevta. Kay jallp'aspi tiyarqanku heteos, amorreos, cananeos, ferezeos, heveos, jebuseos ima.

^9-24 Josuejpa wañurachisqan reyesqa kaykuna karqanku: Jericomanta, Haimanta, chayqa Betel qayllallapi karqa; Jerusalenmanta, Hebronmanta; Jarmutmanta, Laquismanta, Eglonmanta, Gezermanta, Debirmanta, Gedermanta, Hormamanta, Aradmanta, Libnamanta, Adulanmanta, Macedamanta, Bet-elmanta, Tapuamanta, Hefermanta, Afecmanta, Saronmanta, Madonmanta, Hazormanta, Simron-meronmanta, Acsafmanta, Taacnacmanta, Meguidomanta, Cadesmanta, Carmelo cheqapi Jacneamanta, Dormanta, chayqa Dor provinciapi karqa, Gilgalpi Goimmanta, Tirsamanta, ima. Tukuynimpi chay reyesqa karqanku kinsa chunka ujniyoj.