Jeremías 40 - Qheshwa Biblia DC

Jeremiasqa Gedaliaswan qhepakun

¹ Señorqa Jeremiasman parlallarqataj chay soldados ukhumanta kamachej Nabuzaradán, Ramá llajtapi Jeremiasta preso kayninmanta kacharichisqanmanta qhepaman. Nabuzaradanqa cadenawan ch'ipasqata tariparqa Jerusalén llajtapi, jinataj Judapipis pischus Babiloniaman wijch'usqas karqanku chaykuna ukhupi.

^2-3 Soldadosta kamachejqa wajnejman Jeremiasta pusaspa kay jinata nerqa: Señor Diosniyki kay jallp'aman ñak'ariykunata apachimunanta nerqa, kunanta chayta junt'an. Kay imas qankunata qhatirisunkichej Señorpa contrampi juchallisqaykichejrayku, mana kasusqaykichejraykutaj.

⁴ Kunampacha watasqa kashanki chay cadenasta phaskarasqayki. Sichus noqawan Babiloniaman riyta munanki chayqa, jamuy, noqa qanta yanapasqayki. Mana jamuyta munanki chayri, qhepakullay. Tukuy jallp'a qampa ñaupaqeykipi kashan, maypichá allin rijch'asunki chayman rillay.

⁵ Sichus kutipuyta munanki chayqa kutipullay, Sefampa allchhin Ahicampa wawan Gedaliasman, mayqentachus Babiloniamanta rey ajllarqa, Judá llajtaspa kamachejnin kanampaj. Paywan aylluyki ukhupi tiyakuy, maymanchus allin rijch'asunki chayman rillay. Chay qhepatataj chay kamachejqa Jeremiasman uj t'inkata qospa mikhunastawan churaykapuspa kacharpayarqa.

⁶ Jeremiasqa Gedaliaswan riporqa Mizpa llajtaman, paywantaj chay jallp'api tiyakorqa, puchorqankuraj chay runaswan ima.

Gedaliaspa contrampi oqharikunku

⁷ Campopi soldadosta kamachejkuna kasharqankuraj, chanta runasninku ima yacharqanku Babiloniamanta reyqa chay jallp'api Ahicampa wawan Gedaliasta kamachinampaj churasqanta; qhawanampajtaj qharista, warmista, wawasta, pischus mana apachisqaschu karqanku chay wajcha runastawan.

⁸ Chay runasqa Mizpapi Gedaliasta taripaj rerqanku. Paykuna ukhupi kasharqanku Netaniaspa wawan Ismael, Careaj wawasnin Johanán, Jonatán, chantá Tanhumetpa wawan Seraías, Netofamanta Efaejpa wawasnin, jinataj Maacatmanta uj runaj wawan Jezaniaspis, chantá paypa runasnin ima.

⁹ Gedaliasqa cheqamanta juraspa nerqa: Caldeospa makinman chayaytaqa ama manchachikuychejchu. Qhepakuychej kay jallp'api tiyakoj, Babiloniamanta reypa kamachisnin kaychej, allintaj risonqachej.

¹⁰ Noqa Mizpapi qhepakusaj caldeospa ñaupaqempi qankunamanta parlarinaypaj paykuna kayman jamojtinku chaypacha. Qankunataj astawan vinota tantakuychej, churakuychej, ajinataj mikhuykunasta, aceiteta, jinamanta kay jap'isqaykichej llajtapi atinkichej tiyakuyta.

¹¹ Ajinallatataj tukuy judíos Moabpi, Amompi, Edompi, chay waj nacionespipis kasharqanku chaykuna yacharqanku chay Babiloniamanta reyqa judiosmanta wakin runasta jallp'ankupi saqesqanta, Gedaliastataj kamachejninku kanampaj churaykusqanta.

¹² Chaypacha Judaman kutiykamporqanku maymanchus ch'eqerachisqas karqanku chay tukuy cheqamanta, Mizpapi Gedaliasmantaj rerqanku. Chaypi paykunaqa tantakuspa ashkha vinota ruwarqanku, jinataj may chhika poqoykunasta oqharerqanku.

Gedaliaspa contrampi Ismael oqharikorqa

¹³ Careaj wawan Johananwan, pichus campopi qhepakorqanku soldadosta kamachejkunapiwan Mizpapi Gedaliaswan tinkoj rerqanku.

¹⁴ Paytataj nerqanku: Manachu yachanki Amonmanta rey Baalis Netaniaspa wawan Ismaelta qanta wañuchinasumpaj kachamusqanta? Gedaliastaj mana kasorqachu.

¹⁵ Chaypacha Johanán Gedaliasman pakayllapi nerqa: Noqa rispa Ismaelta wañurpayachimusaj. Manataj pipis yachanqachu pichus chayta ruwasqanta. Imaraykutaj saqeykuman pay qanta wañuchinasuntari? Chayqa apamunman Judapi tukuy judíos muyuyniykipi tantasqas kajkuna ch'eqerachisqas kanankuta. Chay puchoj runaspis chinkanankuta.

¹⁶ Gedaliastaj kuticherqa: Ama chaytaqa jinata ruwaychu; Ismaelmanta jinata nisqaykeqa manamin jinachu.