Jeremías 41 - Qheshwa Biblia DC

Gedaliasta wañuchinku

^1-2 Reypa ayllun ukhumanta Ismaelqa, Neganiaspa wawan Eliasamaj allchhin qanchis kaj killapi Mizpaman rerqa Gedaliaswan tinkoj. Chunka runastawan pusarikuspa rerqa. Chay Mizpapitaj mikhushajtinku, Ismael, jinataj payta qhaterqanku chaykuna, chay chunka runaspiwan jatarikuytawankama espadawan Gedaliasta wañucherqanku, pitachus Babiloniamanta rey churasqa Judamanta uj kamachej kanampaj chayta.

³ Ismael wañuchillarqataj chay tukuy judiosta, jinataj Mizpapi kasharqanku chay caldeo soldadostawan.

^4-6 Gedaliasta wañuchisqankumanta chay q'ayantin, manaraj pipis kay imasta yachashajtinku, Siquemmanta, Silomanta, Samariamantawan pusaj chunka runas chayamorqanku; paykuna jamorqanku sunkhasninku q'arasqas, p'achasninku llik'isqas; chantá ukhunkupis may k'irisqas karqanku, chaytaqa paykuna kikinku nanachikusqanku. Ajinallatataj chajra poqoykunasta, inciensota ima Diosta yupaychana wasipi q'osñichinankupaj apamorqanku. Chaypacha Ismaelqa Mizpamanta waqaspa llojsimorqa, rerqataj paykunawan tiyakoj, nerqataj: Jamuychej, Ahicampa wawan Gedaliasta qhawariychej.

⁷ Llajtaman chayamojtinkukamataj, Ismaelqa runasninwan ima ñak'ararqanku, uj pujyumantaj wijch'uykorqanku.

⁸ Chaywampis chay runasmanta chunka jina Ismaelman nerqanku: Ama wañuchiwaykuchu, noqaykojta tiyapuwayku trigoyku, cebadayku, aceiteyku, jinataj misk'iykupis campopi pakasqas. Chaypacha Ismaelqa mana wañucherqachu chay ujkunata jinataqa.

⁹ Ismael wañuracherqa chay runaspa ayasninta wijch'uykorqa chay pujyoqa rey Asaj ruwachisqan karqa, Israelmanta rey Baasamanta pakakunampaj. May chhikan jatumpuni karqa. Jinapis Ismaelqa chay wañuchisqan runaspa ayasninwan chay pujyuman junt'aykucherqa.

¹⁰ Astawampis Ismaelqa reypa warmi wawasninta jap'iracherqa, jinallataj Mizpapi qhepakorqankuraj chay runastapis, soldadosta kamachej Nabuzaradán, Gedaliaspa kamachin uraman churaykusqa chaykunata. Ismaelqa presosta jap'iraytawan ñanta rerqanku Amón jallp'aman chimpanankupaj.

^11-12 Maypachachus Careaj wawan Johanán, jinataj soldadosta kamachejkuna, paywan kasharqanku chaykuna ima, Ismael millay imasta ruwasqanta yachaytawankama, tukuynin runasninta tantaykorqa, paypa contrampitaj maqanakoj rerqanku. Tariparqankutaj Gabaompa jatun estanquen chaypi.

¹³ Ismael presosta apasharqa chay runas Johananta, chay soldados ukhupi kamachejkunatawan, paywan khuska jamushajta rikuspa mayta kusikorqanku.

¹⁴ Kutipuspataj Johananwan tantakoj rerqanku.

¹⁵ Ismaeltaj pusaj runasnimpiwan Johananmanta ayqerqanku, riporqankutaj amonitaspa jallp'anman.

¹⁶ Chantá Johanán paywan risharqanku chay kurajkunapiwan pusakamporqanku soldadosta, warmista, wawasta, jinataj kurajkunatawan; pikunatachus Ismaelqa Mizpamanta apasharqa Gedaliasta wañuchisqantawankama, chaykunata Johananqa watejmanta Gabaonmantapacha kutichimorqa.

¹⁷ Jinamanta ripuytawan Gerut-quimampi tiyakorqanku, chayqa Belén qayllapi karqa, chaymanta ripunankupaj, Egiptomantaj yaykupunankupaj.

¹⁸ Caldeosmanta ayqekunankurayku, imaraykuchus manchachikusharqanku Ismael Gedaliasta wañuchisqanmanta, pitachus Babiloniamanta reyqa chay jallp'amanta uj kamachej kanampaj churasqa.