Jeremías 51 - Qheshwa Biblia DC

Babiloniaj phirikuynin

¹ Señorqa nin: Uj sinch'i wayrata apachimusaj Babiloniaj contrampi, jinataj caldeo runaspa contrampipis.

² Babiloniaman enemigosninwan kachaykusaj trigota jina wayrachimunankupaj. Chay jallp'ankuta mana uj runayojta saqenqanku, maypachachus chay ñak'ariy p'unchaynin chayamojtin, tukuynejmanta maqaj yaykuykonqanku.

³ Wach'ina k'urusninkuta wakichikuchunku chay wach'inasniyoj kajkuna. Pechoquerasninkuta churakuchunku. Babilonia waynakunata ama khuyaychejchu. Soldadosninkuta mana ujniyojta tukuchiychej.

⁴ Caldeospa tukuy nacionesninkupi runasqa callespi mast'alla wañuranqanku.

⁵ Jinapis Israel aylluwan, Judá aylluwanqa contraypi juchallerqanku, tukuy jallp'amantaj juchata junt'acherqanku. Noqa Tukuy Atiyniyoj Señor, Israelpa Santo Diosnintaj paykunata manaraj qonqarparinichu.

⁶ Babiloniamanta ayqeychej. Pipis atejqa ayqechun. Ama wañuychejchu Babiloniaj juchasninraykoqa. Kaymin ayni kutichinay ratoqa, imatachus ruwasqanman jinataj qopusaj.

⁷ Babiloniaqa makiypi uj qori vaso jina karqa, tukuy kay pachatataj machachej. Nacionesqa chay vinomanta ujyaj kanku, yuyayninkuta chinkachinankukama.

⁸ Jinapis, Babiloniaqa ujllata urmarqa phirikunankama. Paymanta waqaychej. Chay nanachikusqasnimpaj jampista apamuychej ichapis thañikonqaraj.

⁹ Babiloniata jampiykunña jinapis manapuni thañinchu. Saqerpariychej. Jakuchej kaymanta. Sapa uj llajtanchejmankama ripunachej. Chay millayta juchachakusqanqa janaj pachakama chayan, phuyuskama oqharikun.

¹⁰ Señorqa cheqan ruwasqasninchejta sut'incharqa. Jamuychej, Sión orqopi willamusunchej, Señor Diosninchej imatachus ruwasqanta.

¹¹ Señorqa Babiloniata tukuchiyta munan, Media nacionmanta reykunastapis ajinallatataj yuyachin. Chaymin Señorpa aynita kutichiynenqa, yupaychana wasinta imatachus ruwasqankuman jina. Wach'inasniykichejta wakichikuychej. Allinta jap'iychej jark'achikunaykichejta.

¹² Wiphaylata pataman oqhariychej Babiloniaj perqasninta thuñiykoj wakinankupaj. Qhawajkuna soldadosta astawan kachaychej. Qhawaj soldadosta churaychej. Pakaymanta wateqajkuna soldadosta churaychej. Señorpuni chay ruwanata wakicherqa. Imastachus ruwananta nisqanta ruwarqapuni, Babiloniapi tiyakojkunaj contrampi.

¹³ Qan Babilonia, jatuchaj mayus cantopi tiyakoj, may chhika qhapaj kapuykunasniyki tiyapusunki, ña chayamusunkiña tukukapunayki p'unchay, mayta munapayanayki ima.

¹⁴ Tukuy Atiyniyoj Señorqa kausayninrayku juran: Enemigosniykiwan, langostaswan jina junt'aykuchisqayki, paykunataj qanta atipaykususqankurayku tarikonqanku, nispa.

Diosta yupaychanapaj takiy

¹⁵ Señorqa atiyninwan kay pachata ruwarqa, yachayninwan kay pachata sayaykucherqa, yuyayninwantaj janaj pachata aysatatarqa.

¹⁶ Sinch'i qhapariyninwan phuyuspi yakusta sonarichin; kay pachaj cantosninmantapacha phuyusta pataman wicharichin. Paramojtimpis lliuj lliujkunata k'ancharichin; wayratapis jallch'ananmanta orqhomun.

¹⁷ Tukuy runasqa mana yuyayniyoj wapus kanku; chay lantikunata ruwajkunata p'enqachin. Chaykunaqa runaj ruwasqan lantislla kanku, chaykunaqa llulla lantislla mana kausayniyojkunataj.

¹⁸ Chaykunaqa mana imapaj allinchu, asikunapaj jinalla kanku. Señorqa chaykunata cheqanchana p'unchaypi phirenqa.

¹⁹ Jacobpa Diosenqa mana jinachu. Payqa ruwan tukuy kay pachapi kaj imasta. Paymin Israelta ajllakorqa paypata kanampaj; sutenqa Tukuy Atiyniyoj Señormin.

Señorqa Babiloniawan jasut'in

²⁰ Babilonia qanqa martilloy jina kanki. Qanwan nacionesta phirirani, qanllawantaj reinosta chinkachini.

²¹ Qanwan caballosta, jinataj caballospi rejkunastapis wañurachini. Qanwan, carretasta, chaypi rejkunatapis wañurachini.

²² Qanwan qharista, warmistapis wañurachini, chantá achachi runasta, waynasta, jinataj sipaskunastapis.

²³ Qanwan michejkunata, uywa tropastapis t'unaykorqani, chajrapi llank'ajkunata, yuntasninkutapis, kamachejkunata, palaciopi llank'ajkunatapis.

Babiloniapis jasut'ichikun

²⁴ Noqa rikunaykichejta Babiloniaman, caldeosmampis imastachus munasqankuman jina jasut'isaj Sión orqopi millay imasta ruwasqankurayku. Noqa Señor chayta nini.

²⁵ Noqa qampa contraykipi kashani, t'unaraj orqo. Qan tukuy nacionesta t'unaranki. Jasut'inasuypaj makiyta oqharisaj, chay pata chhankasmantapacha urmaykuchimusqayki, uj ruphasqa orqomantaj tukuchisqayki.

²⁶ Ni mayqen raqay rumisniyki allinchu kanqa wasista sayarichinapaj. Wiñaypaj tukuchisqa kanki. Noqa Señor chayta nini.

²⁷ Wiphaylata pataman oqhariychej maqanakoj yaykunaykichejpaj. Putututa waqachiychej, runasta tantaychej Babiloniata jap'ikapoj yaykunaykichejpaj. Paypaj contrampi Araratmanta, Minimanta, Askenazmantawan runasta tantaychej. Ajllaychej uj kuraj kamachejta tukuy reykunata pusanampaj. Phiñarisqa langostasta jina caballospi rejkunata kachaykuychej.

²⁸ Nacionesta wakichiychej maqaj yaykunankupaj. Mediamanta reykunata wakichiychej, chantá kamachejkunasninta, paywan llank'ajkunasninta, tukuynin kamachishanku chay jallp'asmantapacha.

²⁹ Kay pacha ikhakun, kharkatitintaj, imaraykuchus Señorqa junt'ashan chay wakichikusqasninta, Babiloniata uj ch'in pampaman tukuchinan karqa chayta.

³⁰ Babiloniamanta wapu soldados maqanakuyta saqerparerqanku, chay pakakunasnillankupiña qhepakorqanku. Kallpasninku tukukaporqa, warmi jinallaña karqa. Llajtasninkuman runas junt'aykorqanku, wasisninkutaj ruphaykuchisqas karqanku.

³¹ Qhepampi qhepampi Babiloniamanta willaj rinku, llajtanqa tukuyninña jap'isqa kasqanmanta.

³² Enemigonqa mayu chimpanankuta, yaku ch'ajchastapis jap'ikaporqa, maqanakupi kutichinanku wasistapis ruphaykucherqa. Soldadostaj mancharikuywan t'ukullarqankuña.

³³ Tukuy Atiyniyoj Señorqa Israelpa Diosnin kayta nin: Babiloniaqa trilla tiempo saruchisqa era jinamin. Poqoy oqharina tiempoqa ña chayamonqaña.

³⁴ Jerusalén Sión orqo llajtaqa nin: Babiloniamanta rey Nabucodonosorqa t'unata ruwawarqa, mikhuwarqataj, uj ch'usaj chuwata jina saqerpariwarqa. Mar qochamanta uj millay animalta jina oqoykuwarqa; noqamanta misk'i kajninwan sajsaykukorqa, noqamanta puchojtataj wijch'urparerqa.

³⁵ Babilonia qopuchun tukuy chay ñak'ariykunasta apamuwasqanmanta. Caldeokuna kunanqa junt'apuchunku wañuchiwarqanku chay runasmanta.

Israelman Señorqa nin

³⁶ Señorqa nin: Noqa cheqancharqayki enemigosniykimanta aynita kutichichikusaj. Babiloniaj mayunta, jinataj yaku juturisnintapis ch'akichisaj.

³⁷ Babiloniaqa raqaykunasllamanña tukonqa, atojkunaspa pakakunallankumanña, mana tiyakunapaj jina cheqaman. Chaytaj tukuyta t'ukuchenqa, mancharichenqataj.

³⁸ Tukuyninku leones jina qhaparenqanku, león uñas jinataj ch'ajwarenqanku.

³⁹ Maypachachus k'ajariywan laurarejtinkoqa noqa ujyachisaj machachikoj ujyanasta, umasninkuta muyuchej ujyanasta. Ajinata wiñaypaj puñuyman urmanqanku, chaymanta manaña rijch'arimonqankuchu. Noqa Señor chayta nini.

⁴⁰ Chaymantaqa ñak'ana wasiman qhatisaj, imaynatachus apanku corderosta, chivosta, mochostapis apanku ajinata.

Babiloniaj urmaynin

⁴¹ Babiloniaqa tukuy kay pachapi may uyarisqa llajta urmaykun, jap'ikapunkutaj. Nacionesqa payta urmajta rikuspa may jinata mancharikunku.

⁴² Mar qochaqa Babiloniaman junt'aykorqa, chay jatuchaj qhollchoqeyasqasninwan p'ampaykorqa.

⁴³ Chay llajtasnenqa millay ch'inkunasman tukorqa, ch'aki jallp'asmanña, ch'in pampamantaj ni pejpa tiyakunampaj jina, manataj pipis chayninta pasanampaj jina.

⁴⁴ Babiloniaj diosnin Belta jasut'isaj, chay imatachus ajtuykusqanta ajtuchimusaj, manañataj nacionespis payman qayllaykonqankuchu. Babiloniaj perqasnin thuñiykukunña.

⁴⁵ Aylluymanta kajkuna Babiloniamanta llojsimpuychej, sapa ujtaj kausayninta salvachun, chay sinch'i phiñakuyninmanta.

⁴⁶ Ama mancharikuychejchu, nitaj sustullikuychejchu, kay jallp'api tukuy laya ch'ajwaykunas kasqanmanta. Sapa wata uj jina uj jinataj ch'ajwaykunasqa kanqanku, chay jallp'api millay ñak'arichinakuykunas kasqanmanta, jinataj kamachejkunapura maqanakusqasninkumanta.

⁴⁷ Ajinaqa Babiloniaj lantisninta jasut'inay p'unchay jamonqa. Chay tukuy naciontaj k'umuykachachisqas qhepakonqanku, ayaswan junt'aykusqa.

⁴⁸ Janaj pacha, jinataj kay pachawan, chaypi tukuy kajkunapis Babilonia urmajtinkama kusikonqanku, wichaynejmanta chay wañurachejkuna jamojtinku. Noqa Señor chayta nini.

⁴⁹ Arí, Babiloniaqa urmanqapuni, Israel ayllu ukhupi wañurachisqanmanta, jinataj tukuy kay pachapi wañurachisqasninmantapis.

Babiloniapi kaj judiosman willay

⁵⁰ Qankuna chay wañurachiymanta ayqerqankichej chaykuna, mana sayarispa ayqekuychej. Karupiña kaspa Señormanta yuyarikuychej, Jerusalenmantapis yuyarikullaychejtaj.

⁵¹ Qankuna ninkichej, p'enqachikuyku phiña parlasqasniykuta uyarispa. Tukuyniyku mana allimpi qhawasqas kayku, imaraykuchus waj llajtasniyoj runasqa yupaychana llimphu wasiyki ukhuman yaykorqanku.

⁵² Señorqa nillantaj: Babiloniaj lantisninta jasut'inay p'unchay jamushan, tukuy chay jallp'api nanasqasniyoj kajkunaqa llakiyta waqanqanku.

⁵³ Babiloniaqa cielokamapis wicharichun aswan pataman atiyninta churanampaj, chaymampis enemigosninta kachasaj chay atiyninta thuñiykamunankupaj. Noqa Señor chayta nini.

Babiloniaj tukukuynin

⁵⁴ Babiloniamantapacha nanaywan qhapariykunas uyarikun, caldeospa jallp'anmantapacha uj jatun ch'ajway uyarikun.

⁵⁵ Pichus Babiloniata chinkachejqa, Señormin, jatunchakuynintapis tukuchejqa. Enemigosnenqa mar qochaj phiñarikuspa qhollchoqeyasqan jina, sinch'i ch'ajwaywan paypa patanman urmaykonqa.

⁵⁶ Babiloniata chinkachej jamorqanku, ña jap'eqarqankuña ch'ajwapi maqanakojkunasninta, chay k'uru wach'inasninkutataj t'unata ruwarqanku. Señorqa Diospunimin, sapa ujman payqa qopun imatachus ruwasqankuman jina.

⁵⁷ Tukuy Atiyniyoj Señor reyqa nillantaj: Babiloniamanta kurajkunasninta machaykuchisaj, yachayniyoj runasninta, palaciopi kamachejkunasninta, paywan llank'ajkunasninta, chantá soldadosnintapis. Wiñay puñuyman urmanqanku, chaymantarí mana rijch'arimonqankuñachu.

⁵⁸ Babiloniaj chay phatu perqasnin tukuynin urmachisqas kanqanku, chay chhikachachaj punkusnimpis ruphaykuchisqas kanqanku. Qhasillapaj chay nacionesqa llank'akorqanku, chay sayk'ukusqankoqa ninallapi ruphasqas tukukonqanku. Ajinata Tukuy Atiyniyoj Señorqa nin.

Jeremiaspa willayninta Babiloniaman apanku

⁵⁹ Judamanta rey Sedequías tawa watastaña kamachishajtin profeta Jeremías uj willayta apacherqa chay Neriaspa wawan Masiaspa allchhin Seraiasman. Seraiasqa rey Sedequiaswan Babiloniaman rerqa, paymin reypa jarakunanmantaqa yachaj.

⁶⁰ Jeremiasqa uj libropi qelqarqa ima ñak'ariykunachus Babiloniaj patanman jamunanku karqa chaykunata willaspa, chayri Babiloniaj contrampi qelqasqa kashan chaykunata.

⁶¹ Seraiasmanqa nerqa: Kay qelqasqa willaytaqa Babiloniaman chayaspa leenkipuni.

⁶² Chantá ninkitaj: Señor qan nerqanki kay nacionta tukuchinaykita, manaña pipis tiyakunampaj jina, ni runas, nitaj uywas, imaraykuchus wiñaypaj tukuchinki.

^63-64 Ña kay qelqasqata leeyta tukuspañari, uj rumiman wataykuytawankama Eufrates mayuman wijch'uykuy, niytaj: Babiloniaqa ajinatamin chinkaponqa, manañataj ujtawan jatarimonqañachu, Señor apachimunan kashan chay ñak'ariypi urmasqanmantaqa, nispa. Kaykamalla Jeremiaspa nisqanqa.