Isaías 3 - Qheshwa Biblia DC

Señorqa Judata Jerusalentawan juchachanqa

^1-3 Qhawaychej allinta! Tukuy Atiyniyoj Señorqa Jerusalenmanta, Judamantawan tukuy ima kausanapaj kajta qhechukaponqa: Mikhuykunata yakutawan, wapu kajta, ch'ajwapi maqanakojta, cheqanchajta, profetata, yachajta, kuraj runasta, soldadosta kamachejta, allin runata, yuyaychajta, jampirita, layqata ima.

⁴ Paykunata kamachinampajtaj majt'illusta churasaj, yoqhallaslla paykunata kamachenqa.

⁵ Runasqa paykunapura qhollpinakonqanku, ujkuna ujkunawan purajmanta maqanakonqanku. Waynasqa machu runaspa contranta oqharikonqanku, wajcha runastaj qhapaj runaswan maqanakonqanku.

⁶ Uj runaqa wauqenta tatampa wasimpi jap'iykuspa nenqa: Qampataqa p'achallaykipis tiyapusunki churakunaykipaj. Chayrayku qan noqaykoj kamachejniyku kay ari, kay jina llakiymantataj orqhowayku ari.

⁷ Ujnintaj kutichenqa: Mana noqaqa allinyachiyta atiymanchu, wasiypeqa mana mikhukunaypaj tiyapuwanchu, nitaj p'achaypis churakunaypaj. Chayrayku, runasta kamachejtaqa ama churawaychejchu.

⁸ Cheqamanta Jerusalenqa urmaykapun, Judapis thuñiykukun, imaraykuchus chaypeqa mana parlanasta parlanku, millay imasta Señorpa contranta ruwanku, Señorpa jatun kayninta qhesachaspa.

⁹ Paykunaj uyallankutaj willashan imaynachus kasqankuta. Sodoma runas jina, mana pakarispa juchasninkutaqa tukuyman willanku. Imachus paykunamantaqa kanqapis, paykunallataj jasut'ita wakichikunku.

¹⁰ Cheqan purej runata niychej allin rinanta, imaraykuchus makimpa llank'asqanta mikhonqa.

¹¹ Imaynachus kanqa juchasapa runaqa! Paytaqa mana allinchu renqa. Paymanqa imastachus ruwasqanman jina pagasqa kanqa.

¹² Uj yoqhallalla aylluytaqa munasqanta ruwan, warmispa nisqallantaña ruwanku. Ayllúy, ñaupajman pusashasunkichej, chaykunallataj ch'aukiyashasunkichej, mana allin ñankunasta pusaspa.

¹³ Señorqa cheqanchanampaj wakichisqaña kashan, jinallataj tukuy runasta cheqanchanampajpis.

¹⁴ Señorqa ayllumpa kurajkunasnimpa contrampi cheqanchaj jamonqa, ayllunta kamachejkunaj contrampiwan. Qankunaqa uvas sach'asta chinkachinkichej, wajchasmanta suwasqaykichejtataj wasisniykichejpi jallch'ankichej.

¹⁵ Ima nispataj qankunaqa aylluyta munasqaykichejta ruwankichejrí, ima nispataj wajchastapis uyankupi sarunkichejri?, nispa nin Tukuy Atiyniyoj Señorqa.

Jerusalén warmispaj jasut'i

¹⁶ Señorqa nillantaj: Sionmanta kaj warmisqa anchata wapuykachanku, umankuta oqharispa purinku, ñawisninkuwan ch'irmispa, pata patallata thaskispa, chakisninkupi k'achanchakusqankuta sonachispa.

¹⁷ Chayrayku Señorqa chay warmispa umasninkuta q'ara t'ojlullata ruwanqa p'enqayninkutataj q'alallata rikhurichenqa.

^18-23 Chay p'unchaypi Señorqa tukuy k'achanchakusqankuta qhechonqa: Chakispa k'achanchasqata, umaspi k'achanchasqata, kunka k'achanchanasta, walqasta, faluchosta, makinkupi k'achanchasqastawan, uma watanasta, chaki k'achanchanasta, chumpista, q'apaj jawinas apaykachanasta, sajra manchachina warkhuykusqasta, sortejasta, senqa sortejasta, sumaj p'achasta, mantasta, mantillasta, wayaqasta, espejosta, linomanta kaj bayetasta, velosta, chalinasta ima.

²⁴ Chaypachaqa q'apaj imaspa cuentamantaqa asnaylla kanqa; chumpej cuentanmantaqa uj panoqalla kanqa; sumaj simp'asqa kananmantaqa p'ajla umalla kanqa; sumaj p'acha cuentanmantaqa uj qhasqa p'achalla kanqa; k'achita kananmantaqa, millay ruphasqa uya kanqa.

²⁵ Qhari runasniykeqa espadawan wañuchisqas kanqanku, soldadosniykitaj ch'ajwapi wañuranqanku.

²⁶ Runasniyki mayta waqanqanku, llakiy p'achayojtaj kanqanku, llajtataj ch'impacha qhepakonqa, uj warmi q'ara pampapi chukushaj jina.