Isaías 43 - Qheshwa Biblia DC

Señorlla salvajqa

¹ Jacobpa miraynin israelitasta Señorqa nin: Ama manchachikuychu, noqa qantaqa librarqayki. Noqa qanman sutita churarqayki. Chaynejta noqajta qanqa kanki.

² Yaku mayusta chimpashajtiykeqa noqa qanwan kasaj. Mana yakoqa apasonqachu. Nina chaupita rishaspapis mana ruphachikunkichu. mana larwaynillampis q'aspasonqachu.

³ Noqaqa Señor Diosniyki, Israelpa Santo Diosnin salvajniyki kani. Qanta Egiptota, Etiopiata, Sebastawan qorqani cuentaykimanta.

⁴ Noqaj rikuyniypi may k'acha, allintaj kanki. Chayrayku munakuyki. Qanrayku waj runasta qosaj. Kausayniykimanta waj nacionesta rikuchisaj.

⁵ Ama manchachikuychu. Noqa qanwan kashani. Inti llojsimuymantapacha, inti yaykuymantawan runasniykita tantaykampusqayki.

⁶ Patanejpi kaj nacionta nisaj kutichipuy, runasniyta. Uranejpi kaj naciontapis nisaj: Ama jap'ikuyñachu, nispa. Kacharipuway qhari wawasniyta, warmi wawasniytawan, kay pachaj k'uchusninmantapacha.

⁷ Sutiyta apaykachajkunata, pikunatachus noqa kusikunaypaj ruwarqani chaykunata, sayaricherqanitaj.

⁸ Qharqompuwaychej qhawaykachashaj ciego runasniyta, ningrisniyojpacha mana uyarejkunasniyta.

⁹ Uj cheqallaman tukuy naciones, runaspis tantakuchunku. Mayqenninkutaj kay imasta willasqa, chayri ñaupajta imaschus kasqantapis willasqari? Chayta rikoj runasta pusakamuchunku, nichunkutaj cheqanta, cheqapuni kasqanta ninanchejpaj.

¹⁰ Señorqa cheqamanta nin: Qankuna noqamanta sut'inchajkuna kankichej, noqaj ajllakusqasniy kamachisniy, noqata rejsikunawaykichejpaj, atienekunawaykichejpajtaj, pichus noqa kasqayta allinta unanchanaykichejpaj. Noqamanta ñaupajtaqa mana ima diospis karqachu, manataj qhepamampis waj dios kanqachu.

¹¹ Noqa k'atalla Señorqa kani. Noqamanta wajqa mana pipis salvajqa kanchu.

¹² Señorqa cheqamanta nin: Noqa willarqani, salvarqani, uyarichikorqanitaj. Qankuna chaupipeqa mana waj dios karqachu. Qankuna chay rikojkunasneyqa kankichej.

¹³ Noqaqa Dios kan. Manaraj p'unchay kashajtin karqanipuni. Mana pipis makiymantaqa qhechuyta atinchu. Noqa ruwasaj nisqaytaqa mana pipis jark'anmanchu.

¹⁴ Israelpa Santo Diosnin salvasojniyki Señorqa ajinata nin: Qankunata libranaypaj Babiloniaman runasta kacharqani, babiloniostataj tukuyninkuta ayqecherqani. Jinallataj runaykachaspa buquespi purej caldeostapis may llakiypi rikhuricherqani.

¹⁵ Noqamin kani Señorniykichej, Santo Diosniykichej, Israelta ruwaj, reyniykichejtaj.

¹⁶ Señorqa mar qochaj chaupinta uj ñanta khallarparerqa, sinch'ita correj yakoj chaupinta.

¹⁷ Llojsichimorqataj carrosta, caballospi rejkunata, mayta wapuykachaj soldadosta ima. Tukuyninku chinkarerqanku amaña ujtawan jatarimunankupaj. Chaypi paykunaqa uj mechero jina tukukapunku.

¹⁸ Chay tukuy imasta ruwaj Señorqa israelitasman nerqa: Ñaupa imasta ama yuyariychejchu, nitaj pasaj imastapis yuyariychejchu.

¹⁹ Kunanqa uj mosoj imata ruwasaj; chaytaj rikhurenqaña. Manachu chaytaqa qankuna reparashankichej? Ch'in pampanejta watejmanta uj ñanta kicharisaj, mayustataj ch'aki pampaspi rikhurichisaj.

²⁰ Tukuy k'ita animales jatunchawanqanku, atojkuna, suriwan ima. Ch'aki jallp'aspi yakuta rikhurichisaj, ch'in pampaspi mayuta puririchisaj, ajllakusqay ayllu yakuta ujyanampaj.

²¹ Kay israelitastaqa noqapaj ruwakorqani, paykuntaj noqata yupaychawaspa takenqanku.

²² Qantaj Jacobpa miraynin Israel, mana qhaparikuwarqankichu, mana chayqa noqawan amichikorqanki.

²³ Ovejasta wañuchispa q'olachinapaj mana apamuwarqankichu nitaj uywa wañuchispapis jatunchawankichu. Noqaqa mana rikuchikusniykita mañaspa sayk'ucherqaykichu, manataj phiñachiykichu inciensota mañaspapis.

²⁴ Mana noqapajqa q'apaj jawinasta ranterqankichu, nitaj uywa wañuchisqa wiraswampis sajsachiwarqankichu, mana chayqa jucha q'episniykita wijch'uykuwanki; chay jina millay juchata ruwasqasniykiwantaj sayk'uchiwarqanki.

²⁵ Noqarí, noqa kikiyta munakusqayrayku chay millay juchaykichejta pichani. Chay juchasniykichejmantaqa manaña yuyarikusajchu.

²⁶ Qan yuyarichiway, iskayninchej parlakuna. Qan parlariy ari, cheqamanta mana juchayoj kasqaykita rejsichinaykipaj.

²⁷ Ñaupa tatayki juchallikorqa, qanman yachachisojkunapis contraypi oqharikorqanku.

²⁸ Kamachejkunasniykichejqa santo wasiyta ch'ichicharqanku. Chayrayku noqaqa Jacobpa ayllun Israelta saqerqani, chinkachisqa, p'enqachisqataj kananta.