Isaías 48 - Qheshwa Biblia DC

Dios israelitasta k'amin

¹ Jacobpa ayllun, kayta uyariy. Israelpa sutinwan sutichasqa runas, Judá ayllumanta mirasqas kajkuna, Señorpa sutinta oqharispa parlajkuna, Israelpa Diosninmanta yuyarikojkuna. Chaywampis, chayta ruwankichej mana cheqa kaywanchu, nitaj cheqan sonqowanchu.

² Diospa llajtanmanta kayku ninkichej, Israelpa Diosninman atienekuyku nispa. Chay Diospa sutenqa Tukuy Atiyniyoj Señormin.

³ Imaschus pasarqa chaykunamantaqa ñaupajmantaña willarqaykichej. Imatachus willasqaytaqa usqhayllata ruwarqani. Chaytaj junt'akorqapuni.

⁴ Chayqa karqa k'ullu kasqaykirayku, much'uykeqa fierro jina, frenteykipis bronce jina.

⁵ Unaymantaña noqaqa willaporqayki. Manaraj kay imas kashajtin noqaqa nerqaykiña, ama ninaykipaj: Lantiypa ruwasqan kayqa, ruwasqay lanti kay imasta kamachin, nispa.

⁶ Chay imasta uyarerqanki, rikorqankitaj; chaytaqa mana niwajchu. Kunanqa mosoj imasta uyarichisqayki, pakasqa kajkunata mana yachasqasniykita.

⁷ Kay imasqa kunan ruwasqas kanku, manaraj unaychu. Kunankama kay imasmantaqa mana uyarerqankichu ama ninaykipaj: Kay imastaqa yacharqaniña, nispa.

⁸ Arí, kay imasmantaqa mana jayk'ajpis uyarerqankichu, manataj yacharqankichu chay imasmantaqa. Cheqamanta ñaupajtaqa mana uyariyta munajchu kanki. Noqaqa yacharqanipuni qanqa wasanchanawaykita. Chaynejta nacesqaykimantapacha mana kasukojpaj rejserqayki.

⁹ Sutiyrayku phiñakuyniyta ñit'iykukuni. Noqa jatunchasqa kanayrayku mana chinkacherqaykichu.

¹⁰ Noqaqa llimphucharqayki mana qolqeta jinachu; mana chayqa ñak'ariy hornopi probarqayki.

¹¹ Noqarayku, noqa kikiypa munakuyniyrayku ajinataqa ruwarqani, ama sutiy qhesachasqa kanampaj. Noqa jatunchasqa kayniytaqa mana pimampis qosajchu.

Señorqa ayllunta salvanqa

¹² Jacobpa ayllun Israel, uyariway. Qanta wajyarqayki: Noqa sapallay Diosqa kani, noqalla qallariy, tukukuytaj kani.

¹³ Makiywan jallp'ata ruwarqani, makillaywantaj janaj pachatapis qhatatarqani. Chaykunata sutinmanta wajyajtiytaj khuska sayarimorqanku.

¹⁴ Tukuyniykichej tantakuspa uyariychej: Mayqen diostaj kay imas kanmanta sut'incharqari? Pitachus noqa ajllarqani, chay runa nisqayta junt'anqa, Babiloniaj contranta caldeospa contrantawan.

¹⁵ Noqa kani parlaj, wajyaj, kaymantaj pusamoj; chayrayku maykunastachus purisqasnimpeqa allimpuni renqa.

¹⁶ Qayllamuwaychej, uyariwaychejtaj kayta: Qallariymantapacha noqaqa sut'ita parlarqani; kay imas kasqanmantapacha noqaqa chaypi karqani. Kunanqa Señorpuni atiyninwan kachawan.

¹⁷ Israelpa Santo Diosnin, salvajniyki Señorqa ajinata nin: Noqa Señor Diosniyki kani; noqa yachachiyki imachus qampaj allin kasqanta. Noqa may ñantachus rinaykita rikuchiyki.

¹⁸ Allin kanman karqa sichus kamachisusqayta kasuwankiman chayqa. Kusiyniykeqa uj mayu yaku jina ashkhayanman karqa, atipasqaykipis mar qochaj yaku oqharikusqasnin jina kanman karqa.

¹⁹ Mirayniykipis t'iyu jina mana yupay atina kanman karqa. Qanmanta llojsejkunaqa t'iyu jinapuni kanman karqa. Noqaqa mana jayk'ajpis chinkachiykichejmanchu, manataj ñaupaqeymantapis wijch'uymanchu karqa.

²⁰ Babiloniamanta llojsiychej, caldeosmanta ayqekuychej; kay imasmantaqa kusiywan willamuychej; jallp'aj tukukuyninkama chayachiychej. Chaypachataj niychej: Señorpuni kacharichin, kamachin Jacobta, nispa.

²¹ Ch'in pampata paykunata pusashajtin, yaku ch'akiywanqa mana wañorqankuchu. Señorqa chhankamanta yakuta phullchichimorqa; chhankata lajrarqa yakutaj purirerqa.

²² Sajra runaspajqa mana sonqo tiyakuy kanchu, nin Señorqa.